Lucas 24

Yesus peleha arep-Ne tei alan tong Emaus

13 Tei andrau hiyo lei, rueh kulun murid Yesus rahat malan tong isa desa sa baaran Emaus, kikira seblas kilometer kongorone neke Yerusalem. 14 Sansaluh malan ire bapaner tentang kongoreng sa haot jari hiyo. 15 Rahat ire bapaner lukun tukar pikir, Yesus gagalo hulet ngidini ire, tahui malan dadayo lukun ire. 16 Ire neau Yesus, tapi naan hal sa gawi ire mo kinut Yesus.

17 Yesus kuhui lukun ire: "Hiye sa pananer kondreh huang pangalan ti?"

Tahui, ire teno lukun rai dat sehu. 18 Tahui isa neke ire, sa baaran Kleopas, tane lukun-Ne: "Hiye Hanyu isa-isane lun asing tei Yerusalem, sa mo tanau hiye sa jari tei hiyo tei andrau-andrau sinilikut ti?" 19 Yesus tane lukun ire: "Hiye sa jari hiyo?" Samut ire: "Peristiwa jari lukun Yesus, lun neke Nasaret hiyo. Ne nabi, punguhui Ne lukun gawian Ne bukuasa bebene, asuh munurut peneau Allah atawa munurut peneau kongoreng lun. 20 Imam-imam kapala lukun pimimpin-pimimpin bangsa taka nyarah-Ne de duhukum matei, lukun ire nyalib-Ne. 21 Padahal kamin baharap bahwa Ne sa sagar nyalamat Israel! Lukun andrau ti andrau sa ketelu libas hal hiyo jari.

22 Tapi pipire wawei tuyang kamin haot pekemah kamin: Sunsung bebene ire haot tulak tong ogang, 23 lukun awe kahalu bangkai-Ne. Tahui ire waleng lukun kuhui bahwa ire neau malaikat-malaikat, sa kuhui bahwa Yesus welum.

24 Pipire lun neke kamin tahui tulak tong ogang lukun kahalu bahwa hiye sa dukuhui wawei-wawei hiyo mla bujur, kohoi ire mo neau Yesus."

25 Yesus kuhui lukun ire, "Kon mla pangong! gayut bebene kon de prasaya kongoreng sa haot dukuhui nabi-nabi! 26 Behene Raja Panyalamat harus kinam hono mantais libas hiyo huluk tong huang kemuliaan-Ne?"

27 Yesus tahui mara lukun ire hiye sa tunulis tentang arep-Ne huang kongoreng Kitab Suci, malai neke kitab-kitab Musa lukun kongoreng kitab nabi-nabi.

28 Rahat ire dini desa sa tunuju ire, ire neau Yesus kakan narus pangalan-Ne, 29 tapi ire nahan-Ne. Uhui ire "Muneng bo tei uneng kamin, hayak ti haot dini mieng." Maka Yesus huluk de muneng dayo ire.

30 Pangkat Yesus maharung kuman dayo ire, Yesus nigo roti, kuhui sukur tong Allah, nyibek-nyibek roti hiyo pakai tangan-Ne tahui ngokoine tong ire. 31 Tei hayak hiyo belenar mate ire lukun ire kinut Ne, tapi Ne sinap neke botuk ire. 32 Uhui ire isa lukun sa lain, "Behene taka jari basamangat bebene, rahat Ne bapaner lukun taka tei bengkang alan, lukun mara isi Kitab Suci?"

33 Rahat hiyo lei ire mindri, tahui waleng tong Yerusalem. Tei anai ire bakahalu seblas rasul Yesus rahat simpun lukun sa lain. 34 Uhui ire: "Mla bujur Tuhan haot welum waleng. Ne haot peleha arep lukun Simon!" 35 Tahui kurueh lun hiyo ngesah hiye sa jari tei bengkang pangalan, lukun ngunau awe ire kinut Tuhan tei waktu Ne nyibek-nyibek roti.