João 6

U Yesu akubalisya abandu fayivi sabuzani

1 Panyuma pake u Yesu akaloboka pakubuka kwisila inine ilya nyanja ya Galileya (yo yikaba nyanja ya Tibeliyasi.) 2 Po ichilundilo ichikulu icha bandu chikamukonga, pakuti bakatesya ifiswigho fyo akabombagha pa babine. 3 Po u Yesu akakwela pighamba nu kwikala pasi na bamanyili bake. 4 Akabalilo ka pa Lusekelo lwa Pasaka ulwa ba Yuda kakaba papipi. 5 Bo u Yesu akelengannya akachitesya ichilundilo ichikulu icha bandu chikwisa ku kwake, po akayugha kwa Filipu akati, "Imba tungaghula kwighi ichakulya icha kubalisya abandu bosi aba?" 6 Akayugha ichi akamughela bubu u Filipu pakuti akamanya nganila isyakubomba.

7 U Filipu akamwamula akati, "Napo amalipilo gho ghangalipila ukukila pakati pa chinja ghatangaghula ichakulya icha kukwana ukuti umundu wesi alyepo papala."

8 Weka uwa bamanyili bake, u Andeleya uwamwabo wa Simoni Pitala akayugha nawe akati, 9 "Alipo yumo umulumyana pano, yo ali ni fibama fayivi ifya bufu bwa malesi nu tuswi tubili. Imba ifi fingakwana abandu bosi bababa?"

10 U Yesu akababusya akati, "Mubabusye abandu bikale pasi." (Pala pala pakaba isote ilingi) Po abandu bosi bakikala pasi. Abanalume bakabapo fiyivi sabuzani. 11 U Yesu akasenya ifibama akamupalisya u Chala nukubagabannya abandu bo bakikala pasi pala pala, akasenya sona bububu niswi sila, po bosi bakalya ukuyana namo bakalondelagha. 12 Bo balya bikuta, u Yesu akababusya abamanyili bake akati, "Bunganika utubulubusya ukuti katakabepo nakamo akakutaghiwa." 13 Po bakabunganika utubulubusya tosi, bakisusya ifitundu twelovu nu tubulubusya twa fibama fayivi ifya bufu bwa balale, fyosi fyo fikasyala bo abandu balya.

14 Bo abandu batesya ichiswigho cho u Yesu akabomba, bakati, "Naloli musololi yula, yo akwisa mu chisu chapasi!"