1 O Saate, nyuma Dawid

ku dibuo le nimuu kamɛ aafe ni.

2 Aaka ntam aata Saate nwu

aabuɛ aatɛ aata Nnwɔ Ninlenke ni Yakob:

3 "Namabuo leyo nii

ee nte di atensaa nii suoto-

4 Namamaasa anu nii nkyɔsĩi,

namamaasa sinumpoo nii,

5 diediki lɛwɛ lɛba lɛta Saate nwu,

kasiɛkɔ lɛta ni Nnwɔ Ninlenke ni Yakob."

6 Buanu nwu di Efrata,

buanya ni di Yaar afe.

7 "Bita bukyɛ kasiɛkɔ nɔɔ;

bita busumu di nkpaa ditikasaa nɔɔ katũ-

8 O Saate, taka fawa ɔnyɛɛ katɛkɔ lɛfɔ,

afɔ ku kanya ninii lɛlakaa lɛfɔ osie.

9 Ta bakpee olebatatɛ lɛfɔ awu ku ɔsaabla tinini;

ta baklekletɛ lɛfɔ basa suoto lɛyɔɔ sinu."

10 Ta kpɛmblatɛ lɛfɔ Dawid oso

tansĩ ole fɔ wɔ faapɛ ni ɔfɔɔ.

11 Saate nwu laka ntam aata Dawid,

ntam be beetika ni difuɔ di Saate nwu dilɔbakplesa nii:

"Banantii lɛfɔ bamu onwii

kamayɔ nsiɛsa di lɛkakpomii lɛfɔ-

12 nse babisuɔtɔbi lɛfɔ lemufũ kanya ninii nii beeklee

ku asaa otuo nii ya latuo ma nii,

ni babisuɔtɔbi lɛma kamasiɛ

di lɛkakpomii lɛfɔ suoto dinaa ni kaloo."

13 Diekye Saate nwu ntoodiki Sion,

aabɔmbɔ nwu aata kasiɛkɔ nɔɔ:

14 "Nle mmle ninle mi ɔnyɛɛ katɛkɔ dinaa ni kaloo;

nfũ kamasiɛ nle ni sɛka, diekye mbɔmbɔ nwu-

15 Kamawii nwɔ lɛyɔɔ ku asaa kpinwu

bapiitɛ nɔɔ kamale alesaa mammiɛ.

16 Kamakpee olebatatɛ nɔɔ ku didiki akpeele,

baklekletɛ nɔɔ kafɔɔ kamasa suoto lɛyɔɔ sinu dinaa ni kaloo.

17 "Nfũ kamata lɛkya mmuɔ ninta ni Dawid

n-se kandiɛ kafɔɔ nta nnwɔ lɛpɛ ni ɔfɔɔ.

18 Kamayɔ sinunsɔ nkpee balo nɔɔ fɛle akpeele,

kafɔɔ lɛkakoto di disi nɔɔ kamakpà.