1 Dilɛ alɛ baatansa Saate nwu

O Nnwɔ Niɛtaka Katoo Alenke ni, mansa sinu mantasa leyooto lɛfɔ,

2 mayie lɛbɔmbɔ lɛfɔ lɛkya ku olesɛ,

onukwale lɛfɔ kafɔɔ ku kakyɛ,

3 di ekũ lefosi kyitaa sinu kanya

ku sanku nwu sɛlɔ.

4 O Saate, diekye fɛɛtɛɛ suoto lɛyɔɔ ku sɛsaabla lɛfɔ,

nsa sinu mpɔ di nnɛɛ lɛfɔ sɛkpɛ ɔbla suoto.

5 O Saate, mmle di sɛkpɛ lɛfɔ lemuɔ ni,

mmle di disibu lɛfɔ lekyofo ni!

6 Otii wɔ di disi nnaa ni dieye,

babuutɛ ninnu kasɔ,

7 alɛ kuntɛ bakpiletɛ kɔlɛ fɛle sɛfa,

di asaa kɔlɛ ɔkyɛ anta sikpile bablatɛ yi,

babawɔɔsa ma dinaa ni kaloo.

8 O Saate, kafɔɔ afɔ bɛɛtakatɛsa fɔ katoo dinaa ni kaloo.

9 O Saate, diekye nwaako balo lɛfɔ,

nwaako balo lɛfɔ kamakpi;

babasamiisa sikpile bablatɛ bamuu.

10 Fatɔɔtakatɛsa lɛkya nii katoo fɛle kɔ̀kɔ lele;

bɛɛnyɛɛnɛ nnɔnyi nwaa beekpete mi di suoto.

11 Anu nii ntɔɔnya lelenkee nwu di batikankotɛ nii suoto;

atoko nii ntoonu bakyiditɛ nii bakpiletɛ nwu kawɔɔ.

12 Asaa malɛ ɔkyɛ anta batinintɛ fɛle ɔwɔsɔ,

babamuɔ fɛle seda kowoso di Lebanon;

13 bɛɛsɔ ni di Saate nwu leyo kamɛ,

babalɛ di Yaa loo akpata nwu kamɛ.

14 Babakple mantika abi di sɛnɔɔfo lɛma kamɛ,

babate kpotokpoto manlɛ onyu kafɔɔ,

15 mantoobuɛ alɛ, "Saate nwu nte tinini;

nnwɔɔ ninle Difuɔnkpaa nii nɛ, akpilesaa kuanwii kafɔɔ diesi kaamɛ nɔɔ."