1 Tanta diabuo fɔ suoto ta batii kpile oso

ee anu lasɛɛ fɔ di mba nikole ni sikpile suoto;

2 diekye bate fɛle sɛfa, nunua babakyako ɔyɔɔ,

bate fɛle sɛfa kɔnle, nunua babakpi mansifi.

3 Tika disi di Saate nwu suoto, faabla kafɔɔ dibiene;

siɛ di kasɔ nwu suoto, fanya suoto lɛyɔɔ.

4 Ta suoto siyɔɔ fɔ di Saate nwu kamɛ,

ni abata fɔ otu lɛfɔ kamɛ dibiesaa.

5 Yɔ osuku lɛfɔ fakpee di Saate nwu nnɛɛ;

tika nwɔ disi, ni ababla nle mmle kafɔɔ:

6 Abata ɔsaabla tinini lɛfɔ nkpa fɛle kolesɛtũ,

lɛbɛ lɛfɔ mate fɛle kakũ kufĩ.

7 Lo kanana di Saate nwu anu, faatɛ suoto fasoko nwɔ;

tanta diabuo fɔ suoto nse asaa kɔlɛ ɔkyɛ anta batii di sisuku lɛma suoto,

nse bɔɔbla nya di asibu kpile lɛma nwu suoto.

8 Diɛ anu ɔkatu, faadiɛ kafɔɔ ɔblɔ ɔnya;

tanta diabuo fɔ suoto- okpile ɔbla kamɛ ko dibakpaa fɔ ninkpee.

9 Diekye babawɔɔsa batii kpile,

kafɔɔ mba nikonyu ni Saate nwu osuku kamale kasɔ nwu atesaa.

10 Diebu kɛɛkɛɛ ko, bakpiletɛ nwu dilɔbasinwɛ;

kuntɛ foowolaa ma, flɔbasinnya ma.

11 Kafɔɔ batii buɛɛ kamale kasɔ nwu atesaa

mansiɛ di atoko ɔkyɛ ole kplɛ kamɛ kafɔɔ.

12 Bakpiletɛ nkpee asi baawo di batininitɛ suoto

manwee anyɛɛ lɛma mankpee ma kafɔɔ;

13 kafɔɔ Saate nwu mma bakpiletɛ,

diekye aye alɛ dii lɛma kɔwa.

14 Bakpiletɛ nwu nnanfi kapamii

mambonsa kafɔɔ kɔtaa

manwakosa bapiitɛ ku mba diefĩ ni kasɔ,

manlo mba di sisuku lɛma nte ni tinini.

15 Kafɔɔ mpamii lɛma kamatofo di mma bamu situ,

manfefee kafɔɔ ataa lɛma nwu.

16 Kɛɛkɛɛ wɔ ninkpe ni tininitɛ nlɛ

dilenke lɛsaawɛ le ninkpe ni bakpiletɛ kpinwu;

17 diekye babafefe bakpiletɛ osie nwu,

kafɔɔ Saate nwu mmufũ batininitɛ anklee.

18 Saate nwu n-ye mba ninnaa ni ole kuonwii ayi,

atesaa lɛma kafɔɔ kamawɛ dinaa ni kaloo.

19 Blɔbayɔɔ di obe kpile kamɛ;

babawɛ alesaa kpinwu di kɔka ɔkpɛbee kamɛ.

20 Kafɔɔ bakpiletɛ kamawɔɔ:

Saate nwu balo kamate fɛle sɛfa bokoboko sɛlɛ di afe,

babayɛ-man-yɛ fɛle kɔyɔ.

21 Bakpiletɛ nfɛnsa asaa kafɔɔ mansinkplesa baata,

kafɔɔ batininitɛ nta asaa ku suoto lɛyɔɔ;

22 batii ba di Saate nwu lewii ni lɛyɔɔ kamale kasɔ nwu atesaa,

kafɔɔ babawɔɔsa mba ɛɛkpaani nii.

23 Nse suoto lɛyɔɔ Saate nwu di otii lɛkyɛmbi kamɛ yi,

anta nkpaa nɔɔ nyila kpinkpĩ;

24 kuntɛ eetuula, ɔlɔbanɔɔ,

diekye Saate nwu mmufũ nwɔ ku kɔnɛɛ nɔɔ.

25 Lale obisɔ kafɔɔ nunua ntoobe,

kafɔɔ ninnya diidii alɛ beediɛ tininitɛ nnɛɛ

ee babi lɛma kɔnyanyi alesaa.

26 Manta asaa obe lele, manfɛnsa manta batii kafɔɔ ku otu;

babawii babi lɛma lɛyɔɔ.

27 Diɛ sikpile ɔbla, faabla dibiene;

ni fabasiɛ di kasɔ nwu suoto dinaa ni kaloo.

28 Diekye Saate nwu mbɔmbɔ ɔlaa wɔ ninte ni nkpo

nioso ɔlɔbadiɛ banukwaletɛ nɔɔ nnɛɛ.

Babalolaa ma mannyu dinaa ni kaloo,

kafɔɔ babawɔɔsa bakpiletɛ babi;

29 batininitɛ kamale kasɔ nwu atesaa

mansiɛ ninka suoto dinaa ni kaloo.

30 Otii tinini kanya mbuɛ ninumbe ɔlaa,

ɔkplalomii nɔɔ kafɔɔ nkakatɛ ɔlaa wɔ ninte ni nkpo.

31 Yaa nɔɔ kufiofa nwu nsi di otu nɔɔ kamɛ;

nkpaa nɔɔ ninfɛntɛ.

32 Bakpiletɛ nte mansoko batininitɛ,

mamiɛ alɛ boolo ma;

33 kafɔɔ Saate nwu dilɔbadiɛ ma ata osie lɛma nwu

ee ata ma balo ma lɛpɔɔ nse bɛɛkpaa ma kakankɔ.

34 Soko Saate nwu

faakyɛ di osuku nɔɔ kafɔɔ.

Ni abatakatɛsa fɔ katoo anta fanle kasɔ nwu atesaa;

fabanya nse batɔɔwɔɔsa bakpiletɛ nwu.

35 Ntɔɔnya kpiletɛ ku amumu otii nwu

ɔɔlɛ ni fɛle kowoso kɔnle di okpoo nikũ kɔtɛ suoto,

36 kafɔɔ kanunua abafe, ɔlɔbasinwɛ;

kuntɛ lewolaa nwɔ yi, namasinnyɔɔ.

37 Tɛ otii wɔ ninaa ni ole kuonwii nsũ, faanyu tininitɛ nwu;

diekye dii kaamaa malɛ ninta atoko ɔkyɛ ole otii nwu.

38 Kafɔɔ babawɔɔsa bakpileblatɛ bamuu;

babawɔɔsa bakpiletɛ dii kaamaa nwu.

39 Batininitɛ didiki nkye Saate nwu nfũ;

nnwɔɔ ninle katanikokɔ di dibuo obe kamɛ nɛ.

40 Saate nwu nkyakaako ma, andiki ma kafɔɔ;

andiki ma ankyeko bakpiletɛ nnɛɛ, anfũ ma nkpa kafɔɔ,

diekye mantaniko nwɔ.