1 Obe oso di nnle nwu kokũ kanwumbe nkpo,

di batii nwu kokpee asi baawo kasakasa?

2 Kasɔ ka mmle baka ntoololaa suoto

kanyabayilatɛ kafɔɔ ntɔɔlɛɛ bawo

di Saate nwu

ku Nnwɔ Ɛɛpɛ ni Ɔfɔɔ nɔɔ suoto.

3 Boobuɛ alɛ, "Bita bufefee anyɛnɛ lɛma,

buofuki sɛkpɛnkyɛ lɛma buyu."

4 Otii wɔ ninsi ni di lekpomii di osi kɔma;

Saate nwu kɔma ma.

5 Ni ansĩ ɔlaa anta ma di ɔblɔ nɔɔ kamɛ

an-yɛkɛsa ma kafɔɔ di ɔblɔ yakayaka nɔɔ kamɛ alɛ,

6 "Ntoose Ɔka nii

di Sion, kabokotee nii klekle nwu suoto."

7 Kamayie Saate nwu kanya ɔlaa lɛkya:

Aatɔkɔ mi alɛ, "Obisuɔtɔbi nii fale;

miɛ ntookple fɔ Kote.

8 Kaalɛ mi,

ni kamayɔ nnle nwu mbla atesaa lɛfɔ,

kasɔ nwu nyɛntɛlekɔ nwu male fɔ kale.

9 Fabanaanfi ma ku abɔɔsaa kayofo;

fambibiɛ ma kɔkyɛɛkyɛɛ fɛle kɔtɛ dibukii."

10 Nioso, aye baka, bibe anu;

bilolaa binyu, aye kasɔ nwu kanyabayilatɛ.

11 Bisumu Saate nwu ku lɛyɛkɛ

biɛnya suoto lɛyɔɔ ku ditũtũkũ.

12 Biwakosa suoto kasɔ bita Obisuɔtɔbi nwu, se diele nkpo abanya ɔblɔ

anwɔɔsa ye di osuku lee,

diekye ɔblɔ nɔɔ ninklɛ kuɔwa.

Suoto siyɔɔ batii ba bamuu nintaniko nwɔ ni.