1 Di obe owo kamɛ, Filisti batii lakpɛko Israel batii; ni di Israel batii latoso di anu lɛma nɛ, batii kpinwu lanɔɔ kakpɛ di Gilboa Kobokote osi. 2 Filisti batii latikanko Saul ku babisuɔtɔbi nɔɔ osie kanya, ni baalo babisuɔtɔbi nɔɔ Yonatan, Abinadab ku Malki-Sua nɛ. 3 Kakpɛ nwu kanya lawɛ osie kaamana Saul kaakyi, ni di obe wɔ di balo nɔɔ lalawɛ nwɔ ni yi, baatika nwɔ nkɔ.

4 Ninfɛ di Saul latɔkɔ akpɛsaa-kleetɛ nɔɔ alɛ, "Diki kapamii lɛfɔ faalo mi, nse diele nkpo batii ba mmle ninankyɛlɛnsa ni suoto kamawa mamalo mi mantɔɔma mi."

Kafɔɔ lɛyɛkɛ lapɛ akpɛsaa-kleetɛ nɔɔ oso atabla nkpo; nioso Saul labɔkɔtɛ kapamii nɔɔ kamu, ni aanɔɔ aatika ka di suoto nɛ. 5 Obe wɔ di akpɛsaa-kleetɛ nwu lanya alɛ Saul ntookpi nii, ninfɛ di nnwɔɔ kafɔɔ aanɔɔ aatika di kapamii nɔɔ suoto aakpi nɛ. 6 Nioso Saul ku babisuɔtɔbi nɔɔ batiɛ nwu lakpi, ni di leyo nɔɔ batii bamuu kafɔɔ lakpi baakyakaa nɛ.

7 Obe wɔ di Israel batii ba bamuu niawɛ ni di ɔtaata nwu lanya alɛ bakpɛtɛ nwu ntootoso beesifi nii, di Saul ku babisuɔtɔbi nɔɔ ntookpi nii yi, ni baadiɛ sekpoo lɛma baatɛ, baatoso baasifi nɛ. Ni di Filisti batii lawa baabasiɛ di sekpoo nwu kamɛ nɛ.

8 Kaleesɛ, di Filisti batii lawa alɛ bɔɔbadiki ni asaa di bakpi nwu suoto yi, baanya alɛ Saul ku babisuɔtɔbi nɔɔ lakpi baate di Gilboa Kobokote osi. 9 Baadiki nwɔ asaa di suoto, baabudi nwɔ disi baayɔ kafɔɔ akpɛsaa nɔɔ, ni baakpee batɔkyɛntɛ di Filisti batii kasɔ kamuu suoto alɛ bayie ɔlaa nwu lɛkya di afiɔ lɛma ku batii lɛma kamɛ nɛ. 10 Ni baayɔ Saul akpɛsaa baatɛ di afiɔ lɛma olekatakɔ, ni baayɔ disi nɔɔ baasaka di afiɔ lɛma ya manlɛɛ ni Dagon olekatakɔ nɛ.

11 Obe wɔ di Yabes Gilead batii bamuu lanu ni lɛsaa biala le di Filisti batii labla ni Saul yi, 12 ni di basuɔtɔ lɛma ba bamuu niawɛ ni sɛkambi lakyɛ baalaayɔ Saul ku babisuɔtɔbi nɔɔ nwu bakpi baawako Yabes nɛ. Ninfɛ baakookaa akufi lɛma di Yabes kowoso kplɛ nwu kalɔ, ni baanii kanya ayi akuɛnsĩ nɛ.

13 Nioso Saul lakpi ta atale ni onukwale aata ni SAATE nwu oso; atamufũ SAATE nwu ɔlaa aaklee, mianwu kafɔɔ, aatɔɔkyɛ sɛbɔ mpɛkɔ anaakaalɛ lɛkyɛkaako, 14 atawolaa kafɔɔ akyeko SAATE nwu nfũ. Nioso SAATE nwu lalo nwɔ ni aamunikĩisa sɛka kalekɔ nwu aata Yese obisuɔtɔbi Dawid nɛ.