1 Yaa nii, Yaa nii, obe oso feediɛ mi nnɛɛ nkpo?

Obe oso feekyo ku odiki nii,

fɛɛtɛ feekyo di atunni nii sɛlɔ?

2 O Yaa nii, lɛfaa lɛlɛɛ fɔ ku kakũ, kafɔɔ faatuna,

kakyɛ kafɔɔ, ninlokanana.

3 Kafɔɔ fasi di lɛkakpomii fɛ Klekletɛ.

afɔ ninle Israel katansa.

4 Afɔ suoto di bawa loo latika asi lɛma;

baatika fɔ disi, ni faadiki ma nɛ.

5 Baawi baalɛɛ fɔ ni faadiki ma nɛ,

afɔ baatika disi ni ninnɛɛ ditafee ma nɛ.

6 Kafɔɔ ami yi, kunnwɔɔ nle, diele otii,

batii kɔma mi, nindie kafɔɔ lɛsalɛsaa di okpoo anu.

7 Mba bamuu ninnyɛɛ nii mma mi;

mantufa mi, matũkunsa asi lɛma mabuɛ alɛ:

8 "Eetika disi di Saate nwu suoto;

ta Saate nwu afũ nwɔ.

Tɔɔ adiki nwɔ,

diekye suoto n-yɔɔ nwɔ di kamɛ nɔɔ."

9 Kafɔɔ afɔ niadiki mi di olofofɔtɔ kamɛ;

afɔ niata latika fɔ disi

bia di yaami lɛnyɛɛ suoto.

10 Diayɔ ni di kalofokɔ baayɔ mi baatika fɔ di suoto;

diayɔ ni di yaami kafutu kamɛ fale Yaa nii.

11 Tankyo mi,

diekye dibuɛkpee ntɔɔtɛɛtɛɛ

kuonwii kafɔɔ nnaa abakyakaako mi nii.

12 Banankyue-suɔtɔ kpinwu lɛmana mi beekyi;

Basan banankyue-suɔtɔ siene lekpee lɛkpankyila beekyi mi.

13 Bɛɛbɛ nnya lɛma foo di suoto nii

fɛle bakyata ba nikokumii mambɛbɛɛ ni sina lɛma.

14 Bɛɛnyɛɛnɛ mi beewii fɛle ntu,

akufi nii amuu kafɔɔ lɛkpakpaa di nkyakɔ nɔɔ suoto.

Otu nii ntookple sɛtɔ̀;

kutɔɔnyinakĩi kuodie kaamɛ nii.

15 Owolonwo nii lekoso fɛle dibukii kakyɛɛ,

ɔkplalomii nii kafɔɔ nka di kanyatoo;

fɛɛyɔ mi fɛɛtɛ di kukpi kudu kamɛ.

16 Baweewee lɛmana mi beekyi;

batii kpile dikudi lekpee lɛkpankyila beekyi mi,

beedufu nnɛɛ nii ku nkpaa nii.

17 Mafuo akufi nii amuu ɔka;

batii kafɔɔ nnyu mi tunwii nyakatãa.

18 Baasɛ abula nii bawo

baawii atrebi kafɔɔ di akpeele nii suoto.

19 O Saate, kafɔɔ afɔ yi, tankyo mi;

O osie nii, wa wla fabakyakaako mi.

20 Diki nkpa nii fakyeko kapamii kanya,

nkpa nii be niefũ ni kɔya di baweewee osie kamɛ.

21 Diki mi fakyeko bakyata kanya;

fũ mi di batrɔmu akya kamɛ.

22 Malɛɛ leyooto lɛfɔ nta babiloo;

matansa fɔ di batii dikudi kamɛ.

23 Aye ba ninyɛkɛ ni Saate nwu, bitansa nwɔ!

Aye Yakob banantii bamuu, bitɔɔ dibu!

Aye Israel banantii bamuu biyɛkɛ nwɔ!

24 Diekye aafeesa nnɛɛ ee aakyisa anu

di nnwɔ diobuo, oonnu ni ninyinyi suoto;

aawofasa anu nɔɔ di suoto nɔɔ

kafɔɔ atoonu nwɔ kaku owi diɛta ni lɛkyakaako.

25 Afɔ kamɛ di katansa nii di batii dikudi kplɛ nwu kamɛ lekye;

mba ninyɛkɛ fɔ ni anu kamata asaaɔta ya labuɛ latɛ nii.

26 Bapiitɛ male mammiɛ;

mba nikowolaa ni Saate nwu matansa nwɔ-

situ lee sisiɛ nkpa dinaa ni kaloo!

27 Kasɔ nyɛntɛlekɔ mmuu

manyuma mamunikĩi manwa Saate nwu nfũ,

nnle nwu nfaabi mmuu batii kafɔɔ

mawa kasɔ di anu nɔɔ,

28 diekye Saate nwu kale ninle sɛka kalekɔ nwu nkpo,

ni oole sɛka di nnle nwu suoto nɛ.

29 Basaawɛntɛ bamuu kaasɔ suoto male, mansumu

batii ba bamuu niesifi ni kudu kamɛ-

mba ninamafuo ni suoto lɛma nkpa ofũ mapɛ akunkyi di anu nɔɔ.

30 Kayi kaamaa babi masumu nwɔ;

babatɔkɔ ana ya nikɔwa ni Saate nwu suoto ɔlaa.

31 Bababuɛ ɔsaabla tinini nɔɔ

mantɔkɔ batii ba manadilofo ni-

diekye nnwɔɔ niɛbla nya nɛ.