1 O Saate, afɔ lɛtaniko;

tanta sinunsɔ lakpɛ mi diidii.

2 Fũ mi faadiki mi di ɔsaabla tinini lɛfɔ kamɛ;

kyɔɔ mi kotoko lɛfɔ faadiki mi kafɔɔ.

3 Le katanikokɔ nii difuɔnkpaa,

di lɛba le kafuo ni ɔkyɛ obe lele;

diki kanya kaadiki mi,

diekye afɔ ninle difuɔnkpaa nii ku kɔba nii.

4 O Yaa nii, diki mi fakyeko bakpiletɛ nnɛɛ,

fakyeko batii kpile ku amumu bablatɛ nnɛɛ.

5 O Saate Kplɛ, diekye afɔ ninle osuku onyu nii,

anu nii ditikasaa diɛyɔ ni di sekosopo nii obe.

6 Diɛyɔ ni di kalofokɔ nii letika fɔ anu;

faalofo mi faakyeko yaami olofofɔtɔ kamɛ.

Kamatansa fɔ obe lele.

7 Ntɔɔbla fɛle ɔtɛ onyu lɛta batii kpinwu,

kafɔɔ afɔ ninle katanikokɔ nii siene.

8 Kanya nii leyii ku katansa lɛfɔ,

ndiki dibu lɛfɔ mbuɛ dii kufĩ kumu.

9 Tan-yɔ mi faayu nse ntoobe;

tandiɛ mi nnɛɛ nse ɔnyɛɛ nii ntooloo.

10 Diekye balo nii kɔkakatɛ di suoto nii;

mba ninsoko alɛ boolo mi ni kokpee asi baawo.

11 Boobuɛ alɛ, "Yaa ntoodiɛ nwɔ nnɛɛ; bitikanko nwɔ biemufũ nwɔ,

diekye kuonwii dilɔbafũ nwɔ."

12 O Yaa, tankyo mi;

O Yaa nii, wa wla faabakyakaako mi.

13 Ta kanya nii babuditɛ bawɔɔ ku sinunsɔ;

ta mba nikomiɛ alɛ babla mi ni amumu

bafũ atufa ku sinunsɔ.

14 Kafɔɔ ami yi, kamawɛ osuku onyu obe lele;

kamatansa fɔ nkple ntansa fɔ.

15 Kanya nii mabuɛ ɔsaabla tinini lɛfɔ,

di didiki lɛfɔ dii kufĩ kumu,

nu ninan-ye mmle di lɛpɔ nini nte nii.

16 O Saate Kplɛ, kamawa mayie lɛkya di ablasaa kplɛ lɛfɔ suoto;

kamayie lɛkya di ɔsaabla tinini lɛfɔ, lete lɛfɔ lele suoto.

17 O Yaa, diayɔ ni di sekosopo nii obe faatuo mi asaa,

ni di miɛ dii le mmle kobuɛ sɛsaabla lɛfɔ se niɛbla ni ɔkpɛ ntuo nɛ.

18 Kuntɛ obe wɔ ntoobe lepu ni disi,

O Yaa, tandiɛ mi nnɛɛ,

diediki lebuɛ osie lɛfɔ lɛtɔkɔ ana ya sɛɛmaa,

mbuɛ osie lɛfɔ ntɔkɔ batii ba bamuu nimawa nii.

19 O Yaa, ɔsaabla tinini lɛfɔ ledu osi,

afɔ wɔ niɛbla ni asaa kplɛ.

O Yaa, owe ninte fɛle afɔ?

20 Kuntɛ fɛɛtɛɛ lɛwɛ dibuo kpinwu ku olo,

fabakplesa osie nii fantɛɛ;

diɛyɔ ni di kasɔ kakyofokɔ nwu

fabakplesa mi fanwako.

21 Fabata dibu nii nkple nimpɔ

fankple fankpee mi kɔnɛɛ kaafutu kafɔɔ.

22 Kamatansa fɔ ku kyitaa

O Yaa nii, ta onukwale lɛfɔ oso;

O Israel Klekletɛ nwu,

kamasa katansa sinu nta fɔ ku sanku.

23 Anyasibi nii mayiisa suoto lɛyɔɔ kudu

nse kɔsa katansa sinu nta fɔ-

ami, nnwɔ feediki nii.

24 Ɔkplalomii nii mabuɛ sɛsaabla tinini lɛfɔ

dii kufĩ kumu,

diekye mba nikomiɛ alɛ babla mi ni amumu

sinunsɔ ntɔɔkpɛ ma bɛɛkpɔkpɔtɔ kafɔɔ.