1 O Saate, Difuɔnkpaa nii, afɔ kɔlɛɛ nɛ;

tansĩ mi kotoko ɔkyɔɔ.

Diekye nse feelo kanana,

kamate fɛle batii ba nintoosifi ni dibiɔ kamɛ.

2 Nu mi kaku faanyɛɛ nyaami

di obe wɔ kɔlɛɛ fɔ nkaalɛ ni lɛkyakaako,

di obe wɔ lɛtakatɛsa ni nnɛɛ nii katoo

lɛkyɔɔ ni Kakleklekɔ kaamɛ Kaakleklekɔ Lɛba lɛfɔ nwu.

3 Tan-yɔ mi faakpɔtɔɔsa ku bakpiletɛ

ku mba nikole ni sikpile suoto,

mankakatɛko ni bawo lɛma ku sɛlɔ buɛɛ

kafɔɔ beesiisa ni amumu ɔbla di situ lɛma kamɛ.

4 Ta ma sɛsaabla lɛma koto

ku ɔkpɛ kpile lɛma nwu;

ta ma koto di lɛsaa le di nnɛɛ lɛma lɛbla ni;

faakplesa nle niesiɛko ma ni fawako suoto lɛma.

5 Diekye blɔɔyɔ dibu bata Saate nwu sɛkpɛ,

ku nle di nnɛɛ nɔɔ lɛbla nii,

ababɛbɛɛ ma antɛ kaasɔ

ɔlɔbasinta ma bakple bataka kafɔɔ diidii.

6 Baatansa Saate nwu,

diekye atoonu mi kaku, ɛɛnyɛɛ nyaami.

7 Saate nwu ninle mi osie ku kubidifunsaa;

otu nii letika nwɔ disi, ni ɛɛkyakaakoe nɛ.

Otu nii nnya suoto lɛyɔɔ

mayɔ sinu kafɔɔ mpɛ nwɔ sɛfa.

8 Saate nwu ninle batii nɔɔ osie,

katanikokɔ didiki ɛɛta nnwɔ ɛɛpɛ ni ɔfɔɔ.

9 Diki batii lɛfɔ, faawii atesaa lɛfɔ lɛyɔɔ;

le kpatɛ lɛma, faaklee ma dinaa ni kaloo.