1 Bipɛ Saate nwu sɛfa, diekye alɛ;

lɛbɔmbɔ nɔɔ nkpe dinaa ni kaloo.

2 Bita mba di Saate nwu ladiki ni babuɛ nle mmle-

mba aadiki aakyeko ni kyiditɛ nwu kɔnɛɛ,

3 mba aasiisa akyeko ni nsɔ nwu,

aakyeko ni kufĩ katunkɔ ku kufĩ kamɛɛkɔ, aakyeko ni katoo kasɔ ku kala kasɔ.

4 Bawo lakyɛ baakyi ɔfaafuu kasɔ fukuti nwu,

batatɔɔwɛ ni osuku baafe basifi ni okpoo wɔ babasiɛ nii.

5 Kɔka ku otukɔnsɔ laklee ma,

ɔnyɛɛ latooloo ma.

6 Ninfɛ baawi baalɛɛ Saate nwu di dibuo lɛma kamɛ,

ni aadiki ma aakyeko nimiina lɛma kamɛ nɛ.

7 Aaleko ma katũ di osuku tinini suoto

aasifiko okpoo wɔ baafuo ni osiɛ.

8 Bita ma bapɛ Saate nwu sɛfa ta lɛbɔmbɔ nɔɔ le ninaa ni kaloo oso

ku sɛsaabla nɔɔ se niɛbla ni ɔkpɛ ɛɛbla ɛɛta ni batii,

9 diekye aata otukunsɔ bakleetɛ ntu baanyi

aka bakleetɛ kafɔɔ layii ku asaa biene.

10 Bawo lasiɛ di ditunu ku ditunu yɛkɛle nwu kamɛ,

ayo batentɛ dibuo di abɔɔsaa sɛkpɛnkyɛ kamɛ,

11 diekye baataka baayila di Yaa sɛlaa suoto

ni baasĩ Nnwɔ Ninlenke ni kɔkà nɛ.

12 Nioso aata ma baabla sɛkpɛ siene;

baatuula, kafɔɔ kuonwii ditawɛ aakyakaako nii.

13 Ninfɛ baawi baalɛɛ Saate di dibuo lɛma kamɛ

ni aadiki ma di nimiina lɛma nwu kamɛ nɛ.

14 Aadiki ma aakyeko ditunu ku ditunu yɛkɛle nwu kamɛ

aafefee kafɔɔ sɛkpɛnkyɛ lɛma nwu aayu.

15 Bita ma bapɛ Saate nwu sɛfa ta lɛbɔmbɔ nɔɔ le ninaa ni kaloo oso

ku sɛsaabla nɔɔ se niɛbla ni ɔkpɛ ɛɛbla ɛɛta ni batii,

16 diekye anfefee kɔbri n-yoko antɛ kaasɔ

ambudi kafɔɔ abɔɔsaa sewoso anfenko.

17 Bawo lakple babuutɛ diafe ni di ɔtaka oyila sisuku suoto

baanu dibuo ta ɔtanloolaa ɔbla lɛma oso.

18 Baakyidi alesaa amuu

baatɛɛtɛɛ kukpi n-yoko.

19 Ninfɛ baawi baalɛɛ Saate di dibuo lɛma kamɛ

ni aadiki ma di nimiina lɛma kamɛ nɛ.

20 Ni aakyesee ɔlaa kuabakya ma sifiɛ nɛ;

aadiki ma aakyeko ɔkya kamɛ.

21 Bita bapɛ Saate nwu sɛfa ta lɛbɔmbɔ nɔɔ le ninaa ni kaloo oso

ku sɛsaabla nɔɔ se niɛbla ni ɔkpɛ ɛɛbla ɛɛta ni batii.

22 Bita ma bata sɛfa ɔpɛ asaaɔta oleɔta,

baabuɛ sɛkpɛ nɔɔ ɔbla ku suoto lɛyɔɔ sinu.

23 Babamba ladie baasifi lekpo osi di seklo kplɛ kamɛ;

asaa basunsũtɛ baale di ntu kplɛ nwu osi.

24 Baanya Saate nwu sɛkpɛ,

sɛsaabla nɔɔ se niɛbla ni ɔkpɛ di kakyofokɔ nwu.

25 Diekye aakakatɛ, ni di afɛɛfɔ siene lafɛ nɛ,

aatakatɛsa lekpo ntu nwu katoo.

26 Siataka katoo sialaadu osi siakple siasifi kakyofokɔ nwu;

situ lɛma lakpà di ɔkyɛ lɛma nwu kamɛ.

27 Baakpɔkpɔtɔ ni baatɔɔkpankpa fɛle batansiɛntɛ nɛ;

batasintofo be nfɛ baabla.

28 Ninfɛ baawi baalɛɛ Saate nwu di dibuo lɛma kamɛ,

ni aadiki ma aakyeko nimiina lɛma kamɛ nɛ.

29 Aata afɛɛfɔ siene nwu lalokanana aate kloklo;

lekpo ntu nwu late buɛɛ.

30 Baapɔ di obe wɔ diate ni kloklo,

ni aaleko ma katũ aasifiko seklo kayilakɔ fɛ mmle baamiɛ ni nɛ.

31 Bita ma bapɛ Saate nwu sɛfa ta lɛbɔmbɔ nɔɔ le ninaa ni kaloo

ku sɛsaabla nɔɔ se niɛbla ni ɔkpɛ siɛta ni batii oso.

32 Bita ma batakatɛsa nwɔ katoo di batii kasiisakɔ kamɛ

baatansa nwɔ kafɔɔ di banɔɔfo nwu dikudi kamɛ.

33 Aakplesa sekle aabla ɔfaafuu,

ntu ntaakɔ be nimbiɛ ninfe ni labla kasɔ kosole,

34 alesaa kasɔ ninlɛ ni asaa kafɔɔ aabla mmba lalaale,

ta mba niasiɛ ni ninfa amumu oso.

35 Aamunikĩisa ɔfaafuu aabla ntu apanta

kasɔ kosole kafɔɔ aabla sekle ntaakɔ se nikobiɛ sinfe nii;

36 nfa aakpaa akabakleetɛ aawako babasiɛ,

ni baatɛ okpoo kplɛ di nfũ baasiɛ ni nɛ.

37 Baakpɛ afe, baapɛ awosobi ya man-yɔ mambla ni nta

diata baawɛ abi kpinwu baatɛsɛ;

38 aawii ma lɛyɔɔ, ni di lɛpɔ lɛma lataka katoo nwaa nɛ,

atata kafɔɔ banankyue lɛma lakɔkɔlɛ.

39 Ninfɛ di lɛpɔ lɛma lawakasɔ, ni baawokosa suoto kasɔ

di ninyinka ku nimiina ku sɛnyaami nɛ;

40 nnwɔ ninambu ni banɔɔfotii

anta ma mankyɛ mankyi man-yu osuku di ɔfaafuu kamɛ.

41 Kafɔɔ antakatɛ bapiitɛ ankyeko nimiina lɛma kamɛ

anta ayo lɛma batii nkpɛ̀ fɛle bafoso.

42 Bitininitɛ nnya, mannya suoto lɛyɔɔ

kafɔɔ bakpiletɛ bamuu mmaasa nnya lɛma.

43 Olele niebe anu, bitɔɔ anu sɛlaa se mmle

aatofo kafɔɔ Saate nwu lɛbɔmbɔ kplɛ nwu.