1 O Yaa, kyakaako ɔka nwu ku lɛka tinini lɛfɔ,

ɔka obi nwu ku ɔsaabla tinini lɛfɔ nwu.

2 Abakanko batii lɛfɔ di ɔsaabla tinini kanya,

anta bale fɔ ba diobuo ni lɛbɛ.

3 Abokote nwu kamawako batii nwu lɛlɛ,

akpenkpe nwu nwako ɔsaabla tinini.

4 Abakpɛ̀ anta mba diobuo ni di batii nwu kamɛ

andiki kafɔɔ mba diefĩ ni babi;

ababibiɛ amumu baletɛ nwu.

5 Abasiɛ nkpa fɛ mmle di kufĩ lɛnya kukpe ni,

fɛ mmle di kɔwɛntɛ lɛnya kukpe ni, ninfe nkpo ninsifi ana amuu.

6 Abate fɛle kanto nikɔnɔɔ ankpete ni di kofe ko bɛɛkpɛ ni,

fɛle kanto wɛɛwɛɛ nikokpete ni kasɔ nwu ntu.

7 Di obe nɔɔ kamɛ asaa malɛ anta batininitɛ;

lɛlɛ mawɛ di lɛpɔ kamɛ ninaase di obe wɔ di kɔwɛntɛ dilɔbasinwɛ nii.

8 Abale sɛka diɛyɔ ni di lekpo kotoko diesifi ni lekpo kotoko

diɛyɔ ni kafɔɔ di Okle diesifi ni kasɔ nwu nyɛntɛlekɔ nwu.

9 Mba ninsi ni di ɔfaafuu mawakasɔ di anu nɔɔ

balo nɔɔ kafɔɔ kamale kudu.

10 Baka nwu di Tarsis ku mba di lekpo kotoko fanfa

mawako nwɔ asɔsĩ;

baka nwu di Saba ku Seba

matɔɔ akyɛsaa.

11 Baka bamuu mawakasɔ mantɔɔ,

nnle mmuu kafɔɔ masumu nwɔ.

12 Diekye abadiki nnwɔ diefĩ ni eewi ɛɛlɛɛ nwɔ nii,

nnwɔ diobuo ni anaa ni kuonwii abakyakaako nwɔ ni.

13 Abanya nnwɔ ninaa ni osie ku nnwɔ diefĩ ni nyaami

andiki kafɔɔ nnwɔ diefĩ ni ankyeko kukpi nnɛɛ.

14 Abadiki ma ankyeko amiina ku amumu kamɛ,

diekye ntɔ lɛma lefũ kɔya di anu nɔɔ.

15 Ta asiɛ nkpa aklɛ!

Ta bayɔ koto sɛɛle bakyeko Saba bawako nwɔ.

Ta batii bapɛ ɔlaa batɔɔ dinaa ni kaloo

baawii nwɔ lɛyɔɔ kafɔɔ dii kufĩ kumu.

16 Ta atitabi apɔ di kasɔ nwu kamuu suoto;

aakpɛ afɛɛfɔ di akpenkpe nsintɛɛ.

Ta nya alɛ fɛle Lebanon ale okle;

ta nya abokoboko fɛle kofe sɛfa.

17 Ta leyooto nɔɔ dite dinaa ni kaloo;

ta dite disifi fɛ mmle di kufĩ lɛnya kukpe ni.

Babawii nnle mmuu lɛyɔɔ diefe ni di suoto nɔɔ,

babalɛɛ nwɔ kafɔɔ alɛ lɛyɔɔ.

18 Baatansa Saate Yaa, Israel batii Yaa nwu,

di lete nɔɔ nimbla ni ablasaa ya niɛbla ni ɔkpɛ.

19 Baatansa leyooto nɔɔ klekle nwu dinaa ni kaloo;

ta kasɔ kamuu kayii ku lɛkpa nɔɔ.

Diwa kaanya diekple diwa kaanya.

20 Nle mmle niɛyɛntɛ Yese obisuɔtɔbi Dawid sɛlaa ɔpɛ nɛ.