1 A̱ꞌkhue̱n ni̱dxawuun nigájnuu ná awúun guꞌwá dxákuun mbá a̱ꞌwá rí phú gakhe̱ niwán, rí naꞌthúún ánje̱l tsí mbá juwiin: «Aꞌgua gúxi̱dí-rámáálaꞌ ná tsu̱du̱u̱ numbaa rí gajno̱ꞌ ná awúun mbá juwan xúba̱ me̱jno̱ꞌ ríge̱ꞌ, rí gajni̱í rí najiꞌnáa Ana̱ꞌlóꞌ».

2 Nigájnuu ni̱ka̱ ánje̱l tsí ginii, jamí nixídí-rámuu̱ ná tsu̱du̱u̱ numbaa rí gajno̱ꞌ ná awúun xúba̱ me̱jno̱ꞌ. A̱ꞌkhue̱n mbá xúgíin xa̱bo̱ tsí juda tsinuu xu̱kú xkawi̱i̱ꞌ jamí nune̱-mba̱a̱ xtiꞌkhuu̱, nidee̱ ska rí phú xkawe̱ꞌ giaxu̱u̱ jamí phú naꞌkho̱ eꞌne ne̱.

3 Xómáꞌ ánje̱l tsí riajma̱a̱ nixídí-múꞌúu̱n ná awúun iya a̱pha̱ rí gajno̱ꞌ ná awúun xúba̱ me̱jno̱ꞌ. A̱ꞌkhue̱n niꞌni̱i iꞌdi iya a̱pha̱ xómá iꞌdiuu xa̱bo̱ tsí nijáñuu jaꞌnii, jamí nijáñúú mbá xúgíin xu̱kú tsí gachúún ná awúun ne̱.

4 Jamí ánje̱l tsí riatsíi nixídí-múꞌúu̱n ná awúun matha jamí ná iduu iya rí gajno̱ꞌ ná awúun xúba̱ me̱jno̱ꞌ, jamí niꞌni̱i iꞌdi iyoo ne̱. 5 A̱ꞌkhue̱n ni̱dxawuun niꞌthán ánje̱l tsí jayángawii iya:

«Táta̱,* tsí Jaꞌwii, tsí xtaa máꞌ jayu, jamí niraxtaa máꞌ asndo nákhí wajyúú mbiꞌi,

phú máján ithane̱ rí xkuaꞌnii nataxúꞌdaa awan ga̱jma̱á numúú xa̱bo̱.

6 Numuu rí ikhii̱n ni̱radíi̱n xa̱bo̱ tsí jaꞌwuun jamí tsí ni̱rawíjnga̱a ajngáaꞌ.

Ikhaa jngó ikháánꞌ mangáánꞌ naraxnúu̱ iꞌdi mu̱wa̱a̱n,

numuu rí ikhaa máꞌ rúꞌkhue̱n jaꞌñúu̱».

7 Xúꞌkhue̱n máꞌ ni̱dxawuun i̱mba̱ a̱ꞌwá rí nagájnuu ná wéje̱ ajwa̱nꞌ mo̱jmo̱ꞌ ná nakha wájya:

«Gakon máꞌ, Táta̱ Ana̱ꞌxo̱ꞌ, tsáánꞌ xtaꞌdáá mbá xúgíí tsiakhe̱,

ikháánꞌ nataxúꞌdaa májáanꞌ awan jamí jmbu ga̱jma̱á numúú xa̱bo̱».

8 Ánje̱l tsí riakhui̱i̱ nixídí-rámuu ná inuu a̱kha̱ꞌ rí gajno̱ꞌ ná awúun xúba̱ me̱jno̱ꞌ, a̱ꞌkhue̱n rí a̱kha̱ꞌ ni̱grui̱guíi̱ tsiakhe̱ rí matsikhíi̱n xa̱bo̱ ga̱jma̱á agu. 9 Jamí nikhiin mi̱ndaꞌkho xa̱bo̱ neꞌne rí mika. Xómáꞌ ikhii̱n ra̱khúu̱n gúne̱-mba̱a̱ Ana̱ꞌlóꞌ, maske máꞌ ikhaa̱ gíꞌdoo̱ tsiakhe̱ inuu jamínu̱ꞌ ríge̱ꞌ, ni máꞌ táthanga̱a a̱kuíi̱n, a̱ꞌkhue̱n gakon nithan-xkawíi̱ꞌ Ana̱ꞌlóꞌ.

10 Ánje̱l tsí tiwitsii nixídí-rámuu ná ꞌgí naꞌthán-ñájun xu̱kú xkawi̱i̱ꞌ rí gajno̱ꞌ ná awúun xúba̱ me̱jno̱ꞌ, a̱ꞌkhue̱n neꞌne jína mbá xúgíí ná naꞌthán-ñájwii̱n. Asndo naꞌpho̱ ra̱ju̱ún xa̱bo̱ rí naꞌkho̱ mi̱ndaꞌkho iyáa̱. 11 Jamí nithán-xkawíi̱ꞌ Ana̱ꞌlóꞌ Mikhuíí ga̱jma̱á numuu rí naꞌkho̱ iyáa̱ jamí ga̱jma̱á numuu ska rí judee̱. Maske máꞌ xkuaꞌnii, túni̱ꞌñáa̱ rí nuni̱i̱ rí xkawe̱ꞌ.

