1 A aa'wan a ta'atsu o tsugono tsa Sayiru mogono ma Pashiya, o roco ta̱ Daniya za na a̱ tsu ɗe Belteshaza alavu alavu. Ikaka ya̱ yi amayun a ɗa waru u ta̱ aɗa a̱ a̱ba̱jini o uvon. Ucuɗuwu wi ikaka'a u ta̱wa̱ yi ta̱ a̱tsuma̱ alavu alavu.

2 A mantsa mo ndolo a̱mu Daniya, n yuwan ta̱ a̱tsumola̱ngu ajuma a ta'atsu. 3 A̱tsuma̱ a ajuma a ta'atsu o ndolo n lyuwa ilyalya yu uyo'o shi, ko nama n tama shi ko n sowo masayan ma̱ ina̱bi waru n sukuma mani'in shi ko ke'en.

4 O urana wu ushin na̱ a̱za̱ a̱ na̱shi o woto wu ufaru, n da̱na̱ ta̱ mishin a̱ nge'en mu Uɗolu wa̱ Tigiris, 5 a̱vu n 'ya̱sa̱n aci zuva ɗaɗa me enei vuma wotowu ni itana yo okoro, na̱ gbakala na a yuwain na̱ zinariya can e ikyun ya̱ yi. 6 Lipu va̱ yi da̱na̱ ta̱ ne ekan cine vu revei aatali e ikebe a kirisola, urewesu wa̱ yi waru cine vu revei imaɗatsu, esu a̱ yi waru cine vu revei elentsu a akina, ekere na ana a̱ yi a ta a madala tsu rumushili na o gboroi, mesun mo uɗyo ma̱ yi cine vu revei uɗyo wa̱ a̱ba̱jini o oɓolo a ama.

7 A̱mu Daniya, a̱mu ɗa goon me enei alavu alavu'u, ama a na a̱ da̱na̱i oɓolo na̱ a̱mu gba e ene alavu alavu'u shi, amma wovon wa̱ a̱bunda̱ u reme le ta̱ hali a suma, a̱vu a pa'an. 8 Ɗaɗa a lyawa numu a̱ nde'en ɗaɗa gba me enei a̱ba̱jini a alavu alavu'u, reve waru mo o'wo babu ucira. Urewesu u va̱ waru u vadala ta̱ a̱bunda̱ lon, lipu va̱ waru kuwa̱ ta̱. 9 A̱vu mu uwwa yi a adanshi a̱vu n zuwaa yi atsuvu, ɗaɗa n lantsai kwin, nu urewesu u va̱ ma̱kpa̱ɓa̱.

10 A̱vu ukere u ju'wa̱in mu a̱vu u zuwa mu n kingyo e ekere a̱ va̱ na̱ a̱ a̱lu a̱ va̱ e meje'en. 11 A̱vu u damma mu, <<A̱vu Daniya, ili yi icigi ya̱ a̱bunda̱ a ɗa e ekere a̱ A̱sula̱, vu zuwa atsuvu e ili i na maa damma wu. Vu 'yon mishin, adama a na uba̱ta̱ wa̱ wu u ɗa a̱ lyungu numu.>> A̱yi a̱tsuma̱ a adanshi tsundolo, a̱vu n 'yon mishin, a̱vu n uwa meje'en.

12 Reve u damma mu, <<Daniya, she vu uwwa wovon wan. Diga o urana wu ufaru u na vu zuwai okolo a̱ wu vu zami urevu, a̱vu vu ka̱ɗa̱to aciya̱wu a̱ ma̱ka̱ka̱n ma̱ A̱sula̱ a̱ wu a uwwa ta̱ ipati ya̱ wu, ɗaɗa n ta̱wa̱yi. 13 Amma mogono mo tsugono ma Pashiya ma̱ piri ta̱ nla̱ngi na̱ a̱mu hali rana ushin na̱ za ta̱. Amma malingata ma̱ A̱sula̱ Mika'ilu za ta̱ a̱tsuma̱ a azagbain, u ta̱wa̱ ta̱ u kamba mu, adama a na a̱ guza̱ mu ta̱ lo uba̱ta̱ u mogono ma Pashiya. 14 Gogo n ta̱wa̱ ta̱ n cuɗuwa wu ili i na yaa cina ama a̱ wu nda elime, adama a na alavu alavu'u u ta yuwusan aɗa a mantsa me elime.>>

15 A̱yi a dansaa mu idanshi i nda, a̱vu n ka̱ɗa̱to urewesu u va̱ e iɗa, a̱vu mo o'wo kpen, n yuwan adanshi shi. 16 A̱vu nanza oroci a vuma ju'wa̱n una̱ u va̱, ɗaɗa m kpa̱tu'wa̱i una̱ u va̱ a̱vu n fara adanshi. A̱vu n damma za na ri mishin zuzu na̱ a̱mu, <<U ɓa̱la̱ mu ta̱ adama a alavu alavu a nda, zagbain va̱, waru m buwa nu ucira shi. 17 Cine tsa ɗa a̱mu aagbashi a̱ wu a yuwan adanshi na̱ a̱vu zagbain va̱? Gogo tsunda m buwa nu ucira shi, waru m buwa na̱ wivuwun gben shi.>>

18 A̱vu waru za na rotsoi vuma'a u ju'wisa̱n mu a̱vu u ca mu ucira. 19 A̱vu u damma mu, <<A̱vu na vu tsura̱i icigi ya̱ a̱bunda̱ e ekere a̱ A̱sula̱, she vu uwwa wovon wan, lyawa asuvu a̱ wu a̱ da̱nu, vu da̱na̱ nu ucira no okolo ugbamu.>> A̱yi a yuwusan adanshi na̱ a̱mu, a̱vu n tsura̱ ucira a̱vu n damma, <<Zagbain va̱ yuwan adanshi, adama a na vu ca numu ucira.>>

20 A̱vu u damma, <<Vu reve ta̱ ili i na i zuwai n ta̱wa̱i ya̱'a̱ wu? Gogo nda n ta̱ ka̱mba̱ n yuwan uvon na̱ mogono ma Pashiya, na̱ n ka̱ra̱ mogono ma̱ Heleni ma̱ ta̱ ta̱wa̱. 21 Agba n ta damma wu ili i na i ri uɗanu a̱tsuma̱ a Aatagada a Amayun. Babu za na kamba numu uvon na̱ nan ruhu o ndolo she Mika'ilu, zagbain va̱ wu.