1 O Yaa, kyɔɔ ɔlaa ɔpɛ nii atoko,

tansĩ lekoto otikiti nii;

2 nu mi ɔlaa faatuna fatɛɛ kafɔɔ.

Asibu nii kokpee mi kubuɛ ntɔɔkpɔkpɔtɔ kafɔɔ

3 ta balo sɛlɔ nwu oso,

ta mmle di bakpiletɛ nwu konyu ni oso;

diekye beetika dibuo di suoto nii

beekyidi mi di ɔblɔ lɛma kamɛ.

4 Otu nii nsi di dibuo kamɛ, kaamɛ nii;

kukpi difu ntoodieko mi.

5 Lɛyɛkɛ ku ditũtũkũ ntoomufũ mi;

difu ntoolenkee mi nnɛɛ.

6 Labuɛ nlɛ, "O, nse fɛ nkpe ablonuma afoko yi!

Ntabaflɛlɛtɛ nsifi nnaatɛ ɔnyɛɛ-

7 ntabaflɛlɛtɛ nsifi fanfa

nnaasiɛ di ɔfaafuu; Yila kɛɛkɛ

8 ntabapɛsɛwa nsifi kawofakɔ nii,

fanfa di kakitikɔ ku afɛɛfɔ kanya."

9 O Saate, lalaasa bakpiletɛ asibu, faakpɔkpɔtɔsa lɛkakatɛ lɛma,

diekye kɔnya amumu ku dibuɛkpee di okpoo nwu kamɛ.

10 Bookyi siyoyiɛ ninwu kakũ ku kakyɛ;

apilansaa ku amumu nsinwu kaamɛ.

11 Kasaalaasa kɔbla ɔkpɛ di okpoo nwu;

afunaa ku sɛlaa ku afunu dilɔbadie di akpaka ninwu.

12 Nse fɛ lo nikotufa mi,

dilaabuo mi suoto;

nse kyiditɛ nii nikoyiyie ankpee mi,

ntabafuo nwɔ owofa.

13 Kafɔɔ afɔ, otii fɛle ami okle,

oklopo nii, siɛwo nii kpankpa,

14 ku nnwɔɔ botoodinya ni suoto lɛyɔɔ nwaa

fɛ mmle munkyɛ ni ku dikudi di Yaa leyo.

15 Ta kukpi kufua balo nii;

ta ma basifi ɔkya kamɛ ku nkpa,

diekye okpile nwɛ kasiɛkɔ kaamɛ lɛma.

16 Kafɔɔ lalɛɛ Yaa,

ni di Saate nwu lediki mi nɛ.

17 Olesɛ ku kakũ ku kɔtɔɔfɔ

lawi ku sɛnyaami,

ni aanu mi sɛlɔ nɛ.

18 Aadiki mi di lɛsalɛsaa ditabla mi ni

aakyeko kakpɛ ka baakpɛko mi nii,

nu di batii kpinwu layila mi di suoto.

19 Yaa wɔ ninsi ni di lɛkakpomii dinaa ni kaloo,

manuko ma ankpɛko ma- Yila kɛɛkɛ

batii ba ninankyi ni diidii di sisuku lɛma suoto

manan-yɛkɛ ni Yaa.

20 Oklopo nii ndieko basiɛwo nɔɔ;

ansĩ kanya ninii nɔɔ.

21 Lɛkakatɛ nɔɔ lɛkylɔkylɔ fɛ lɛla,

kafɔɔ kakpɛ nsi di otu nɔɔ kamɛ;

sɛlaa nɔɔ lɛblɔblɔ silenke nnɔnyi,

kafɔɔ mpamii be bɛɛbɔkɛtɛ ni sile.

22 Yɔ atoo lɛfɔ fatika di Saate nwu suoto

ni abanyu fɔ;

ɔlɔbata tininitɛ anɔɔ.

23 O Yaa, kafɔɔ afɔ fabawakosa bakpiletɛ nwu kasɔ

di kalalaa dibiɔ nwu kamɛ;

mba nin-wii ni ntɔ ku balaatɛ

dilɔbasiɛ kayi lɛma nkpa kakyɛ.

Kafɔɔ ami, letika fɔ disi.