1 Dawid ku banɔɔfotii nɔɔ biala, kanyabayilatɛ di nkpe kanya ku kanyabayilatɛ di alafa kanya lakpee asi baawo. 2 Ninfɛ aabuɛ aatɔkɔ Israel kasiisakɔ nwu kamuu alɛ, "Nse dilɛ dita ye, dile kafɔɔ SAATE nwu Yaa loo dibiesaa yi, biɛta buta babiloo ba bule niɛsamii bakpe ni ninkyonkɔ kanya bufenko di Israel nsɔ mmuu suoto, ku olebatatɛ ku Lewi batii ba kafɔɔ ninkpe ni ku mma di sekpoo lɛma ku babɔkɛɛ lɛma sɛfa kaweekɔ nsɔ nwu, baawa babakyakaa di awo. 3 Bita bukplesa Yaa loo kanya ninii lɛlakaa nwu buwako ɔkyɛ loo, diekye butawolaa ni osuku di Saul sɛka olebee kamɛ." 4 Kasiisakɔ nwu kamuu lafũ baakpee alɛ bɔɔbla nkpo, diekye ɔlaa nwu lakyɛkyɛ kuata batii nwu bamuu.

5 Nioso Dawid lasiisa Israel batii bamuu, diayɔ ni di Sihor Okle di Egipte dialaase di Lebo Hamat, alɛ bɔɔlaayɔ Yaa kanya ninii Lɛlakaa nwu mankyeko Kiriat Yearim manwako. 6 Ni di Dawid ku Israel batii bamuu lakyakaa ku nnwɔɔ lakyɛ Baala di Yuda (ninle ni Kiriat Yearim) alɛ bɔɔlaayɔ SAATE Yaa nwu kanya ninii lɛlakaa nwu ninfa, nnwɔ ninsiɛ ni di kerubim obo- lɛlakaa le manlɛɛ ni ku Leyooto nwu nɛ.

7 Ni baayɔ Yaa lɛlakaa nwu di Abinadab leyo baatika di keke fɔle suoto, di Usa ku Ahio latɔɔkpa ni keke fɔle nwu. 8 Dawid ku Israel batii nwu bamuu latɔɔnya suoto lɛyɔɔ ku osie lɛma omuu di Yaa anu, ku sinu, bakyitaa, basanku, akasa, abɔɔsaa anɛɛkya ku akyukyoo.

9 Obe wɔ baabadu ni Kidon kakpaa yi, Usa ladiki kɔnɛɛ nɔɔ alɛ oomufũ lɛlakaa nwu an-yilasa, diekye banankyue-suɔtɔ ba niatɔɔnaanfi ni keke nwu latuula. 10 Ni di ɔblɔ lafiɛ SAATE nwu osie kanya di Usa suoto nɛ, ni aapɛ nwɔ aatɛ kaasɔ ta aayɔ kɔnɛɛ nɔɔ aakpanko ni lɛlakaa nwu suoto. Nioso aakpi ninfa di Yaa anu.

11 Ninfɛ di ɔblɔ lafiɛ Dawid ta SAATE nwu ɔblɔ yakayaka wɔ aanya ni di Usa suoto oso, nioso bɔɔlɛɛ lɛba nwu Peres Usa diɛbase di miɛ dii le mmle.

12 Dawid layɛkɛ Yaa di dii nwu, ni aakaalɛ alɛ, "Lɛ kamafuo Yaa lɛlakaa nwu ɔyɔ ɔwako ɔkyɛ nii?" 13 Nioso Dawid ditayɔ lɛlakaa nwu aalaase di ɔkyɛ nɔɔ di Dawid Okpoo kplɛ nwu. Kafɔɔ, aakyisa ni aalase di Obed-Edom, Gat otii nwu leyo. 14 Ni di Yaa lɛlakaa nwu layila di Obed-Edom leyo kamɛ batii di leyo nɔɔ kamɛ awɛntɛ atiɛ, ni di SAATE nwu lawii leyo nɔɔ kamɛ batii ku lɛsaa biala le niawɛ nwɔ ni lɛtɔtrɔ nɛ.