1 O Saate, osie nii, mbɔmbɔ fɔ.

2 Saate nwu ninle mi difuɔnkpaa, kɔba nii ku dikitɛ nii;

Yaa nii ninle mi difuɔnkpaa, nnwɔɔ nintaniko nɛ.

Nnwɔɔ ninle mi kubidifunsaa ku didiki nii lɛkya ku sientɛ nii.

3 Lɛlɛɛ Saate nwu, nnwɔ di katansa lesiɛko nii,

ni eediki mi di balo nii nnɛɛ nɛ.

4 Kukpi sikũ lemimini mi;

ntu siene ninlalasa ni asaa lekpee mi difu.

5 Ɔkya sikũ lemimini mi siekyi;

kukpi sikũ lediekoe.

6 Di nimiina nii kamɛ lalɛɛ Saate nwu;

lawi lalɛɛ Yaa nlɛ akyakaakoe.

Aanu mi sɛlɔ di olekatakɔ nɔɔ kamɛ;

lɛfaa nii lakyɛ ɔkyɛ nɔɔ, diabuo di atoko nɔɔ kamɛ.

7 Kasɔ lakpanko suoto, kaatũkũ kafɔɔ,

abokote nyilakɔ kafɔɔ latũkũ;

aakpanko suoto diekye ɔblɔ lafiɛ nwɔ.

8 Kɔyɔ ladie di anwunfie nɔɔ;

ɔtɔ wɔ ninfiɛ ni asaa ladie di kanya nɔɔ,

atɔkɔnii bembe ladie aakye ka kamɛ.

9 Aabonsa osi, aasoo aawa kasɔ;

ditunu alokonkyɛ lawɛ di nkpaasɔ nɔɔ.

10 Aasiɛ di Kerubim suoto aaflɛlɛtɛ;

kɔfɛɛfɔ lafɛ nwɔ kuasifoko fɛle mmle di kansiɛ nflɛlɛtɛ nii.

11 Aayɔ ditunu akpanta aatĩi suoto fɛle

kanto ditunu alokonkyɛ di kolo.

12 Di lɛkpa nwu di anu nɔɔ yi,

atubɔkanii ku atɔkɔnii ladie aakye alokonkyɛ kamɛ.

13 Saate nwu ladiki kanya di osi;

ni di Nnwɔ Niɛtaka Katoo Alenke ni sɛlɔ ladie nɛ.

14 Aataa kɔtaa nɔɔ aasamiisa balo nwu,

aata ɔtɔ lamumuna kuakpɔkpɔtɔsa ma.

15 Lekpo kalɔ sisuku ladie siate

kayi ka mmle asɔse kafɔɔ late temple,

O Saate, di ɔlaa lɛfɔ osĩ ɔta kanya,

di anwunfie lɛfɔ ninwuna hɛɛhɛɛ kamɛ.

16 Aakyɔɔ kɔnɛɛ kuakye katoo kuabamufũ mi;

aananfi mi aadiki di ntu kpinwu kamɛ.

17 Aadiki mi aakyeko balo nii siene nnɛɛ,

ku bakyiditɛ nii nnɛɛ, diekye baawɛ osie baalenkee mi.

18 Baadieko mi di dii le di ɔlaa latũ mi nii,

kafɔɔ Saate nwu niale mi kamaayilatɛ.

19 Aakpaa mi aawako lɛba le niɛblɛfɛ nii,

aadiki mi, diekye ɔsaabla nii labuo nwɔ anu.

20 Saate nwu lɛbla dibiene ɛɛtɛɛ di ɔsaabla tinini nii kanya;

eediki mi ɛɛtɛɛ letota ta mmle di nnɛɛ nii leklekle ni oso.

21 Diekye lelolaa nkyɛ di Saate nwu sisuku,

ntabla okpile nkyi di Yaa nii kamaa.

22 Afiofa nɔɔ amuu nte di anu nii;

nindiɛ ɔkyɛ di sisuku nɔɔ suoto.

23 Aanyako mi ɔlaa kuonwii di anu nɔɔ,

lɛblasa suoto nii di sikpile ɔbla suoto.

24 Saate nwu lɛtɛɛ koto ta ɔsaabla tinini oso,

ta mmle di nnɛɛ ni leklele ni di anu nɔɔ oso.

25 Mba ninle ni onukwale fandiki onukwale lɛfɔ fantuo ma,

mba suoto di ole nnaa nii, faatuo falɛ banaa ole kuonwii,

26 suoto lɛfɔ lɛkpa kɔmɛ di mba suoto niɛkpa ni kɔmɛ suoto,

kafɔɔ feetuo nkpa biene mba ninante ni tinini.

