1 Yaa ataka, aata balo nɔɔ basamii;

ta bakyiditɛ nɔɔ batoso di anu nɔɔ.

2 Fɛ mmle kɔɔfɛɛfɔ nfɛ kɔyɔ kunsifiko nii,

nkpo faafɛ ma fansifiko nɛ;

fɛ mmle di sɛtɔ̀ nnyinakĩi ni di ɔtɔ katũ yi,

nkpo di bakpiletɛ bawɔɔ di Yaa anu nɛ.

3 Kafɔɔ ta batininitɛ bapɔ

baanya suoto lɛyɔɔ kafɔɔ di Yaa anu;

ta suoto siyɔɔ ma baapɔ.

4 Bisa sinu bita Yaa, bisa katansa sinu bita leyooto nɔɔ,

bitakatɛsa nnwɔ ninsiɛ ni di alokonkyɛ suoto katoo-

leyooto nɔɔ ninle Saate nɛ-

binya suoto lɛyɔɔ di anu nɔɔ.

5 Kote ale ɛɛta bakuɛbi, bakpisɔfɔ nyuntɛ,

ninle Yaa di kasiɛkɔ klekle nɔɔ nwu nɛ.

6 Yaa nta batii ba dielo ni banantii,

anleko leyo batentɛ katũ ku sinu ɔsa;

kafɔɔ batokopĩitɛ nsiɛ di kufĩ- kufĩ kpankpa kasɔ suoto.

7 O Yaa, nse feedie kayi di batii lɛfɔ anu,

nse fɛɛkyɛ feefe di ɔfaafuu nwu, Yila kɛɛkɛ

8 kasɔ nwu ntũkũ,

kanto nnɔɔ ankye osi,

di Yaa anu, Nnwɔ niekye ni Sinai,

di Yaa anu, Israel Yaa nwu.

9 O Yaa, faata kanto kpinwu lanɔɔ;

faakple faasɛnkɛsa atesaa lɛfɔ kofole nwu.

10 Batii lasiɛ ninka suoto,

O Yaa, di lɛlɛ lɛfɔ nwu kamɛ faabie asaa faata bapiitɛ nwu.

11 Saate nwu labuɛ ɔlaa nwu,

ni di mba niale ni dikudi kplɛ layie nwu lɛkya nɛ:

12 "Baka ku bakpɛtɛ latoso ku nkye;

batii lasɛ kakpɛ asaa nwu di nsikɔ nwu kamɛ.

13 Bia obe wɔ bite ni di nsikɔ sɛtɔ kamɛ,

beetĩi ablonuma nii afoko ku koto fututu,

selonkoo nɔɔ ku koto sɛɛle seseele."

14 Obe wɔ di Nnwɔ Ninlenke ni lasamiisa ni baka nwu di kasɔ suoto,

ote diate fɛle atubakanii nikɔkpakpa di Salmon.

15 Basan abokote nwu nle abokote kplɛ;

Basan abokote nwu lekyookyoo.

16 O abokote kyookyoo, obe oso fɔɔkpɛ sɛsɔfɔwo,

di kobokote ko di Yaa lediki alɛ oole ni sɛka suoto,

di nfũ di Saate nwu omu kamasiɛ ni dinaa ni kaloo?

17 Yaa bakeke ba di bapɔnkɔ nnanfi ni nle nkpe afosi, afosi

ku nkpe nkpe;

Saate nwu ntookye Sinai ɛɛbabuo lɛkpaayo klekle nɔɔ kamɛ.

18 Obe wɔ faataka faasifi ni osi,

faakpaa batii ba faakpɛ faafũ ni faasifiko;

faafũ akyɛsaa di batii nfũ,

bia di batokopĩitɛ nfũ-

O Saate Yaa, alɛ afɔ faasiɛ ninfa.

19 Baatansa Saate nwu, Yaa Dikitɛ loo,

nnwɔ nintuka ni atoo loo dii biala. Yila kɛɛkɛ

20 Yaa loo nle Yaa wɔ nindiki ni batii;

Saate nwu Ninlenke ni nfũ di odie di kukpi kamɛ nkye.

21 Nwaako Saate mabibiɛ balo nɔɔ asi,

mba ninkpe ni asi sinwini wua basi ni di sikpile lɛma kamɛ.

22 Saate nwu alɛ, "Kamakpaa ma nkyeko Basan;

kamadiki ma nkyeko lɛkpo nkyofokɔ nwu kamɛ,

23 alɛ fabayɔ nkpaa lɛfɔ fankpee di bakyiditɛ lɛfɔ ntɔ kamɛ,

alɛ baweewee lɛfɔ sɛkplalomii nwɛ lele lɛma."

24 O Yaa, lɛkyɛmbi lɛfɔ nfɛ nte bɔɔnya,

Yaa nii ku Ɔka, lɛkyɛmbi lɛfɔ nwu obuo di lɛkpaayo klekle nwu kamɛ.

25 Sinu basantɛ nle katũ, mma sɛmaa basanku bapɛtɛ;

di bakpeele nsi ma ni kaamɛ bɔɔsɔkɔ ni akasa.

26 Bitansa Yaa di dikudi kplɛ nwu kamɛ;

bitansa Saate nwu di Israel kasiisakɔ kamɛ.

27 Benyamin kɔna biibii nleko ma katũ,

Yuda banɔɔfotii dikudi kplɛ nkpe ninfa,

nfa kafɔɔ di Sebulum ku Naftali banɔɔfotii nkpe nɛ.

28 O Yaa, diki osie lɛfɔ fatuo;

O Yaa, tuo wo ɔnyɛɛ lɛfɔ, fɛ mmle fatodibla ni.

29 Ta olekatakɔ lɛfɔ nwu di Yerusalem oso

baka mawako fɔ akyɛsaa.

30 Sĩ ɔlaa fata lepoo kamɛ babɔkɛɛ di anwaakɛ kamɛ,

faasĩ ɔlaa fata banankyue suɔtɔ dikudi nwu di anankyuebi di nnle nwu kamɛ.

Ta ma bawakosa suoto kasɔ, baawako koto fututu aboo.

Samiisa nnle be di nkpɛ lɛmɛnɛmɛnɛ ni.

31 Banɔɔfo makye Egipte manwa;

Kus mayɔ suoto nɔɔ anta Yaa.

32 O sɛka nlekɔ kaasɔ suoto, bisa sinu bita Yaa,

bisa katansa sinu bita Saate nwu, Yila kɛɛkɛ

33 bita nnwɔ ninsiɛ ni di saa kolo di osi,

ankpududuu ni ku sɛlɔ kplɛ.

34 Biyie Yaa osie nwu lɛkya,

oole ni sɛka di Israel suoto,

di osie nɔɔ nkpe ni di kolo.

35 O Yaa, lɛyɛkɛ nsi kaamɛ lɛfɔ di lɛkpaayo klekle lɛfɔ kamɛ;

Israel Yaa nwu nta batii nɔɔ osie ku ɔnyɛɛ.

Baatansa Yaa!