1 Bitansa Saate nwu.

Bipɛ Saate nwu sɛfa, diekye alɛ;

lɛbɔmbɔ nɔɔ nkpe dinaa ni kaloo.

2 Owe nimafuo lɛkya oyie di Saate nwu ablasaa kplɛ nwu suoto

ee aabuɛ katansa nɔɔ kamuu?

3 Suoto siyɔɔ mba ninka ni aaka di osuku kanya,

mambla ni nle ninlɛ ni obe lele.

4 O Saate, nyuma mi, nse foole batii lɛfɔ sibualɛ,

wa fabakyakaako mi nse foodiki ma,

5 alɛ kale mba feediki ni lɛsaawɛ,

alɛ kanyako kale lɛfɔ nwu suoto lɛyɔɔ nwu

ninkyakaa di atesaa lɛfɔ nwu ku katansa.

6 Buɔbla okpile, fɛ mmle bia di bate loo labla nii;

butalolaa buabla, buadiki kɔkpaa kpile kafɔɔ.

7 Obe wɔ di bate loo lawɛ ni di Egipte,

batabu disi di sɛkpɛ lɛfɔ se niabla ni ɔkpɛ suoto;

batanyuma sifutulɛ lɛfɔ nwu kpinwu,

ni baabla otokopĩ di lekpo katũ nɛ, Lekpo Sɛɛle nwu.

8 Kafɔɔ aadiki ma ta leyooto nɔɔ oso,

alɛ ɔɔta mantofo osie kplɛ nɔɔ nwu.

9 Aasĩ ɔlaa aata Lekpo Sɛɛle nwu, ni diasɔɔ nɛ;

aakpaa ma aafenko di nkyofokɔ nwu fɛ ɔfaafuu okle.

10 Aafũ ma aakyeko kyiditɛ nwu kɔnɛɛ;

aadiki ma aakyeko lo nwu kɔnɛɛ.

11 Ntu nwu latĩi balo lɛma;

kuonwii lɛma ditawɛ nkpa.

12 Ni baafũ ɔlaa nɔɔ wɔ aabuɛ aatɛ ni baanu

ni baasa katansa nɔɔ sinu nɛ.

13 Kafɔɔ ditaklɛ fiɛ baayee nle aabla ni

batasoko kafɔɔ lɛkakatɛ ɔta nɔɔ nwu.

14 Ni baasiɛ nkpa di dibiesaa lɛma kanya di ɔfaafuu nwu nɛ;

baasɔ Yaa baanyu di kasɔ fukuti nwu suoto.

15 Nioso aata ma nle baakaalɛ ni,

kafɔɔ aakyesee ofiɛ kpile onwii kaamɛ lɛma.

16 Di kasiɛkɔ nwu kamɛ baakpɛ sɛsɔfɔwo di Mose

ku Aron suoto, nnwɔ baakleklesa baata ni Saate nwu.

17 Ni di kasɔ nwu labɛ kanya kaamɛ Datan nɛ;

kaakookaa Abiram bakyakaakotɛ.

18 Ɔtɔ lamufũ di batikankotɛ lɛma kamɛ;

lɛfɛnku nwu lawɔɔsa bakpiletɛ nwu.

19 Baabla lɛnankyuebi di Horeb

ni baatɔ afiɔ ya baabla ni ku lɛbɔɔsaa nɛ.

20 Baakyɛlɛnsa Dibu lɛma

baafũ nankyue letembi le ninwee ni sɛfa.

21 Baayee Yaa wɔ niadiki ma nii,

nnwɔ niabla ni asaa laamulamu di Egipte,

22 asaa ya niabla ni ɔkpɛ di Ham kasɔ suoto

ku ablasaa yɛkɛle di Lekpo Sɛɛle katũ.

23 Nioso aabuɛ alɛ abawɔɔsa ma-

Mose, nnwɔ aadiki ni,

niataka aayila di anu nɔɔ

alɛ adiɛ ɔblɔ nɔɔ nwu aadiɛ ma ɔwɔɔsa.

