34 Uhui Maria lukun malaikat hiyo, "Tapi ku eso perawan, ngunau awe hal hiyo tau jari?"

35 Malaikat hiyo nyamut, "Roh Allah sagar hulet tong nu. Kuasa Allah sagar ngilinung nu. Gana hiyo, nikia sa sagar lahir hiyo sagar dukuhui kudus, Anak Allah. 36 Ringo: Elisabet, Jalahan nu ble ne haot tuha, tapi hayak ti rahat mampung. Hurap lun kuhui ne pulu tapi hayak ti ne rahat mampung enem ulan. 37 Gana, dela Allah awe naan sa masatahir."

38 Tahui Maria kuhui, "Ku ti siap gawi kanakan Tuhan. Dihene jari lukun ku ngunau sa dukuhui nu." Tahui malaikat hiyo tulak melah Maria.