1 Kamatansa Saate nwu obe biala;

katansa nɔɔ matika di anyasibi nii obe lele.

2 Ɔkla nii makanta di Saate nwu kamɛ;

bita batii ba diobuo ni banu, baanya suoto lɛyɔɔ kafɔɔ.

3 Bitakatɛsa Saate nwu katoo ku ami;

bita busi buɔtakatɛsa leyooto nɔɔ katoo.

4 Lalɛɛ Saate nwu, ni aatuna mi nɛ;

aadiki mi aakyeko lɛyɛkɛ nii nimuu kamɛ.

5 Batii ba nintika nwɔ ni disi nle lɛkpa;

blɔbakpee anu lɛma kaasɔ ku sinunsɔ diidii.

6 Piitɛ wɔ mmle lalɛɛ, ni di Saate nwu lanu aatɔɔ nɛ;

aadiki nwɔ aakyeko amiina nɔɔ amuu kamɛ.

7 Saate nwu tɔkyɛntɛ nkpee kɔba ankyisa mba ninyɛkɛ nwɔ nii,

andiki ma kafɔɔ.

8 Bitɛɛtɛɛ nwɔ bietofo bilɛ Saate nwu nlɛ;

suoto siyɔɔ otii wɔ nintaniko nwɔ ni.

9 Batii klekle nɔɔ, biyɛkɛ Saate nwu,

diekye lɛsalɛsaa ninfĩ batii ba ninyɛkɛ nwɔ nii.

10 Kɔka mafuo bakyata oklee mambla kpiɛkpiɛ,

kafɔɔ batii ba ninwolaa ni Saate nwu yi, lɛsaa biene kuninwii ninfĩ ma.

11 Babi nii, biwa, bikyɔɔ mi atoko;

kamatuo ye mmle man-yɛkɛ ni Saate nwu.

12 Olele lee nimbɔmbɔ nkpa

oomiɛ kafɔɔ alɛ anya ayi biene kpinwu yi,

13 ni blasa ɔkplalomii lɛfɔ di okpile suoto,

anyasibi lɛfɔ kafɔɔ di sɛlaa ku afunu lɛkakatɛ suoto.

14 Kpukuti di okpile suoto, faabla dibiene;

wolaa atoko ɔkyɛ ole, faatikanko nwu.

15 Saate nwu anu ntika di batininitɛ suoto

atoko nɔɔ kafɔɔ nte kaayi ɛɛta kaku lɛma;

16 Saate nwu anu n-yɛ di batii ba nimbla ni sikpile suoto,

alɛ ɔɔyɛɛsa ayooto lɛma di kasɔ nwu suoto.

17 Batininitɛ nwi kaku, Saate nwu nnu anta ma kafɔɔ;

andiki ma ankyeko amiina lɛma amuu kamɛ.

18 Saate nwu lɛtɛɛtɛɛ batii ba di situ lebiɛ ni

anfũ kafɔɔ batii ba di anwuna kodie ni.

19 Otii tinini kafuo osiɛ di amiina kpinwu kamɛ,

kafɔɔ Saate nwu ndiki nwɔ ankyeko amuu kamɛ;

20 annyu akufi nɔɔ amuu,

kuninwii nini dilɔbafee.

21 Sikpile kamalo bakpiletɛ;

babalo batii tinini bakyiditɛ lɛpɔɔ.

22 Saate nwu ndiki bakpɛmblatɛ nɔɔ;

blɔbalo mba nintaniko nwɔ ni kuonwii lɛpɔɔ.