12 Xómáꞌ ánje̱l tsí timajwiin nixídí-rámuu ná awúun matha mba̱a̱ Éu̱fra̱te̱s rí gajno̱ꞌ ná awúun xúba̱ me̱jno̱ꞌ, a̱ꞌkhue̱n nijndoo matha rúꞌkhue̱n. Xkuaꞌnii ni̱ma̱ꞌthoo jamba̱a̱ rí ma̱nújngúún thúngaa tsí naguwá ná numbaa na̱ꞌkha̱ a̱kha̱ꞌ. 13 Xúꞌkhue̱n máꞌ ndi̱ñu̱ú atsúun gíñá ꞌguéen tsí xómá smajya jaꞌñúú. Mbáa̱ nigájnuu ná rawuun a̱bo̱ꞌ xkawi̱i̱ꞌ tsí phú mba̱a̱ jamí maña̱a̱ꞌ, i̱mba̱a̱ꞌ nigájnuu ná rawuun xu̱kú xkawi̱i̱ꞌ, jamí i̱mba̱a̱ꞌ nigájnuu ná rawuun tsí na̱gu̱wíjnga̱a ajngáa mi̱nduwa. 14 Tsíge̱ꞌ ñajúún gíñá ꞌguéen tsí nune̱ rí phú wáá. Jamí nagájnúu̱ rí mu̱ru̱wii̱n mbá xúgíin thúngaa numbaa kajngó ma̱tsa̱ñúu̱ gajmíi̱ Ana̱ꞌlóꞌ tsí gíꞌdoo mbá xúgíí tsiakhe̱, ído̱ gága̱nú mbiꞌi rí phú mba̱a̱ rí niꞌgí Ana̱ꞌlóꞌ. 15 («A̱gu̱ya̱álaꞌ rí ikhúúnꞌ nda̱a̱ ajngóo gáꞌkha xómá na̱ꞌkha̱ mbáa ku̱ꞌwá. Phú gagi inuu tsí xtáa̱ máꞌ na̱ma̱ñuu jamí júwuun máꞌ xtíñuu, kajngó ma̱xángrigo̱o̱ꞌ tsaꞌtsaa̱, jamí ma̱xáti̱yu̱u̱ꞌ».) 16 A̱ꞌkhue̱n rí gíñá ꞌguéen ni̱ru̱wi̱in mbá xúgíin thúngaa numbaa ná xkua̱ rí mbiꞌyuu «Armajedón» ná ajngáa ebréo̱.

17 Ánje̱l tsí juwaan nixídí-raꞌee̱ ná inuu gíñá rí gajno̱ꞌ ná awúun xúba̱ me̱jno̱ꞌ, a̱ꞌkhue̱n nigájnuu mbá a̱ꞌwá gakhe̱ ná ꞌgí xíli̱i thúngaa, rí ꞌgí ná awúun guꞌwá dxákuun ná mikhuíí. Xáꞌnii niꞌthán a̱ꞌwá rúꞌkhue̱n: «Wámba̱ mbá xúgíí rá». 18 Nda̱wa̱á a̱ꞌkhue̱n, nixpíbi mbaꞌa nothon, phú wee niwán mbaꞌa nothon jamí nixma mi̱ndaꞌkho ná numbaa. Asndo nákhí máꞌ júwa̱ꞌ xa̱bo̱ ná numbaa, ni miꞌtsú túyáa̱ rí naxma xkuaꞌnii gakhe̱ guéño. 19 A̱ꞌkhue̱n niwiꞌthángaa atsú kuthiin xuajen rí phú mba̱a̱ mbiꞌyuu Babilónia̱, jamí wámba̱-ri̱ga̱a mbaꞌa xuajen rí ríga̱ ná tsu̱du̱u̱ numbaa. Xkuaꞌnii támbumuu Ana̱ꞌlóꞌ jaꞌyoo xuajen mba̱a̱ Babilónia̱, kajngó niꞌnii̱ rí mu̱drígú jamínu̱ꞌ xa̱bo̱ xuajen rí mu̱wa̱a̱n iya miꞌkhu̱u̱n rí najiꞌnáa Ana̱ꞌlóꞌ. 20 Rí xkuaꞌnii nixma, mbá xúgíí ju̱ba̱ꞌ rí tuaꞌán ná awúun iya a̱pha̱ ninguaꞌán ne̱ ná awúun iya, xúꞌkhue̱n máꞌ mbá xúgíí júba̱ ningudi-ri̱ga̱a ne̱. 21 Jamí nifrigu iꞌtsí rí mba̱ꞌwo̱ mi̱ndaꞌkho* ná mikhuíí, nixnúu idxu̱ún xa̱bo̱. Xómáꞌ xa̱bo̱ nithan-xkawíi̱ꞌ Ana̱ꞌlóꞌ ga̱jma̱á numuu iꞌtsí rúꞌkhue̱n, numuu rí mbá jamínu̱ꞌ rí gakhe̱ mi̱ndaꞌkho ñajuun ne̱.