1 O Saate, Yaa wɔ nimbla ankyisa ni,

O Yaa wɔ nimbla ankyisa ni, kpa nfɛ.

2 O kasɔ nwu kantɛ, taka;

ta suoto katoo batakatɛsa koto ko niɛsiɛko ma ni.

3 O Saate, ɔmɛmbe di bakpiletɛ nwu,

ɔmɛmbe di bakpiletɛ nwu mapɔ manaase?

4 Boodiki lɛkanta sɛlaa mantɛ;

lɛkanta leyii sikpile babalatɛ bamuu kamɛ pɔ.

5 O Saate, mambibiɛ batii lɛfɔ;

boonyinka atesaa ya ninle ni batii lɛfɔ.

6 Manlo bakpisɔfɔ ku bafɔɔ;

mambudi bakuɛbi asi.

7 Mambuɛ alɛ, "Saate nwu dilɔɔnya;

Yakob Yaa nwu dilɔɔkyɔɔ atoko."

8 Bikyɔɔ atoko, aye ba ninan-ye ni lɛsaa di batii kamɛ;

aye babuutɛ, ɔmɛmbe bibabe anu?

9 Nnwɔ niɛkaasa ni kotoko ninnu?

Nnwɔ niɛbla ni ninu ninnya?

10 Nnwɔ ninanfi ni nnle kootoko ninnanfi batii kootoko?

Nnwɔ nintuo ni otii asaa nnaa lɛsaatofo?

11 Saate nwu n-ye otii disibu;

aye alɛ asaakuu ale.

12 O Saate, suoto siyɔɔ otii wɔ kotoko fɛɛnanfi ni,

otii wɔ feetuo ni asaa di kufiofa lɛfɔ suoto;

13 fandiki nwɔ fankyeko dibuo ayi kamɛ,

ninaase di obe wɔ beekutu dibiɔ bɛɛta ni bakpiletɛ.

14 Diekye Saate nwu dilɔbasĩ batii nɔɔ;

ɔlɔbadiɛ atesaa nɔɔ diidii.

15 Babakple mannya lɛkanko biene di ɔsaabla tinini suoto,

bamuu ba situ niɛkpa ni kamatikanko nwu.

16 Owe nimataka anyila di bakpiletɛ suoto antɛɛ?

Owe nimayila di sikpile bablatɛ suoto antɛɛ?

17 Diediki Saate nwu lɛtɛɛ lɛkyakaako,

nunua ntabalo kanana nsiɛ di kukpi kamɛ.

18 Obe wɔ labuɛ nlɛ, "Kɔkpaa nii kɔfɛntɛ," ni

O Saate, lɛbɔmbɔ lɛfɔ lakyakaako mi.

19 Nse nimiina kplɛ lɛwa mi di suoto,

kɔnɛɛ lɛfɔ okpee kaafutu nta suoto n-yɔɔ ɔkla nii.

20 Sɛka kalekɔ ka ninankpa ni kɔmɛ kafuo onwii ɔbla ku afɔ-

nnwɔ nin-yɔ dibuo anwako ni di kufiofa nikũ kanya?

21 Mannii kanya di batininitɛ suoto

manlo mba ole ninkpe ni kukpi lɛpɔɔ.

22 Kafɔɔ Saate nwu ntookple kawofakɔ nii,

Yaa nii kafɔɔ, difuɔnkpaa le kamɛ nintaniko nii.

23 Abata ma koto ankyisa di sikpile lɛma kanya

anwɔɔsa ma ta amumu lɛma oso;

Saate Yaa loo nwu kamawɔɔsa ma.