24 Ninfɛ baasĩ kasɔ biene nwu nɛ;

batafũ ɔlaa obuɛ ɔtɛ nɔɔ nwu baanu.

25 Baakakakatɛ di akpaayo lɛma kamɛ

nioso batakyɔɔ Saate nwu ɔlaa kotoko.

26 Nioso aaka ntam aata ma ku kɔnɛɛ katoo ɔtakatɛ

alɛ abata ma mankpi di ɔfaafuu nwu,

27 aasamiisa ma aakpete di kasɔ nwu kamuu suoto

aata banantii lɛma lakpi di nnle nwu kamɛ.

28 Baayɔ suoto lɛma baatika di Baal suoto di Peor

baale oleɔta wɔ baata ni afiɔ ya di nkpa diesi ni kaamɛ;

29 baakpee Saate nwu ɔblɔ ku asaa kpile lɛma nwu sɛsaabla,

ni di ofiɛ kpile labuo kaamɛ lɛma nɛ.

30 Kafɔɔ Pinehas ladiki kɔkpaa di ɔlaa nwu suoto,

ni di ofiɛ kpile nwu lasifi nɛ.

31 Baayɔ dibu le mmle baatɔɔ fɛ ɔsaabla tinini

baata ana ya nimawa ni anaa ni kase.

32 Baakpee Saate nwu ɔblɔ di Meriba ntu katũ,

ni di Mose lawɛ ɔlaa ta mma oso nɛ;

33 diekye baataka baayila di Yaa Ninwuna suoto,

ni di sɛlaa se di Mose ditatɛ ni ladie di kanya nɔɔ nɛ.

34 Batawɔɔsa batii nwu

fɛ mmle di Saate nwu latɔkɔ ma nii,

35 kafɔɔ baakpɔtɔɔ ku nnle nwu

ni baatekete sɛsaabla lɛma nɛ.

36 Baatɔ afiɔ lɛma,

niabakple ni dikyĩ diata ma nii.

37 Baayɔ babisuɔtɔbi lɛma

ku babisankobi lɛma baata oleɔta baata anwuna kpile.

38 Baawii ntɔ be ninta kpi ni lɛpɔɔ kaasɔ,

babisuɔtɔbi ku babisankobi lɛma ntɔ,

mbe baata ni oleɔta baata ni Kanaan afiɔ,

baalalaasa kasɔ nwu kafɔɔ ku ntɔ lɛma.

39 Baakpɔnɔfɔsa suoto lɛma ku nle baabla nii;

ablasaa lɛma lata ma baakpee asɔnɔ di suoto lɛma kamɛ.

40 Nioso Saate nwu lanya ɔblɔ aakpee batii nɔɔ

ni di atesaa nɔɔ nwu lakpɛ nwɔ oyududu nɛ.

41 Ni aayɔ ma aakpee di nnle nwu nnɛɛ

ni di bakyiditɛ lɛma lale sɛka di suoto lɛma nɛ.

42 Balo lɛma lanyinka ma

baasiɛ ma di suoto ku osie lɛma.

43 Obe kpinwu kamɛ aadiki ma,

kafɔɔ baanwini di ɔtaka oyila suoto

ni baawɔɔ di sikpile lɛma kamɛ nɛ.

44 Kafɔɔ aatofo nimiina lɛma

di obe wɔ aanu ni kaku lɛma;

45 ta mma oso aanyuma kanya ninii nɔɔ nwu

ta lɛbɔmbɔ kplɛ nɔɔ oso aakyɛlɛnsa disibu.

46 Aata mba bamuu niamufũ ma ni sɛlanle

lanya ma nyaami.

47 O Saate Yaa loo, diki wo,

faasiisa wo fakyeko nnle kamɛ

alɛ buapɛ sɛfa di leyooto klekle lɛfɔ nwu suoto

ku dibu lɛfɔ nwu katansa.

48 Baatansa Saate nwu, Israel Yaa nwu,

diɛyɔ ni di nua diesifi ni dinaa ni kaloo.

Bita batii bamuu babuɛ alɛ, "Diwa kaaya!"

Bitansa Saate nwu.