1 O Saate, Yaa wɔ nindiki ni batii,

kakũ ku kakyɛ nwi di anu lɛfɔ.

2 Ta ɔlaa nii ɔpɛ kuwa anu lɛfɔ;

munikĩisa kotoko lɛfɔ fakyɔɔ kaku nii.

3 Diekye ɔkla nii leyii ku nimiina

nkpa nii kafɔɔ kɔtɛɛtɛɛ ɔkya.

4 Bɛɛka mi beekpee di mba nikofe ni dibiɔ kamɛ;

nte fɛle otii wɔ ninaa ni osie.

5 Batoodiɛ mi di bakpi kamɛ,

fɛle mba beelo ni bate ni di ɔkya kamɛ,

fonoosinyuma ma nii,

batoodiki ma ni di nnɛɛ lɛfɔ.

6 Fatɔɔyɔ mi fɛɛtɛ di dibiɔ lɛkɛtɛɛ kamɛ,

di kakyofokɔ tunutunu kamɛ.

7 Ɔblɔ lɛfɔ ntika mi di suoto ku onutũ;

fatɔɔta ntu lɛfɔ nwu nikɔkpɛ ni lelenkee mi nnɛɛ. Yila kɛɛkɛ

8 Fatɔɔkpaa mi feekyeko basiɛwo nii ba niɛtɛ bɛɛkaako mi nii

fɛɛbla mi kafɔɔ diyududusaa fɛɛta ma.

Ntɔɔka, ninamasinfuo otoso kafɔɔ;

9 anu nii nte tutufuu ku sɛnyaami.

10 Bakpi fantuo sɛkpɛ lɛfɔ se niɛbla ni ɔkpɛ?

Mba nintookpi ni ntaka mantansa fɔ? Yila kɛɛkɛ

11 Mandiki lɛbɔmbɔ lɛfɔ mambuɛ di ɔkya kamɛ,

onukwale lɛfɔ di Kawɔɔ kamɛ?

12 Baye sɛkpɛ lɛfɔ se niɛbla ni ɔkpɛ di lɛba le ninle ni ditunu,

ee kasɔ ka batooyee ni sɛsaabla tinini lɛfɔ nwu?

13 O Saate, lawi lalɛɛ fɔ diɛta ni lɛkyakaako;

ɔlaa nii ɔpɛ nwa anu lɛfɔ.

14 O Saate, obe oso foosĩ mi

foowofasa anu lɛfɔ kafɔɔ di suoto nii?

15 Diayɔ di sekosopo nii obe kamɛ diobu mi, ntɔɔtɛɛtɛɛ kukpi kafɔɔ;

ditoobuo mi ku difu lɛfɔ nwu, nnɛɛ toofee mi kafɔɔ.

16 Ɔblɔ lɛfɔ nwu ntoofiɛ mi kuofe;

difu lɛfɔ nwu ntɔɔwɔɔsa mi.

17 Bɛɛmana mi beekyi dii kufĩ kumu fɛle ntu nieyii;

batootĩi mi fɛɛ.

18 Fatɔɔkpaa baklopo ku babɔmbɔtɛ nii di suoto nii;

ditunu nwu ninle siɛwo nii bɔmbɔtɛ nɛ.