LUKAS 8

Yesus pewelum waleng anak Yairus lukun pamaeh wawei sa loloilite

40 Tei hila danau, naan deo lun ngandrei Yesus waleng. Jari, rahat Yesus hampe, kongoreng ire nyambut Ne. 41,42 Hulet erai kulun kapala blai uneng simihiang sa baaran Yairus. Ne kohoi ampun isa anak, anak wawei, umurne kikira dua blas taun. Anakne rahat bereten migisit matei. Jari, Yairus tunou tei pee Yesus, onok de Yesus hulet tong blaine de nawas anakne hiyo.

Huang pangalan tong blai hiyo, lun deo ngerok Yesus neke kongoreng arah. 43 Tei antarane naan wawei sa bereten loloilite. Haot dua blas taun kengelane bereten. Ne haot buleh tulak batawas hampe kongoreng hartane oreng. Tapi ne mo tau panamaeh oha hiye bo. 44 Ne ngidini Yesus neke likut, tangku mpak jubah-Ne, slenga teno loloilitene.

45 Yesus tane, "Hiye sa nangku Ku?" Awe naan isa lun sa mangaku.

Tahui, Petrus kuhui, "Bapa Guru, naan deo bebene lun sa ngurumung-Nu."

46 Uhui Yesus, "Tapi naan lun sa tangku Ku, Ku nginam naan kuasa sa losek neke Ku."

47 Wawei hiyo sadar gawianne haot tanau. Maka, ne hulet, tunou tei tama Yesus, ne hulet lukun preketek.*8:47 Wawei hiyo takut gana haot sadar Yesus bukuasa. Munurut hukum-hukum agama Yahudi, ne kananggap mo barasih gana baraha. Jari, mungkin lei ne takut senempo atawa duhukum. Tei tama kongoreng lun, ne ngesah hiye gana ne tangku Yesus. Ne kuhui bahwa libas ne tangku Yesus tei hayak hiyo lei ne jari maeh.

48 Uhui Yesus lukunne, "Anak-Ku, nu maeh gana haot prasaya lukun Ku tulak lukun salamat."

49 Rahat Yesus paner, hulet erai kulun sa siningku neke blai Yairus, kapala blai uneng simihiang hiyo iroh. Uhuine lukun Yarius, "Anak nu haot matei. Mo usah pisibuk Bapa Guru eso."

50 Tapi Yesus kiringone. Maka uhui-Ne lukun Yairus, "Ada takut! Prasaya bo, anak nu sagar welum waleng."

51 Libas hampe tei blai Yairus,Yesus mo ngijin lukun hiye bo uma-Ne huluk tong huang kamar, kecuali Petrus, Yohanes, Yakobus, lukun inai-amai nikia hiyo. 52 Kongoreng ire nangis, nitir nirinak kapatei nikia hiyo. Tapi Yesus kuhui, "Ada nangis nikia hiyo mo matei, tapi ne mandre!" 53 Ire kimihi-Ne gana ire haot tanau nikia hiyo matei.

54 Tahui,Yesus nyaput tangan nikia hiyo. Uhui-Ne, "Eei nikia, sele!" 55 Tahui nikia hiyo welum waleng, tahui mindri. Yesus merentah ire ngokoi okan dela nikia hiyo. 56 Inai-amai nikia hiyo sanganga. Tapi Yesus ngai ire mara piristiwa hiyo lukun hiye bo.