Xu̱kú xkawi̱i̱ꞌ tsí nagájnuu ná awúun ju̱ba̱ꞌ
11 Nda̱wa̱á a̱ꞌkhue̱n ndi̱yo̱o̱ i̱mba̱a̱ꞌ xu̱kú xkawi̱i̱ꞌ, tsí nagájnuu ná awúun ju̱ba̱ꞌ. Gíꞌdoo̱ a̱jma̱ chi̱jyu̱u̱ꞌ xómá chi̱jyu̱u̱ꞌ xu̱kú mogo̱, i̱ndo̱ó máꞌ numuu rí naꞌthée̱n xómá a̱bo̱ꞌ xkawi̱i̱ꞌ tsí phú mba̱a̱ jamí maña̱a̱ꞌ. 12 Jamí ni̱grui̱guíi̱ mbá xúgíí ski̱yu̱u̱ꞌ xu̱kú xkawi̱i̱ꞌ tsí ginii, kajngó ma̱jmuu̱ ne̱ inuu máꞌ ikhaa tsúꞌkhue̱n. Naꞌne-ski̱ñúu̱ xa̱bo̱ tsí júwa̱ꞌ ná tsu̱du̱u̱ numbaa rí mune̱-mba̱a̱ xu̱kú xkawi̱i̱ꞌ tsí ginii, tsí niꞌni̱i máꞌ ná phú gakhe̱ nijámbi̱yu̱u̱ꞌ rí nijáñuu. 13 Mangaa máꞌ naꞌnii̱ rí wáá rí phú namakúún xa̱bo̱ eꞌne. Asndo naꞌnii̱ rí ná inúú mbá xúgíin xa̱bo̱ ma̱ga̱taa agu mikhuíí, ma̱ꞌkha̱ ne̱ ná inuu numbaa. 14 Ga̱jma̱á rí phú wáá rí naꞌnii̱ ga̱jma̱á ski̱yu̱u̱ꞌ xu̱kú xkawi̱i̱ꞌ tsí ginii, neꞌne-nduwii̱n xa̱bo̱ tsí júwa̱ꞌ ná numbaa. Nixná-ñájúu̱n xa̱bo̱ rí mune̱ mbá xtiꞌkhuu xu̱kú xkawi̱i̱ꞌ tsí ginii, tsí nijámbi̱yu̱u̱ꞌ ga̱jma̱á chíde̱ jamí tájáñuu. 15 Mangaa máꞌ nijanáá xu̱kú xkawi̱i̱ꞌ tsí riajma̱a̱ tsiakhe̱ rí ma̱ꞌnii̱ rí mba̱ꞌya xtiꞌkhuu xu̱kú xkawi̱i̱ꞌ tsí ginii, kajngó ma̱goo maꞌthán ne̱ jamí ma̱ꞌne ne̱ rí ma̱ja̱ñúú mbá xúgíin xa̱bo̱ tsí tsíne̱-mba̱a̱ ne̱.