1 Ninfɛ di Dawid labuɛ alɛ, "SAATE Yaa nwu leyo kamawɛ ninfũ, ku ofiɛ asaaɔta oleɔta akyikye kafɔɔ, ɛɛta ni Israel batii."

2 Nioso Dawid lata alɛ basiisa bafɔɔ ba ninsi ni di Israel, ni aadiki afuɔ babiɛtɛ aakyeko kamɛ lɛma alɛ bawola afuɔ bata Yaa leyo otofo nɛ. 3 Dawid lata abɔɔsaa wɛɛfɛɛ kpinwu alɛ bayɔ babla sibuɛ bata n-yoko akloo ku amufũsaa nwu, aata abɔɔsaa sɛɛle kafɔɔ aakyakaa aalenkeesa mmle baakadi nii. 4 Aata sida sewoso kpinwu manaafuo ni ɔka, diekye Sidon batii ku Tiro batii lakyeko sĩ kpinwu baawako Dawid.

5 Ni di Dawid labuɛ alɛ, "Okosopo di obisuɔtɔbi nii Solomon nle, adife kafɔɔ di asaa kamɛ nwaa anya, dikaatɛ kafɔɔ alɛ SAATE nwu leyo le babatofo ni lɛtɛ diemuɔ diɛwɛ kafɔɔ leyooto ku sɛlɛ di nnle nwu mmuu anu. Nkpo oso kamalolaa suoto nta ni." Nioso Dawid lale katũ aalolaa suoto nwaa aatɛ fiɛ aabakpi.

6 Ninfɛ di Dawid lalɛɛ obisuɔtɔbi nɔɔ Solomon aatɔkɔ nwɔ alɛ atofo leyo ata SAATE nwu, Israel Yaa nwu nɛ. 7 Dawid latɔkɔ Solomon alɛ: "Obisuɔtɔbi nii, latɛ di otu nii kamɛ nlɛ kotofo leyo nta SAATE Yaa nii nwu Leyooto. 8 Kafɔɔ SAATE nwu ɔlaa wɔ mmle lawa kuatɛɛ alɛ: ‘Fatɔɔkpɛ nkpɛ kpinwu, feewii ntɔ kpinwu kaasɔ kafɔɔ. Diele afɔ nikatofo leyo fanta Leyooto nii, diekye fatoowii ntɔ kpinwu kaasɔ suoto di anu nii. 9 Kafɔɔ fabalofo obisuɔtɔbi onwii, abale ni atoko ɔkyɛ ole ku ɔnyɛɛ ɔtɛ, kamatɔɔ kafɔɔ ɔnyɛɛ ɔtɛ di balo nɔɔ bamuu suoto di ɔfankyi biala. Leyooto nɔɔ nimale Solomon, kamata kafɔɔ Israel atoko ɔkyɛ ale ku osiɛ kloklo di sɛka olebee nɔɔ kamɛ. 10 Nnwɔɔ ninle nnwɔ nimatofo leyo anta ni Leyooto nii nɛ. Abale obisuɔtɔbi nii, ami kafɔɔ kamale nwɔ kote. Kamase sɛka kalekɔ nɔɔ lɛkakpomii kafɔɔ di Israel suoto dinaa ni kaloo.’

11 "Kanunua yi, obisuɔtɔbi nii, SAATE nwu asiɛko fɔ, faawɛ kafɔɔ lɛlɛ, faatofo SAATE Yaa lɛfɔ nwu leyo, fɛ mmle aabuɛ alɛ fababla ni. 12 SAATE nwu ata fɔ lɛsaatofo ku lɛsɔnu nse ɛɛyɔ fɔ eese di Israel kanya, alɛ faale SAATE Yaa lɛfɔ nwu kufiofa. 13 Ni fabawɛ lɛlɛ nse feelolaa asaatuo ku afiofa ya di SAATE nwu lata ni Mose aawako ni Israel batii feele. Wɛ osie ku sɛkambi. Tanta lɛyɛkɛ lapɛ fɔ ee nnɛɛ lafee fɔ.

14 "Ntokpee okyĩini osie kanya lesiisa koto sɛɛle bakilo mbialɛ ntiɛ nkpe alafa-ana, koto fututu bakilo mbialɛ afosi atiɛ-bana, abɔɔsaa sɛɛle ku abɔɔsaa wɛɛfɛɛ kpinwu manamafuo ni ɔkadi, sewoso ku afuɔ. Faafuo nya kafɔɔ ɔkyakaa. 15 Fakpe bakpɛntɛ kpinwu: afuɔ babiɛtɛ, ayo-batofotɛ ku ayo-babantɛ, diɛkyakaa ni di batii ba ninkpe ni lɛsaatofo di sɛkpɛ ateate kamɛ 16 di koto sɛɛle ku koto fututu kamɛ, abɔɔsaa sɛɛle ku abɔɔsaa wɛɛfɛɛ kamɛ- kɔnɛɛ kamɛ sɛkpɛ-bablatɛ balenke ni manaafuo ni ɔka. Kanunua kye ɔkpɛ nwu kasɔ, SAATE nwu kafɔɔ asiɛko fɔ."

17 Ninfɛ di Dawid latɔkɔ kanyabayilatɛ nwu bamuu di Israel alɛ bakyakaako obisuɔtɔbi nɔɔ Solomon nɛ. 18 Aatɔkɔ ma alɛ, "Diele SAATE Yaa lee nwu ninsiko ye nɛ? Adita ye kafɔɔ ɔnyɛɛ ɔtɛ di ɔfankyi biala? Diekye atɔɔyɔ kasɔ nwu batii eekpee mi ninnɛɛ, kasɔ nwu kafɔɔ nsi di SAATE nwu ku batii nɔɔ kalɔ. 19 Kanunua biyɔ otu lee ku ɔkla lee bita alɛ biawolaa SAATE Yaa lee nwu. Bikyekasɔ bietofo SAATE Yaa kakleklekɔ nwu, di mmle biayɔ ni SAATE nwu kanya ninii lɛlakaa ku awansaa klekle ya ninle ni Yaa ale minwako ni olekatakɔ ka bibatofo minta ni SAATE nwu Leyooto."