1 O ɔkla nii, tansa Saate nwu;

asaa ya amuu ninsi ni kaamɛ nii, tansa leyooto klekle nɔɔ.

2 O ɔkla nii, tansa Saate nwu,

tanyee kafɔɔ abiene nɔɔ amuu-

3 nnwɔ nin-yɔ sikpile lɛfɔ simuu ankyɛ nii

ankya ni sifiɛ lɛfɔ simuu kafɔɔ,

4 andiki ni nkpa lɛfɔ ankyeko ni dibiɔ kamɛ

antũkunsa fɔ ni lɛbɔmbɔ ku nyaami ɔnya lɛkakoto,

5 nnwɔ ninta ni abiesaa lɛfɔ ku asaa biene

mmle di sekosopo lɛfɔ katoose ni lɛfɔle ɔbla fɛle klikpo sele.

6 Saate mbla ɔsaabla tinini sɛkpɛ

anta kafɔɔ mba bamuu boonyinka ni lɛbɛ.

7 Antuo Mose sisuku nɔɔ,

antuo Israel batii sɛsaabla nɔɔ:

8 Saate nwu nnya nyaami, akpe kafɔɔ sifutulɛ,

ɔblɔ nɔɔ nte buɛɛ, lɛbɔmbɔ nɔɔ mpɔ.

9 Ɔlɔbatɛ fɔ koló obe lele,

ee anya ɔblɔ dinaa ni kaloo;

10 annanfi wo kootoko fɛ mmle di sikpile loo lesiɛko nii,

ee ata wo koto di ɔtanlolaa loo ɔbla kanya.

11 Diekye fɛ mmle di osi lɛtaka kulenke ni kasɔ yi,

nkpo di lɛbɔmbɔ nɔɔ lemuɔ diɛta mba ninyɛkɛ nwɔ ni nɛ;

12 fɛ mmle di kufĩ katunkɔ lekyo ni di kufĩ kamɛɛkɔ yi,

nkpo kafɔɔ atootekete ɔtanlolaa loo ɔbla di suoto loo nɛ.

13 Fɛ mmle di kote nnya ni babi nɔɔ nyaami yi,

nkpo di Saate nwu nnya mba ninyɛkɛ nwɔ ni nyaami nɛ;

14 diekye aye mmle bɛɛbla wo nii,

anyuma alɛ kudu bule.

15 Otii nnwɔɔ, ayi nɔɔ nte fɛle sɛfa,

anlɛ fɛle lepoo kamɛ atoto;

16 kɔfɛɛfɔ nfɛ kunfe nya di suoto se atoosifi,

mansinyuma kafɔɔ kasiɛkɔ nɔɔ.

17 Kafɔɔ diɛyɔ ni di nua diesifi ni dinaa ni kaloo

Saate nwu lɛbɔmbɔ nsiko mba ninyɛkɛ nwɔ nii,

ɔsaabla tinini nɔɔ kafɔɔ nsiko babi lɛma babi-

18 ku mba niemufũ kanya ninii nɔɔ bakle ni

manyuma manle ni afiofa nɔɔ.

19 Saate nwu ntɔɔtɛ sɛka kalekɔ nɔɔ di osi,

sɛka kalekɔ nɔɔ kafɔɔ kole sɛka di bamuu suoto.

20 Bitansa Saate nwu, aye batɔkyɛntɛ nɔɔ,

aye Yaa babisuɔtɔbi nimbla ni di ɔlaa nɔɔ suoto,

ninkyɔɔ ni ɔlaa nɔɔ atoko.

21 Bitansa Saate nwu, osi bakpɛtɛ nɔɔ bamuu,

aye bakpɛmblatɛ nɔɔ ba nimbla ni dibiesaa nɔɔ.

22 Bitansa Saate nwu, aye sɛkpɛ nɔɔ simuu,

di kakɔ biala di sɛka kalekɔ nɔɔ.

O ɔkla nii, tansa Saate nwu.