1 Obe wɔ di Dawid ntoobe, di alɛɛ nɔɔ kafɔɔ ntɔɔkyɛ ni sitũ yi, ni aayɔ obisuɔtɔbi nɔɔ Solomon aase sɛka di Israel suoto nɛ.

2 Ni di Ɔka Dawid lasiisa kafɔɔ kanyabayilatɛ bamuu di Israel, diɛkyakaa ni di olebatatɛ ku Lewi batii. 3 Baaka Lewi batii ba niafũ ni alɛɛ afosi-atiɛ ee baatɔɔwaalɛ nii, ni di basuɔtɔ bamuu lɛpɔ̀ labla nkpe afosi-atiɛ-nkpe-nnɛ nɛ. 4 Ni di Dawid labuɛ alɛ, "Di mba mmle kamɛ yi, nkpe afosi-anyɔ-nkpe-nna bayila di SAATE nwu olekatakɔ ɔkpɛ nwu kanya, di nkpe-nkuɔ kafɔɔ bale banɔɔfotii ku bakantɛ. 5 Nkpe-nna bale nyoko banyuntɛ, nkpe-nna kafɔɔ katansa SAATE nwu ku sinu asansaa ya lɛbla lɛta ni ɔsaabla nwu."

6 Dawid lasɛ Lewi batii nwu di akudi atiɛ kamɛ di Lewi babisuɔtɔbi kanya: Gerson, Kohat ku Merari.

7 Gerson babisuɔtɔbi niale:

Ladan ku Simei.

8 Ladan babisuɔtɔbi niale:

Yehiel niale ɔkasale, kamaa Setam ku Yoel- bamuu labla batiɛ.

9 Simei babisuɔtɔbi niale:

Selomit, Hasiel ku Haran- bamuu labla batiɛ.

Mba mmle niale Ladan ayo kamɛ banɔɔfo nɛ.

10 Simei babisuɔtɔbi kafɔɔ niale:

Yahat, Sisa, Yeus ku Beria nɛ.

Mba mmle niale Simei babisuɔtɔbi nɛ- bamuu labla bana.

11 Yahat niale ɔkasale ni di Sisa lale ni ɔnyɔɔfa nɛ, kafɔɔ Yeus ku Beria ditalofo babisuɔtɔbi kpinwu; nioso baaka ma fɛ leyo ninwii ku ɔkpɛ onwii ɔbla.

12 Kohat babisuɔtɔbi niale:

Amram, Yishar, Hebron ku Usiel- bamuu labla bana.

13 Amram babisuɔtɔbi niale:

Aron ku Mose.

Baadiki Aron baase lete, nnwɔɔ ku banantii nɔɔ dinaa ni kaloo, alɛ baakleklesa asaa ya niɛtɛ eeklekle alenke ni, manta seleɔta di SAATE nwu anu, mambla kasumu ɔkpɛ di anu nɔɔ, manta kafɔɔ batii lɛtɔtrɔ di Leyooto nɔɔ kamɛ dinaa ni kaloo. 14 Baaka Yaa otii nwu Mose babisuɔtɔbi fɛ Lewi kɔna.

15 Mose babisuɔtɔbi niale:

Gersom ku Eliesa.

16 Gersom banantii niale:

Sebuel niale ɔkasale.

17 Eliesa banantii niale:

Rehabia ɔkasale.

Eliesa ditawɛ babisuɔtɔbi bamba kubanwii, kafɔɔ Rehabia babisuɔtɔbi latɛ baapɔ.

18 Yishar babisuɔtɔbi niale:

Selomit niale ɔkasale.

19 Hebron babisuɔtɔbi niale:

Yeria ɔkasale, Amaria ɔnyɔɔfa, Yahasiel otiɛfa ku Yekameam ɔnaafa.

20 Usiel babisuɔtɔbi niale:

Mika ɔkasale ku Yisia ɔnyɔɔfa.

21 Merari babisuɔtɔbi niale:

Mahli ku Musi.

Mahli babisuɔtɔbi niale:

Eleasar ku Kis.

22 Eleasar ditalofo babisuɔtɔbi fiɛ aakpi: babisankobi lete aawɛ. Ote lɛma obilɛma-suɔtɔbi Kis babisuɔtɔbi, niayɔ ma baayɔ.

23 Musi babisuɔtɔbi niale:

Mahli, Eder ku Yerimot- bamuu labla batiɛ.

24 Mba mmle niale Lewi banantii di ayo lɛma kanya nɛ- ayo kamɛ banɔɔfo nwu fɛ mmle baakpana ni ayooto lɛma kanya, baaka ma ni kafɔɔ lete, lete. Mma niale, bakpɛntɛ ba niafũ ni alɛɛ afosi-anyɔ ee baalenkee ni mambla ni ɔkpɛ di SAATE nwu olekatakɔ kamɛ nɛ. 25 Diekye Dawid labuɛ alɛ, "Di SAATE nwu, Israel Yaa nwu, ntɔɔta ni batii nɔɔ ɔnyɛɛ ɔtɛ atɔɔwa asi ni di Yerusalem dinaa ni kaloo oso yi, 26 diesinfĩ alɛ Lewi batii nwu katuka lɛkpaayo klekle nwu ee asaa ya man-yɔ mamblako ni ɔkpɛ nini kuninwii." 27 Di Dawid asaatuo yɛntɛle kanya yi, baaka Lewi batii baakyeko mba niafũ ni alɛɛ afosi-anyɔ ee baafũ baalenkee nii.

28 Lewi batii ɔsaabla kuale alɛ baakyakaako Aron banantii mambla ɔkpɛ di SAATE nwu olekatakɔ: alɛ baayila di nflɔnkɔ, ayo ya di sɛlɔɔkɔ, akleklesaa nwu amuu okleklesa ku sɛsaabla bamba ɔbla di Yaa leyo kanya. 29 Mma niayila di bloblo wɔ mandiki mantika ni di opunu suoto, nnaafũ be manta ni alesaa asaaɔta, bloblo wɔ ninankpee ni lɛnyanka, ofiɛ ku ɔkpɔtɔɔsa, ku asaa amuu ɔklapoosa di lɛpɔ ku ninmuɔbi kanya nɛ. 30 Mma kafɔɔ dikaatɛ man-yila olesɛ biala mampɛ sɛfa, mantansa SAATE nwu nɛ. Mambla nkpo okle kafɔɔ ku kɔtɔɔfɔ, 31 ku obe lele kafɔɔ bɛɛwako SAATE nwu ofiɛ asaaɔta di Anyɛɛtɛyi ku Kɔwɛntɛ Fɔle ayi ole ku ayi ole ya bamba bɛɛtɛ ni suoto. Mma nimabla ɔkpɛ di SAATE nwu anu obe biala di lɛpɔ le bɛɛtɛ ni kanya ku osuku wɔ beetuo ma ni kanya nɛ.

32 Nioso Lewi batii nwu labla sɛsaabla lɛma baata Lɛkpaayo le Mansi nii, ku Kakleklekɔ nwu, di babilɛma-sɔtɔbi Aron banantii nwu kalɔ, baata SAATE nwu olekatakɔ kasumu ɔkpɛ ɔbla.