1 Di obe owo kamɛ yi, Amon batii ɔka Nahas lakpi, ninfɛ di obisuɔtɔbi nɔɔ layila nwɔ kaanya fɛ ɔka nɛ. 2 Ni di Dawid labuɛ alɛ, "Kamabla sifutulɛ nta Nahas obisuɔtɔbi Hanun, diekye ote labla sifutulɛ aatɛɛ." Nioso Dawid lakpee batii baalaata Hanun yɔɔsa batɔɔ di ote kukpi suoto.

Di Dawid batii lawa ni Hanun nfũ di Amon batii kasɔ suoto alɛ bɔɔbatɔɔ ni yɔɔsa yi, 3 Amon batii banɔɔfotii nwu labuɛ baatɔkɔ Hanun alɛ, "Feenyu falɛ dibu di Dawid kɔta ni teefɔ oso eekpee fɔ batii alɛ babata fɔ yɔɔsa? Diele okpee eekpee batii nɔɔ alɛ babanyunyu, baala kale nwu baabafũ ka?" 4 Nioso Hanun lamufũ Dawid batii nwu, baakpaasu ma sikusu kakyɛ, baabudibudi akpeele lɛma di akyeke ntɛɛ, ni baatososa ma baasifi nɛ.

5 Obe wɔ di otii onwii labatɔkɔ ni Dawid ɔlaa aakyeko ni batii nwu suoto yi, ni aakpee batɔkyɛntɛ baalaakyakako ma nɛ, diekye baakpee ma sinunsɔ osie kanya. Ni di ɔka labuɛ alɛ, "Bisiɛ di Yeriko dilaase di obe wɔ di sikusu lee leyii ni, fiɛ biekple biwa."

6 Obe wɔ di Amon batii latofo alɛ nfɛ bookpete ni di Dawid anwunfie kamɛ yi, ni di Hanun ku Amon batii lakyesee koto fututu onutũ bakilo nkpe-afosi-atiɛ nkpe-nna baalaayɔ bakeke ba di bapɔnkɔ nnaanfi ni ku bapɔnkɔ basiɛtɛ baakyeko Mesopotamia, Siria Maaka ku Soba nɛ. 7 Baata koto baalaayɔ bakeke ba di bapɔnkɔ nnaanfi ni ku bapɔnkɔ basiɛtɛ nkpe afosi-atiɛ nkpe nnyɔ, diɛkyakaa ni di Maaka ɔka ku bakpɛtɛ nɔɔ, mba niabla ni kasiɛkɔ di Medeba ɔlɔɔkɔ, ni baasiisa Amon batii kafɔɔ baakyeko sekpoo lɛma, baadie baakyɛ kakpɛkɔ nɛ.

8 Di Dawid lanu ni nle mmle yi, ni aakpee Yoab ku bakpɛtɛ ba bamuu ninkpɛ ni ladie baakyɛ nɛ. 9 Amon batii ladie baawa baabayila di kakpɛ kanya di okpoo kplɛ lɛma kasukunya, ni di baka ba kafɔɔ niawa ni lasiɛ di lepoo kamɛ lete lɛma nɛ.

10 Yoab lanya alɛ kakpɛ nkpe di sitũ ku sɛmaa nɔɔ; nioso aadiki bakpɛtɛ nwaa di Israel, ni aatɔɔ ma aakpee Siria batii nwu nɛ. 11 Aayɔ bakpɛtɛ nwu bule aakpee di obilɛma-suɔtɔbi Abisai kalɔ, ni aatɔɔ ma aakpee Amon batii nɛ. 12 Ni di Yoab labuɛ alɛ, "Nse Siria batii lesii mi osie yi, ni faawa faabafũ mi; kafɔɔ nse Amon batii lesii fɔ osie yi, ni amii kamawa mmafũ fɔ. 13 Wɛ osie, faata bukpɛ ku sɛkambi buta batii loo ku Yaa loo sekpoo kplɛ nwu. SAATE nwu kamabla lɛsaa le ninlɛ ni di anu nɔɔ."

14 Ninfɛ di Yoab ku bakpɛtɛ ba niawɛ ni ku nnwɔɔ latu baabuo di Siria batii suoto baakpɛ ma, ni baatoso baasifi di anu nɔɔ nɛ. 15 Obe wɔ di Amon batii lanya alɛ Siria batii kootoso ni kakpɛ yi, mma kafɔɔ baatoso di Yoab obilɛma-suɔtɔbi Abisai anu baalaabuo di okpoo kplɛ nwu kamɛ. Nioso Yoab lapɛ aakple aasifi Yerusalem.

16 Sɛmaa, di Siria batii lanya alɛ Israel batii ntoolenkee ma ni yi, baakpee batɔkyɛntɛ baata baakpaa Siria batii baakyeko Eufrate Okle kamaa baawako, di Hadadeser kakpɛ kanyayilatɛ Sofak laleko ma ni katũ.

17 Obe wɔ baatɔkɔ ni Dawid ɔlaa wɔ mmle yi, ni aasiisa Israel omuu baawaalɛ Yordan okle nɛ; aataka kakpɛ di suoto lɛma ni aakyakako ma ku kakpɛ nɔɔ di anu lɛma nɛ. Dawid lasiisa bakpɛtɛ nɔɔ bakyaka ku Siria batii di kakpɛ kamɛ, Siria batii kafɔɔ lakpɛko nwɔ. 18 Kafɔɔ baatoso di Israel anu. Dawid lalo bakpɛtɛ lɛma ba ninsiɛ ni bapɔnkɔ nkpe-nkuɛnsĩ ku bakpɛtɛ lɛma ba ninkyɛ ni ninkpaa nkpe afosi-ana. Aalo kafɔɔ Sofak bakpɛtɛ lɛma kanyayilatɛ nwu.

19 Obe wɔ di batii ba niasiɛ ni di Hadadeser kalɔ lanya alɛ Israel ntoolenkee ma ni yi, ni baabla atoko ɔkyɛ ole kanya ninii ku Dawid, ni baasiɛ nwɔ kaalɔ nɛ.

Nioso Siria batii ditasintootuna alɛ bɔɔkyakaako Amon batii diidii.