1 O ɔkla nii, tansa Saate nwu.

O Saate Yaa nii, fɛɛtɛ feemuɔ;

fɛɛkpa dibu ku sɛka ole.

2 Fɛɛkpa lɛkpa fɛ dibula;

anfukuti osi fɛle lɛkpaayo

3 feese osi ayo lɛfɔ akpaka di ntu suoto.

An-yɔ alokonkyɛ ambla keke nɔɔ wɔ di bapɔnkɔ nnanfi nii

ansiɛ kafɔɔ di kɔfɛɛfɔ nwu afoko suoto.

4 An-yɔ kɔfɛɛfɔ ambla batɔkyɛntɛ nɔɔ,

ɔtɔ sɛkplalomii kafɔɔ ambla bakpɛmblatɛ nɔɔ.

5 Ɛɛtɛ kasɔ di asɔse nika suoto;

blaafuo ka ɔkpa diidii.

6 Feetĩi ka ku nkyofokɔ nwu fɛ dibula;

ntu nwu lataka katoo dialenkee abokote nwu.

7 Kafɔɔ di ɔlaa lɛfɔ osĩ ɔta kamɛ yi, ntu nwu latoso,

di kanto dikpududuu lɛfɔ sɛlɔ kamɛ diakpukuti diasifi;

8 diabiɛ diafe di abokote nsintɛɛ,

diafe diabuo di sɛtaata nwu kamɛ,

di lɛba le faata mi nii.

9 Fɛɛtɛ kɔmɛ ko di ntu nwu dilɔbafuo ni ɔwaalɛ;

dilɔbasinkple diyii kasɔ nwu diidii.

10 Anta ntu ntaakɔ mbiɛ nimbuo di awɛ kamɛ;

nimbiɛ ninfe di abokote sebo.

11 Manta lepoo kamɛ babɔkɛɛ bamuu ntu;

bakuɔ nlo otukɔnsɔ lɛma.

12 Bakansiɛ di kɔfɛɛfɔ nloso ayo di ntu nwu ɔlɔɔkɔ;

mansa sinu di sewosola nwu kamɛ.

13 Ankpete abokote nwu ntu ankyeko ayo nɔɔ di osi;

kasɔ ntoomiɛ ku ɔkpɛ nɔɔ ɔsaabla.

14 Anta sɛfa nyie sinta banankyue,

ku alesaa kubi alɛ batii bakpɛ afe-

anta alesaa ankyeko kasɔ nwu:

15 nta be ninta suoto n-yɔɔ ni otii otu,

nnɔnyi be ninta ni anu nɔɔ nsesee nii,

ku alesaa ya nikaklee ni otu nɔɔ.

16 Bookpete Saate nwu awoso ntu nwaa,

Lebanon baseda ba aasɔ nii.

17 Nfa di bakansiɛ mbla ayo lɛma nɛ;

nkyɛnyi mbla ayo ninya di ɛfram awoso kamɛ.

18 Abokote takale nle lepoo kamɛ batie ale;

afuɔ sɛkyɛɛfɛ nle katanikokɔ ɛɛta basaafɔ.

19 Kɔwɛntɛ ntɛ obe nsũ,

kufĩ kafɔɔ ntofo obe wɔ kubamɛɛ nii.

20 Fanwako ditunu, nimakple kakyɛ,

ni di lepoo kamɛ babɔkɛɛ bamuu ndie mankyi nɛ.

21 Bakyata nkumii diɛta ni babɔkɛɛ omufũ lɛma

mamiɛ alesaa lɛma mankyeko Yaa nfũ.

22 Nse kufĩ letũ, mampɛ mankple;

mansifi manaate di ayo lɛma.

23 Nse otii ntoodie eefe ɔkpɛ nɔɔ kamɛ,

anaabla ɔkpɛ nɔɔ anaase di kɔtɔɔfɔ.

24 O Saate, sɛkpɛ lɛfɔ mpɔ lo!

Di ninumbe kanya fɛɛbla nya amuu;

kasɔ leyii ku ɔsaabla lɛfɔ.

25 Lekpo nte ninfa, diemuɔ diɛblɛfɛ kafɔɔ,

dieyii ku asaa ya manaafuo ni ɔka-

asaa ya ninkpe ni nkpa, akplɛ ku abiibii.

26 Nfa di seklo nkyɛ sinkple nɛ,

ku lefiatan* wɔ faabla falɛ akpee ni kɔkyɔ ninfa.

27 N-ya mmle amuu konyu fɔ di anu

alɛ ta ma alesaa lɛma di obe nwaa kamɛ.

28 Nse fɛɛyɔ nya fɛɛta ma,

mansiisa nya;

nse feefukuti kɔnɛɛ lɛfɔ,

ammiɛsa ma ku asaa biene.

29 Nse feewofasa anu lɛfɔ,

difu mpɛ ma;

nse feediki ninwuna lɛma,

mankpi mankple masifi kudu kamɛ.

30 Nse feekyesee Ninwuna lɛfɔ,

mambla nkpa bale,

fanse kasɔ anu kafɔɔ lɛbla.

31 Saate nwu lɛkpa diwɛ dinaa ni kaloo;

Saate nwu anya suoto lɛyɔɔ di sɛkpɛ nɔɔ kamɛ-

32 nnwɔ ninyu ni kasɔ, kantũkũ ni,

ankpanko ni abokote, andie ni kɔyɔ.

33 Kamasa sinu nta Saate nwu di nkpa nii mmuu kamɛ;

kamasa katansa sinu nta Yaa nii di obe wɔ nsi ni nkpa.

34 Ta disi nii obu ditoobuo nwɔ anu,

fɛ mmle kɔnya ni suoto lɛyɔɔ di Saate nwu kamɛ.

35 Kafɔɔ ta bakpileblatɛ bayɛ di kasɔ nwu suoto

bakpiletɛ kafɔɔ batasinwɛ.

Tansa Saate nwu, O ɔkla nii.

Tansa Saate nwu.