1 Kamasa onu di Saate lɛbɔmbɔ kplɛ le ninaa ni kaloo suoto;

ku kanya nii kamata mantofo onukwale lɛfɔ diefe ni di ana nwu suoto.

2 Mabuɛ nlɛ lɛbɔmbɔ lɛfɔ n-yɛ kpinkpĩ dinaa ni kaloo,

alɛ fɛɛtɛ onukwale lɛfɔ nwu di osi omu.

3 Faabuɛ falɛ, "Ntoonii kanya ku nnwɔ lediki nii,

ntɔɔka ntam lɛta Dawid kpɛmblatɛ nii,

4 'Masiɛsa ɔnantii lɛfɔ di lekpomii dinaa ni kaloo

nta sɛka lɛfɔ kafɔɔ nyila kpinkpĩ diefe ni di ana amuu suoto.' " Yila kɛɛkɛ

5 O Saate, osi kɔtansa sɛkpɛ lɛfɔ se niɛbla ni ɔkpɛ,

onukwale lɛfɔ kafɔɔ di baklekletɛ dikudi nwu kamɛ.

6 Diekye owe ninkpe di kolo fanfa baayɔ mankaatɛɛsa ku Saate nwu?

Owe ninte fɛle Saate nwu di Yaa babisuɔtɔbi kamɛ?

7 Man-yɛkɛ Yaa osie kanya di baklekletɛ kasikɔ nwu kamɛ;

asi difu alenke bamuu ba niɛmana nwɔ beekyi nii.

8 O Saate Yaa wɔ Ninlenke ni, owe ninte fɛle afɔ?

O Saate, feemuɔ, onukwale lɛfɔ kafɔɔ lɛmana fɔ kuokyi.

9 Foole sɛka di lekpo le niɛyakayaka ni suoto;

nse diɛpɛ diɛtaka yi, fanta ninte kloklo.

10 Faabibiɛ Rahab fɛle nnwɔ beelo nii;

ku kɔnɛɛ lɛfɔ osie faasamiisa balo lɛfɔ. 11 Osi nwu ole fɔ kule, kale fɔ kafɔɔ di kasɔ nwu nle;

afɔ niabla kayi ku asaa ya amuu ninsi ka ni kaamɛ.

12 Afɔ niabla katoo ku kala;

Tabor ku Hermon kɔsa suoto lɛyɔɔ sinu di leyooto lɛfɔ suoto.

13 Bɛɛbla kɔnɛɛ lɛfɔ ku osie;

kɔnɛɛ lɛfɔ nkpe osie, koletanɛɛ lɛfɔ lɛtaka katoo.

14 Ɔsaabla tinini ku lɛka tinini ninle sɛka lɛfɔ lɛsɔse;

lɛbɔmbɔ ku onukwale n-le fɔ katũ.

15 Suoto siyɔɔ mba nin-ye alɛ baatansa fɔ ni,

O Saate, mankyɛ ni di lɛkpa lɛfɔ kamɛ di anu lɛfɔ.

16 Man-nya suoto lɛyɔɔ di leyooto lɛfɔ kamɛ dii kufĩ kumu;

mampɔ di ɔsaabla tinini lɛfɔ kamɛ.

17 Diekye afɔ ninle ma lɛkpa ku osie,

di sibualɛ lɛfɔ kanya fɛɛtakatɛsa lɛkya loo katoo.

18 Nwaako, kubidifunsaa loo ninle Saate nwu lele,

ɔka loo ɛɛta ni Israel Klekletɛ nwu.

19 Obe onwii faakakatɛ di odiki otuo kamɛ,

faata banukwaletɛ lɛfɔ falɛ;

"Ntɔɔyɔ osie lɛta kpɛtɛ siene;

ntɔɔtakatɛsa okosopo onwii katoo di batii nwu kamɛ.

20 Ntɔɔwɛ Dawid kpɛmblatɛ nii;

lɛpɛ nwɔ ɔfɔɔ ku nnɔnyi klekle nii.

21 Kɔnɛɛ nii kamanyu nwɔ;

nwaako kɔnɛɛ nii kamakpee nwɔ osie.

22 Lo kuonwii dilɔbayila nwɔ di suoto;

kpiletɛ kuonwii dilɔbanyinka nwɔ.

23 Kamabibiɛ balo nɔɔ di anu nɔɔ

ampɛ bakyiditɛ nɔɔ antɛ kaasɔ.

24 Onukwale lɛbɔmbɔ nii masiɛko nwɔ,

diefe ni di leyooto nii kamɛ kafɔɔ, babatakatɛsa lɛkya nɔɔ katoo.

25 Kamayɔ kɔnɛɛ nɔɔ ntika di lekpo osi,

koletanɛɛ nɔɔ di sekle osi.

