1 Ɔkla nii nwɛ onyɛɛ ɔtɛ di Yaa lete kamɛ;

didiki nii nkye ɔkyɛ nɔɔ.

2 Lete nɔɔ ninle difuɔnkpaa nii ku didiki nii;

nnwɔɔ ninle kɔba nii, namatũkũ diidii.

3 Ɔmɛmbe fabadieko otii faanaase?

Oyoyiɛ wɔ mmle ninkpɛ ni, kɔba ko nikɔkpà ni-

bamuu lee bibafuki nwɔ mintɛ kaasɔ?

4 Ɔtɛ bɛɛtɛ alɛ bɔɔtakatɛ nwɔ

di kayilakɔ kplɛ nɔɔ suoto;

suoto n-yɔɔ ma di sɛlaa ku afunu suoto.

Manwii lɛyɔɔ ku nnya lɛma,

kafɔɔ mankpaani di situ lɛma kamɛ. Yila kɛɛkɛ

5 O ɔkla nii, miɛ ɔnyɛɛ ɔtɛ di Yaa lete kamɛ;

osuku onyu nii nkye ɔkyɛ nɔɔ.

6 Lete nɔɔ ninle difuɔnkpaa nii ku didiki nii;

nnwɔɔ ninle kɔba nii, namatũkũ.

7 Didiki nii ku dibu nii ntika di Yaa suoto;

nnwɔɔ ninle difuɔnkpaa kplɛ nii ku katanikokɔ nii nɛ.

8 O batii, obe lele bitika nwɔ disi;

bidiki situ lee kamɛ sɛlaa bitɔkɔ nwɔ,

diekye Yaa ninle katanikokɔ loo. Yila kɛɛkɛ

9 Batii ba ninaa ni kɔnɛɛ nte fɛ kɔfɛɛfɔ,

batii ba ninkpe ni kɔnɛɛ nle balaatɛ;

nse bɛɛkadi ma di lɛkadisaa suoto, baale lɛsalɛsaa;

akyuu nwu anyɔ kɔfɛɛfɔ lete ko bale.

10 Bitantika disi di katafaa suoto

ee biatakatɛsa suoto katoo di ayusaa kamɛ;

kuntɛ lɛsaawɛ lee kɔtaka katoo,

bitanta situ lee latika ninnya suoto.

11 Ɔlaa onwii di Yaa ntoobuɛ,

ɛlaa ɛnyɔ lenu:

O Yaa, alɛ afɔ fakpe osie,

12 O Saate, alɛ afɔ fambɔmbɔ.

Nwaako fabata otii biala letota

di nle ɛɛbla ni kanya.