Salmos 60

Ɔlaa Ɔpɛ Diɛta Ni Didiki

Dawid miktam.*53.0 Dite fɛle onu lɛsambi lewo dile Kuɔta ni sinutuotɛ. Basa nwu di "Atoto Kanya Ninii" kanya. Kuɔta ni asaaotuo. Di obe wɔ aakpɛko ni Aram Naharaim ku Aram Soba, ku obe wɔ di Yoab lakple aasifi aalaalo ni Edom batii lefosi nkpe nnyɔ di mmba Obombo nwu kamɛ.

1 O Yaa, fatoosĩ wo, fatoodiɛ wo nnɛɛ;

fatɔɔnya ɔblɔ- nunua se wo lelolaa!

2 Fatootũkunsa kasɔ, fɛɛbɛ ka kafɔɔ fɛɛtɛ;

tĩi mbɛkɔ nika, diekye kootũkũ.

3 Fatootuo batii lɛfɔ dibuo nwaa;

fatɔɔta wo nta be ninkɔta wo munsiɛ ni.

4 Kafɔɔ batii ba ninyɛkɛ fɔ nii, fatɔɔtakatɛsa flankaa

alɛ aafukuti antĩi kɔtaa nwu. Yila kɛɛkɛ

5 Fũ wo faakyakaako wo kafɔɔ ku koletanɛɛ lɛfɔ,

alɛ faadiki batii ba fambɔmbɔ nii.

6 Yaa ntɔɔkakatɛ eekyeko kakleklekɔ nɔɔ:

"Di suoto lɛyɔɔ kamɛ kamasɛ Sekem ndiki

nsɛ kafɔɔ Sukot Ɔtaata nwu.

7 Gilead ole mi ale, Manase kafɔɔ ole mi ale;

Efraim ninle mi abɔɔsaa lekoto,

Yuda kayofo nii.

8 Moab ninle mi asaa ofoto bɛɛsi,

Edom ninfuki ntokota nii ntɛ;

Filisti suoto mayiisa lelenkee kudu."

9 Owe nimakpaa mi anwako okpoo wɔ beetofo oyoyiɛ beekyisa ni?

Owe nimaleko mi katũ ankyɛnko Edom?

10 O Yaa, diele afɔ nɛ, afɔ wɔ niasĩ wo ni nɛ,

floosintikanko bakpɛtɛ loo kafɔɔ?

11 Ta wo lɛkyakaako di lo loo suoto,

diekye otii lɛkyakaako diele lɛsalɛsaa.

12 Ku Yaa, bubawɛ lelenkee,

abananafu balo loo kafɔɔ antɛ kaasɔ.