1 Labuɛ nlɛ, "Kamanyu sisuku nii

mblasa ɔkplalomii nii kafɔɔ di okpile suoto;

kamakpee klɔklɔ di kanya nii

di obe wɔ di bakpiletɛ nwu n-yɛ ni di anu nii."

2 Kafɔɔ di obe wɔ lalokanana lasiɛ ni kloklo,

ntatoobuɛ ni bia ɔlaa biene kuonwii,

dibuo nii lataka katoo.

3 Otu nii lafila kaamɛ nii,

obe wɔ kobu nwu ni disi kafɔɔ, nkpo di ɔtɔ nwu kofiɛ nɛ;

ninfɛ lakakatɛ ku ɔkplalomii nii nlɛ:

4 "O Saate, tuo mi nkpa nii kalookɔ,

ku ayi nii lɛpɔ;

faatɛɛ ntofo mmle di nkpa nii lɛbla ni kakuu.

5 Fɛɛbla ayi nii fɛ kɔnɛɛtakala lɛblɛfɛ,

alɛɛ nii lɛpɔ diele lɛsalɛsaa di anu lɛfɔ.

Otii biala nkpa nte fɛle owiidi. Yila kɛɛkɛ

6 Otii kunyii ko ale akyɛ oofe ankple ni:

Akyɛ oofenfe, kafɔɔ kasakasa;

ansiisa lɛsaawɛ antɛ, anan-ye owe nimawɛ nya nii.

7 "Kafɔɔ nunua, Saate, be nfɛ ninnyu osuku nta?

Osuku onyu nii nsi di kamɛ lɛfɔ.

8 Diki mi fakyeko ɔtanlolaa ɔbla nii omuu kamɛ;

tantɛɛ lakple lɛmansaa lata mba ninan-ye ni lɛsaa.

9 Lalokanana; namabɛ kanya nii,

diekye afɔ ninle nwɔ niɛbla ni nle mmle.

10 Tekete dibuo lɛfɔ nwu di suoto nii;

lɛkɔlɛkɔlɛ lɛfɔ nwu ntoolenkee mi nnɛɛ.

11 Fansĩ ɔlaa, fannaanfi kafɔɔ batii kootoko ta sikpile lɛma oso,

fanlalasa lɛsaawɛ lɛma fɛle dikudikudi-

kafɔɔ owiidi di otii biala nle. Yila kɛɛkɛ

12 "O Saate, nu ɔlaa ɔpɛ nii,

kyɔɔ kaku owi nii atoko diɛta ni lɛkyakaako;

tanle tokotĩitɛ di owi nii suoto.

Diekye nsi ku afɔ fɛ ɔfɔɔ,

ɔfɔɔ, fɛ mmle di bate nii bamuu lale nii.

13 Kyisa anu di suoto nii, alɛ kakple nwɛ suoto lɛyɔɔ

fiɛ ninsifi alɛ nsinnaa ni kafɔɔ."