26 Abalɛɛ mi alɛ, 'Teemi fale,

Yaa nii, Difuɔnkpaa nwu Dikitɛ nii.'

27 Kamabla nwɔ obi nii kasale,

nnwɔ babatakatɛsa ni katoo manlenkee ni baka di kasɔ nwu suoto.

28 Kamayɔ lɛbɔmbɔ nii ntika nwɔ di suoto dinaa ni kaloo,

kanya ninii nii ku nnwɔɔ dilɔbalalaa diidii.

29 Kamatɛ banantii nɔɔ dinaa ni kaloo,

sɛka nɔɔ ole di osi lɛnya kukpe ni okpe.

30 "Nse babisuɔtɔbi nɔɔ lesĩ kufiofa nii,

manantikanko sisuku nii,

31 nse bɛɛwaala ɔsaabla nii

beesĩ kafɔɔ asaa otuo nii,

32 kamananfi sikpile lɛma kootoko ku lɛbɔɔsaa,

ɔtanlolaa ɔbla lɛma ku lɛpɛ;

33 kafɔɔ namadiki lɛbɔmbɔ nii di ɔkyɛ nɔɔ,

ee nsĩ onukwale nii diidii.

34 Namawaalɛ kanya ninii nii

ee nkyɛlɛnsa nnwɔ di anyasibi nii labuɛ nii.

35 Ntɔɔka ntam ninwii di lɛklekle nii kanya-

namalaa kafɔɔ nta Dawid-

36 alɛ banantii nɔɔ makpɛ dinaa ni kaloo

sɛka nɔɔ ole kafɔɔ nte di anu nii fɛle kufĩ;

37 babase sĩ dinaa ni kaloo fɛle kɔwɛntɛ,

onukwale kamaayilatɛ di kolo." Yila kɛɛkɛ

38 Kafɔɔ feesĩ, feediɛ nwɔ nnɛɛ,

fɛɛnya ɔblɔ osie kanya ku nnwɔ fɛɛpɛ ni ɔfɔɔ lɛfɔ.

39 Fatɔɔlalaasa kanya ninii nwu ku kpɛmblatɛ lɛfɔ

fɛɛkpɔnɔfɔsa lɛkakoto nɔɔ nwu di kudu kamɛ.

40 Fatoobiɛ feefe di seyoyiɛ nɔɔ simuu kamɛ

fɛɛtɛ kafɔɔ kɔba siene nɔɔ kaasɔ kuɔwɔɔ.

41 Mba bamuu ninfe ni ninfa n-yɔ nwɔ asaa;

atookple lɛmansaa ɛɛta bawo nɔɔ.

42 Fatɔɔtakatɛsa bakyiditɛ nɔɔ koletanɛɛ katoo;

fɛɛta suoto kɔyɔɔ balo nɔɔ bamuu.

43 Fatoomunikĩisa kapamii nɔɔ nwu sɛmaa

fatakyakaako nwɔ kafɔɔ di kakpɛ kamɛ.

44 Fatɔɔta sɛlɛ nɔɔ ntoose

fɛɛtɛ kafɔɔ sɛka nɔɔ kaasɔ.

45 Feebudi sekosopo nɔɔ ayi kakuu;

feetĩi nwɔ ku sinunsɔ katĩita. Yila kɛɛkɛ

46 O Saate, ɔmɛmbe? Fabawofasa suoto lɛfɔ dinaa ni kaloo?

Ɔmɛmbe di ɔblɔ lɛfɔ nwu kamafiɛ fɛle ɔtɔ kunse?

47 Nyuma mmle di nkpa nii nle ni kakuu.

Diekye di mmle faabla ni batii bamuu kasakasa!

48 Ɔmɛntii nimafuo osiɛ alɛ ɔlɔbanya kukpi,

ee andiki suoto nɔɔ ankyeko ɔkya osie nnɛɛ? Yila kɛɛkɛ

49 O Saate, ɔfɛ di lɛbɔmbɔ kplɛ kofole lɛfɔ nwu nkpe,

ninle ni onukwale lɛfɔ nwu faaka ni ntam faata ni Dawid?

50 Saate, nyuma mmle batɔɔma ni kpɛmblatɛ lɛfɔ,

mmle lefũ ni atufa di nnle mmuu ɔkyɛ di otu nii kamɛ,

51 O Saate, atufa ku mmle di balo lɛfɔ lama ni,

ku mmle baama ni nnwɔ faapɛ ni ɔfɔɔ lɛfɔ di lɛkpaakyala biala aadiki ni suoto.

52 Baatansa Saate nwu dinaa ni kaloo!

Diwa kaanya, diɛwa kaaya.