27 Afɔ nindiki batii ba niɛwakosa ni suoto kasɔ

kafɔɔ fanwakosa mba nintakatɛsa ni suoto katoo kasɔ.

28 O Saate, afɔ ninta alɛ kandiɛ nii ninnii;

Yaa nii lemunikĩisa ditunu nii ɛɛbla lɛkpa.

29 Ku lɛkyakaako lɛfɔ mafuo bakpɛtɛ dikudi olenkee;

ku Yaa nii lɛkyakaako mafuo oyoyiɛ oyefe.

30 Yaa nnwɔɔ, osuku nɔɔ lewo nimu;

Saate nwu ɔlaa lɛkpa kamɛ.

Kubidifunsaa ale ata

batii ba bamuu niɛtaniko nwɔ nii.

31 Diekye owe ninle Yaa di Saate nwu kamaa?

Owe kafɔɔ ninle Difuɔnkpaa nwu alenkee Yaa loo?

32 Yaa wɔ niminisa mi ni akpɛsaa ku osie,

anta osuku nii kafɔɔ nkpa ni kamɛ.

33 Ɛɛbla nkpaa nii fɛle kafɛ̀ nle;

ɛɛyɔ mi eese di katakalekɔ ka ninlɛ nii.

34 Eetuo nnɛɛ nii kakpɛ ɔkpɛ;

alɛ nnɛɛ nii kafuo abɔɔsaa kɔtaa obonsa.

35 Fɛɛyɔ kubidifunsaa lɛfɔ lelenkee fɛɛtɛɛ,

koletanɛɛ lɛfɔ kafɔɔ lemufũ mi kukle;

afɔ niɛtɛɛ lɛtaka katoo.

36 Fɛɛblɛfɛɛsa lɛba fɛɛta nkpaa nii kasekɔ,

mmle di nkpaa nii dilaafɛntɛ nii.

37 Lati balo nii lalaawɛ ma;

ntakple nkpaamaa dialaase di obe wɔ lawɔɔsa ma nii.

38 Labibiɛ ma di mmle manasinfuo ni ɔtaka;

baanɔɔ di nkpaa nii kalɔ.

39 Faayɔ osie faaminisa mi faata kakpɛ;

faata mba nin-yɛ ni di suoto nii lakpee asi kaasɔ di nkpaatũ nii.

40 Faata balo nii lamunikĩisa mmaa lɛma baatɛɛ,

ni lawɔɔsa bakyiditɛ nii nɛ.

41 Baawi kaku alɛ bakyakaako ma, kafɔɔ kuonwii ditawɛ abafũ ma nii-

baalɛɛ Saate nwu, kafɔɔ atakpee ma kanya.

42 Latutufu ma fɛ kudu di kɔfɛɛfɔ kamɛ;

lanyɛɛnɛ ma lawii di akpaka fɛle kɔtɛ.

43 Fatoodiki mi di batii ba nindieko mi ni nnɛɛ;

fɛɛyɔ mi fɛɛbla nnle disi;

batii ba ninan-ye ni, nfɛ ninsi kaalɔ nii.

44 Nse beenu onu ɔlaa nii, mankyɔɔ mi atoko;

bafɔɔ nwakasɔ di anu nii.

45 Bamuu lɛma situ kobiɛ;

beekye nwofakɔ lɛma bɔɔwa ku ditũtũkũ.

46 Saate nwu nkpe nkpa! Bitansa Difuɔnkpaa nii nwu!

Katoo ɔtakatɛ ninle Dikitɛ nii Yaa lele!

47 Ale Yaa wɔ nimbla ankyisa ni atɛɛ,

nnwɔ ninwakosa ni nnle kasɔ di kalɔ nii,

48 nnwɔ nindiki mi ni di balo nii nnɛɛ.

Fantakatɛsa mi katoo fanlenkee bakyiditɛ nii;

fandiki mi fankyeko amumu batii nnɛɛ.

49 O Saate, nioso kamatansa fɔ di nnle kamɛ;

kamasa sinu ntansa leyooto lɛfɔ.

50 Anta ɔka nɔɔ lelenkee kplɛ;

ambla sifutulɛ nɔɔ se ninaa ni kaloo anta nnwɔ ɛɛpɛ ni ɔfɔɔ,

ambla anta Dawid ku banantii nɔɔ dinaa ni kaloo.