1 Batii bamuu binu nle mmle;

bamuu lee ba ninsi ni kaayi ka mmle kamɛ, binu,

2 babisɔ ku banɔɔfo

asaabawɛntɛ ku bapiitɛ kyɛkyɛ:

3 Kanya nii mabuɛ ninumbe sɛlaa;

lɛkakatɛ le niekye ni otu nii kamɛ mata lɛsɔnu.

4 Kamakyɔɔ kotoko nii nnu lɛkpa;

kamadiki lɛkpa nii nwu kasɔ ku sanku:

5 Obe oso kamayɛkɛ nse ayi kpile lɛwa,

obe wɔ di bakpiletɛ balaatɛ lɛmana mi beekyi ni-

6 mba nietika ni disi di lɛsaawɛ lɛma suoto

bɔɔkanta ni kafɔɔ di lɛsaawɛ kplɛ lɛma suoto?

7 Otii kuonwii dilaafuo owo nɔɔ nkpa ofũ

ee ata Yaa koto di disi nɔɔ-

8 koto ɔta di otii nkpa disi lefũ kɔya,

letota kuninwii dilɔbabuo anu-

9 alɛ aasiɛ nkpa dinaa ni kaloo

alɛ ɔlɔbabuu nii.

10 Diekye obiala kɔnya alɛ banumbentɛ nkpi;

babuutɛ ku mba ninan-ye ni lɛsaa bamuu nkpi

mandiɛ lɛsaawɛ lɛma kafɔɔ mantɛ batii bamba.

11 Sɛkya lɛma makple ayo lɛma dinaa ni kaloo,

nsiɛkɔ lɛma mate ninta ana ya ninaa ni kase,

nu beetika nsɔ ayooto bɛɛta suoto lɛma.

12 Kafɔɔ kuntɛ otii nkpe lɛsaawɛ yi, anaa nkpa;

ate fɛle lepoo kamɛ babɔkɛɛ ba ninwɔɔ nii.

13 Nni ninwa di batii ba nietika ni disi di mma bamu suoto,

ku batikankotɛ lɛma ba ninfũ ni akakatɛ lɛma mankpee ni nɛ. Yila kɛɛkɛ

14 Bɛɛbla bɛɛta ma alɛ baakpi mansifi ɔkya kamɛ fɛle bafoso,

kukpi kafɔɔ makonko di suoto lɛma.

Batii ba di situ kamɛ lɛkpa ni male sɛka di suoto lɛma ku oyita;

suoto lɛma mabuu di ɔkya kamɛ,

mankpukiti di sika ayo kplɛ lɛma nwu suoto.

15 Kafɔɔ Yaa madiki nkpa nii ankyeko ɔkya kamɛ;

nwaako abakpaa mi ansifiko ɔkyɛ nɔɔ. Yila kɛɛkɛ

16 Tanyɛkɛ nse otii owo lekple saawɛntɛ,

nse leyo nɔɔ lɛlɛ diɛkyakaa;

17 diekye ɔlɔbayɔ lɛsalɛsaa asifiko nse eekpi,

lɛlɛ nɔɔ dilɔbasoo disifi ku nnwɔɔ.

18 Kuntɛ di obe wɔ aasiɛ ni nkpa aanya suoto nɔɔ fɛ otii wɔ beewii ni lɛyɔɔ-

batii kafɔɔ ntansa fɔ nse diɔlɛ fɔ ni-

19 abalaakyakaa di ote anɛ kɔna,

ɔlɔbasinya ni nkpa nwu lɛkpa diidii.

20 Otii wɔ nikpe ni lɛsaawɛ anaa ni lɛsɔnu

nte fɛle lepoo kamɛ babɔkɛɛ ba ninwɔɔ nii.