1 O Yaa, katansa nsoko fɔ di Sion;

afɔ bubata ntam asaa loo munta.

2 O afɔ wɔ ninnu ni ɔlaa ɔpɛ ɔta,

ɔkyɛ lɛfɔ di batii bamuu mawa.

3 Obe wɔ di sikpile lalenkee wo ni nnɛɛ,

faayɔ ɔtanlolaa loo ɔbla faakyɛ wo.

4 Suoto siyɔɔ batii ba feediki ni

fɛɛkpaa ma kafɔɔ falɛ babasiɛ ni di akpata lɛfɔ!

Leyo lɛfɔ asaa biene nwu ntoomiɛsa wo,

di olekatakɔ klekle lɛfɔ nwu.

5 Afɔ niatuna faata wo ku sɛsaabla tinini se niɛbla ni ɔkpɛ,

O Yaa, Dikitɛ loo,

kasɔ kamuu nyɛntɛlekɔ osuku onyu

ku lekpo nwu di kakyonkɔ,

6 niabla ni abokote di osie lɛfɔ kamɛ,

fɛɛyɔ osie feeminisa ɔ̀tɔ,

7 afɔ wɔ ninyɔɔsa ni lekpo kɔfɛɛfɔ kanya,

afɛɛfɔ lɛma nwu nikofuu ni,

ku nnle nwu kudú.

8 Mba ninsi ni di kakyonkɔ kɔyɛkɛ ablasaa lɛfɔ;

di nfũ di kale nsɛ ni ku kale nloo ni

nsa ni suoto lɛyɔɔ sinu.

9 Fannyu kasɔ nwu fankpete ka ntu;

fanta ka kanlɛ nwaa.

Yaa sekle leyii ku ntu

alɛ siata batii alesaa,

diekye nkpo fɛɛbla ka nɛ.

10 Afɔ ninkpete sekplo nɔɔ ntu

fankyɛkyɛsa kafɔɔ atii ninya;

fan-yɔɔsa nya ku kanto

fanwii lɛyɔɔ, alesaa nwu kafɔɔ nlɛ.

11 Fanta lɛlɛɛ nwu nloo ku alesaa kpinwu,

kakɔlele di alokonkyɛ lɛfɔ lefe kafɔɔ alesaa nwɛ kpinwu.

12 Babɔkɛɛ sɛfa nweekɔ di ɔfaafuu nlɛ bokoboko;

akpenkpe nwu nnya suoto lɛyɔɔ.

13 Babɔkɛɛ sɛfa kaweekɔ leyii ku batie ku bafoso

sɛtaata nwu kafɔɔ leyii ku atitabi;

booyiisa kudu, mansa sinu ku suoto lɛyɔɔ.