1 Kronika 14

Dawid Sɛsaabla Di Yerusalem

1 Di obe owo kamɛ, Tiro ɔka Hiram lakpee batɔkyɛntɛ Dawid nfũ ku awoso ya manlɛɛ ni sida akuu, afuɔ ayo-batofotɛ ku asaa bawolatɛ alɛ babatofo lɛka-yo baata Dawid. 2 Ni di Dawid latofo alɛ SAATE nwu niese nwɔ sɛka di Israel suoto, ɛɛta kafɔɔ sɛka kalekɔ nɔɔ lɛtaka katoo osie kanya ta batii nɔɔ Israel oso. 3 Dawid layɔ basɔfɔ kpinwu di Yerusalem aakyakaa, ni aalofo babisuɔtɔbi ku babisankobi kpinwu aakyakaa nɛ. 4 Mba mmle ninle babi ba baalofo baatɔɔ ni ninfa ayooto nɛ: Samua, Sobad, Natan, Solomon, 5 Yibhar, Elisua, Elpelet, 6 Noga, Nefeg, Yafia, 7 Elisama, Beeliada ku Elifelet nɛ.

Dawid Lalenkee Filisti Batii

8 Obe wɔ di Filisti batii lanu alɛ batoose ni Dawid sɛka di Israel omuu suoto yi, baadie baakata baakyɛ di lɛpɔ kamɛ baalaawolaa nwɔ, kafɔɔ Dawid lanu nwu ole ni aadie aakyɛ aalaakyakako ma nɛ. 9 Ninfɛ di Filisti batii lakyɛ baalalalaasa asaa di Refaim Ɔtaata nɛ. 10 Nioso Dawid lawolaa kamɛ di Yaa nfũ alɛ: "Nkyɛ ninaadieko Filisti batii? Fabayɔ ma fankpee di nnɛɛ nii?"

Ni di SAATE nwu ladiki kanya alɛ, "Kyɛ, kamayɔ ma nkpee fɔ ninnɛɛ."

11 Nioso Dawid ku batii nɔɔ lakata baakyɛ Baal Perasim, ni aalenkee ma ninfa nɛ. Ni aabuɛ alɛ, "Fɛ mmle di ntu ntaa nindie nii yi, Yaa ntoodieko balo nii ku kɔnɛɛ nii." Nioso baalɛɛ lɛba nwu alɛ Baal Perasim*14.11 Baal Perasim lɛsɔdiki ninle alɛ, Yaa wɔ nimbɛ andie nii nɛ. 12 Filisti batii nwu ladiɛ afiɔ lɛma baatɛ ninfa, ni di Dawid lata alɛ bakpee nya ɔtɔ bafiɛ nɛ.

13 Filisti batii lakple baalaalalaasa asaa di ɔtaata nwu. 14 Nioso Dawid lakple aawolaa kamɛ di Yaa nfũ, ni di Yaa ladiki nwɔ kanya alɛ, "Tankata faakyɛ tinini, kafɔɔ kpee lɛkpankyila fakyisa ma, faadieko ma di balsam awoso sitũ. 15 Nse feenu-onu kɔfɛɛfɔ sɛlɔ di balsam awoso nsitɛɛ yi, faadie falaakpɛ, diekye nni nimatuo alɛ Yaa ntoodie eele fɔ katũ ɔɔkpɛ Filisti bakpɛtɛ nɛ." 16 Nioso Dawid labla fɛ mmle di Yaa latɔkɔ nwɔ nii, ni baalo Filisti batii bakpɛtɛ baatɛtɛɛ di osuku omuu, diayɔ ni di Gibeon dialaadu ni Geser nɛ.

17 Nioso Dawid leyooto lakyaka di kasɔ biala suoto, ni di SAATE nwu lata nnle nwu mmuu layɛkɛ Dawid nɛ.