1 Di Dawid latofo ayo aata ni suoto di Dawid Okpoo kplɛ nwu kamɛ aaloo ni sɛmaa yi, ni aabla lɛba aata Yaa lɛlakaa nwu, aapɛ lɛkpaayo aata ni nɛ. 2 Ninfɛ di Dawid labuɛ alɛ, "Kuonwii dilɔbatuka Yaa lɛlakaa nwu, diediki Lewi batii lete, diekye SAATE nwu niediki ma alɛ batuka SAATE nwu lɛlakaa nwu nɛ, baabla kasumu ɔkpɛ kafɔɔ di anu nɔɔ dinaa ni kaloo."

3 Dawid lasiisa Israel omuu di Yerusalem alɛ bɔɔyɔ SAATE nwu lɛlakaa manwako lɛba le aabla aata ni nii. 4 Aalɛɛ Aron banantii ku Lewi batii banantii aasiisa:

5 Di Kohat banantii kamɛ,

Uriel kanyayilatɛ ku banantii kɔlafa-afosi-anyɔ.

6 Di Merari banantii kamɛ,

Asaia kanyayilatɛ nwu ku banantii alafa-anyɔ-afosi-anyɔ.

7 Di Gersom banantii kamɛ,

Yoel kanyayilatɛ nwu ku banantii kɔlafa-afosi-atiɛ.

8 Di Elisafan banantii kamɛ,

Semaia kanyayilatɛ nwu ku banantii alafa-anyɔ

9 Di Hebron banantii kamɛ,

Eliel kanyayilatɛ nwu ku banantii afosi-anɛ.

10 Di Usiel banantii kamɛ,

Aminadab kanyayilatɛ nwu ku banantii kɔlafa-lefosi-banyɔ.

11 Ninfɛ di Dawid lalɛɛ olebatatɛ Sadok ku Abiatar, ku Lewi batii Uriel, Asaia, Yoel, Semaia, Eliel ku Aminadab baawa nɛ. 12 Ni aatɔkɔ ma alɛ, "Aye ninle Lewi batii ayo kamɛ banɔɔfo nɛ; aye ku Lewi batii wo lee bikleklesa suoto lee biɛkatako SAATE Israel Yaa nwu lɛlakaa biwako lɛba le lɛbla lɛta nini. 13 Diekye aye Lewi batii bitayɔ ni biawako lɛkasale nwu di SAATE Yaa loo nwu lanya ni ɔblɔ di suoto loo. Butawolaa kamɛ di ɔkyɛ nɔɔ di mmle kanya buabla nini di osuku wɔ bɛɛtɛ ni kanya." 14 Nioso olebatatɛ ku Lewi batii nwu lakleklesa suoto lɛma di mmle baakatako SAATE Israel Yaa nwu lɛlakaa manwako nii. 15 Ni di Lewi batii nwu latuka Yaa lɛlakaa nwu ku sewoso di amuusi lɛma suoto, fɛ mmle di Mose lakpee ma ni kufiofa di SAATE nwu ɔlaa kanya nɛ.

16 Ni di Dawid latɔkɔ Lewi batii kanyabayilatɛ nwu alɛ badiki babilɛma fɛ sinu basantɛ alɛ basa suoto lɛyɔɔ sinu, baasa sĩ ku sinu asansaa: Basanku, bakyitaa ku abɔɔsaa anɛɛkya.

17 Nioso Lewi batii ladiki Yoel obisuɔtɔbi Heman; di basuɔtɔ-bilɛma nɔɔ kamɛ, Berekia obisuɔtɔbi Asaf; di Merari batii babilɛma-suɔtɔbi kamɛ, Kusaia obisuɔtɔbi Etan; 18 babilɛma-suɔtɔbi ba kafɔɔ niawɛ ni ku mma baale ni banyɔɔfa kayilakɔ kanya niale: Sakaria, Yaasiel, Semiramot, Yehiel, Uni, Eliab, Benaia, Maaseia, Matitia, Elifelehu, Mikneia, Obed-Edom ku Yeiel, kayoko banyuntɛ nwu.

19 Sinu basantɛ Heman, Asaf ku Etan dikpeni bɛɛsa abɔɔsaa sɛɛle anɛɛkya nwu nɛ; 20 Sakaria, Asiel, Semiramot, Yehiel, Uni, Eliab, Maaseia ku Benaia dikpeni bɛɛsa basanku nwu di basanko sɛlɔ kanya nɛ, 21 Matitia, Elifelehu, Mikneia, Obed-Edom, Yeiel ku Asasia kafɔɔ dikpeni bɛɛsa bakyitaa di sɛlɔ se niɛwa ni kasɔ kanya nɛ. 22 Lewi batii ɔnɔɔfo Kenania niayila di sinu ɔsa kanya nɛ; ɔkpɛ nɔɔ kuale diekye aatofo nwu kamɛ nwaa.

23 Berekia ku Elkana dikpeni beele n-yoko banyuntɛ bɛɛta lɛlakaa nwu. 24 Olebatatɛ Sebania, Yosafat, Netanel, Amasai, Sakaria, Benaia ku Eliesa dikpeni bɛɛfɛ akyukyoo di Yaa lɛlakaa nwu anu. Obed-Edom ku Yehia kafɔɔ lale n-yoko banyuntɛ bata lɛlakaa nwu.

25 Nioso Dawid ku Israel banɔɔfo nwu ku bakpɛtɛ kanyabayilatɛ nwu di akudi kakpe kanya lakyɛ baalaakatako SAATE nwu kanya ninii lɛlakaa nwu baakyeko Obed-Edom leyo baawako ku suoto lɛyɔɔ ɔnya. 26 Ta di Yaa lakyakaako ni Lewi batii ba niatuka ni SAATE nwu kanya ninii lɛlakaa nwu oso yi, baayɔ banankyue-suɔtɔ bakuɛnsĩ ku akunumuu akuɛnsĩ baata ole. 27 Ninfɛ di Dawid lakpee akpeele fɛnɛnɛɛ aate ni fututu, fɛ mmle di Lewi batii ba bamuu niatuka ni lɛlakaa nwu lakpee ni, ku sinu basantɛ nwu okle, ku Kenania wɔ niayila ni di sinu basantɛ kanya. Dawid kafɔɔ lakpee simu akpeele fɛnɛnɛɛ. 28 Nioso Israel omuu lakatako SAATE kanya ninii lɛlakaa nwu ku kudu oyiisa, ku akunumuu akya ku akyukyoo ɔfɛ, ku abɔɔsaa annɛɛkya, ku basanku ɔfɛ ku bakyitaa ɔpɛ.

29 Di SAATE nwu kanya ninii lɛlakaa nwu latoobuo ni Dawid Okpoo kplɛ nwu yi, Saul obisankobi Mikal lanyu aafenko di sɛfle kamɛ. Ni aanya ni Ɔka Dawid latootũ aatɔɔnya ni suoto lɛyɔɔ yi, ni aanyu Dawid nyakatãa di otu nɔɔ kamɛ nɛ.