1 A aa'wan a ta'atsu o tsugono tsa Belshaza alavu alavu a̱ ta̱wa̱ mu ta̱ a̱mu Daniya, babu na̱ za na me enei nu ufaru. 2 A̱tsuma̱ a alavu alavu a̱ va̱ me ene ta̱ aciya̱va̱ o ukari wa Susa upasu wa Elam, a alavu alavu'u n da̱na̱ ta̱ o Uɗolu wa Ulai. 3 A̱vu n 'ya̱sa̱n esu a̱ va̱ zuva a̱vu me ene a̱a̱giri'i mishin a̱ mɓa̱nga̱ mu uɗolu'u. U da̱na̱ ta̱ na avana e re, avana'a ra a̱ da̱na̱ ta̱ uga'an, amma za ta̱ la'a ta̱ za ta̱. Agba za na la'ai uga'an a̱yi ɗa u koso uta̱i. 4 Me ene ta̱ a̱a̱giri'i a̱ za̱ɓa̱luwusa̱ a̱ tyo a̱livu nu ugana nu uyagi. Babu nama na gura isawain nla̱ngi na̱ a̱yi, babu waru vuma na aa gura wawa za ro o ucira wa̱ yi. U yuwan ta̱ cine u cigai a̱vu waru wo o'wo zagbain.

5 A̱mu pe a̱tsuma̱ a majiyan me ili i na me enei, a̱vu ma̱ga̱ji mo uta̱ ɗe a̱livu, a̱vu u paɗalulai uvaɗi ma̱ɓula̱ agba u ju'wa̱in iɗa shi ko ke'en. A̱yi ma̱ga̱ji'i u ta̱ na azangaga a aavana e memere me esu a̱ yi. 6 U ta̱wa̱ ta̱ uba̱ta̱ wa̱ a̱a̱giri'i a na a̱ ri na avana e re'e, za na me enei mishin o uɗolu'u, a̱vu u zura̱ yi nu upan lon. 7 A̱vu waru me ene yi u zura̱ a̱a̱ga̱ri'i'i nu upan lon. A̱vu u gama yi hali wu kuɗa avana e re a na u ri na̱ a̱yi. Agba a̱a̱giri'i'i u ri nu ucira u na waa gura yuwan nla̱ngi na̱ a̱yi shi. A̱vu ma̱ga̱ji ma vari yi e iɗa hali wu dasa yi. Babu za na gura wawai a̱a̱giri'i'i e ekere a̱ ma̱ga̱ji'i. 8 A̱vu ma̱ga̱ji'i u yuwan ucira a̱bunda̱ lon, amma ana u da̱na̱i nu ucira a̱bunda̱ lon, a̱vu aavana a na a̱ da̱na̱i nu ucira'a u kuɗa, o una̱ wa yi a̱vu avana a̱ na̱shi o uta̱ a̱ ka̱lyuwusa̱ pepu vu pasu na̱shi va zuva, ele ɗa asana na̱ a̱livu nu ugana oɓolo nu uyagi.

9 A̱tsuma̱ a za ta̱ le a̱vu mavana mo ro mo uta̱, reve u yuwan ucira lon hali u rawa uyagi na asana ni Iɗa i Sa'ani. 10 U yuwan ta̱ mgbain hali u rawa oɓolo e ili i na a yuwain zuva. A̱vu u vari oɓolo a̱ a̱soja a zuva o ro ni italyo'o i ro a̱ tyo e iɗa a̱vu wu dasa le. 11 U ka̱mba̱to ta̱ aciya̱yi na̱ tsugbain cine vu revei Yali yo oɓolo ya̱ a̱soja a zuva. Reve a putsa na̱ kucci na a tsu yuwusaan yi kuci, a̱vu a̱ lungusa̱ uba̱ta̱ wa akiza wa̱ yi. 12 Adama e iwuya ya̱ a̱bunda̱, a̱vu a ca yi oɓolo aza a akiza na̱ kucci na a casu usana suru. U lyuwa ta̱ elime a̱tsuma̱ e ili i na u yuwain suru, a̱vu a vari amayun e iɗa.

13 A̱vu mu uwwa za va akiza ta̱ aa yuwusan adanshi, a̱vu waru za va akiza ta̱ damma za na yuwain adanshi'i, <<Ujumu u ne waa jima kafu alavu alavu'u u shiwan, a̱yi alavu alavu a̱ kucci vu usana suru nu unusu u na u tsu ta̱wa̱ nu ulungusu nu ucasu wa̱ a̱a̱'isa̱, reve waru a dasa oɓolo a̱ a̱soja a zuva za̱la̱ va ana?>>

14 Reve u damma mu, <<U ta tara ayin nu usana ukpakukupa ure nu ukpakuta'atsu (2,300), a̱vu a suwisa a̱a̱'isa̱'a̱.>>

15 Ana a̱mu Daniya me enei alavu alavu'u, n zami ta̱ ure u na ma̱a̱ tsura̱ urevu wa̱ yi. A̱vu me ene za ro mishin elime a̱ va̱ oroci a vuma. 16 A̱vu mu uwwa uɗyo u vuma ro ɗe o Uɗolu wa Ulai e ɗesu, <<Jibura'ilu, cuɗuwa vuma nda urevu wa alavu alavu'u.>>

17 A̱vu u ta̱wa̱ zuzu nu uba̱ta̱ u na n ri mishin. Ana u ta̱wa̱i, mu uwwa ta̱ wovon a̱vu n riya̱ ma̱kpa̱ɓa̱. Agba a̱vu u damma mu, <<Mawun ma vaɗilima̱, vu reve a na alavu alavu a nda adama a mantsa mo ukosu ma ɗa.>>

18 A̱yi a adanshi na̱ a̱mu, a̱vu n lantsa kwin nu urewesu u va̱ ma̱kpa̱ɓa̱. A̱vu u ju'wa̱n mu a̱vu u 'ya̱sa̱n mu mishin.

19 Reve u damma mu, <<N ta damma wu ili i na yaa fara a mantsa ma na ma̱a̱ ta̱wa̱ a mantsa ma na A̱sula̱ oo roco upan wa̱ yi. Adama a na alavu alavu'u u ta yuwusan adanshi a mantsa ma na a zuwai mo ukosu. 20 Adama a̱ a̱a̱giri'i a na ve enei na avana e re, u ta̱ a̱ nden mu ngono ma Pashiya na̱ Midiya. 21 A̱yi waru ma̱ga̱ji mo ndolo u ta̱ a̱ nden m mogono ma Heleni. A̱yi a̱ba̱jini a aavana o ndolo gba a na a̱ ri e memere me esu, u ta̱ a̱ nden m mogono mo ufaru. 22 Avana a̱ na̱shi gba aza a na o uta̱i o una̱ wu za na a kuɗai a̱ ta̱ u ta̱ a̱ nden n tsugono n na̱shi tsa na tsa̱a̱ 'yon e iɗa ya̱ yi, agba a̱ da̱na̱ na̱ cu'un vu ucira va̱ yi shi.

23 <<O ukosu u tsugono tse le, mantsa ma na makundatsu me iwuya me le ma shiwain, mogono ma wuya mo ro ma̱ ta̱ 'yon, za va wa aciyogbamu, mogono ma̱ wulumusa̱. 24 U ta̱ da̱na̱ nu ucira lon, amma nu ucira wa̱ yi u ɗa shi. U ta̱ ta̱wa̱ nu ulungusu u wovon wa̱ a̱bunda̱ lon, e ili i na waa yuwusan suru waru u ta lyuwa aci. U to kototo ama a gbagbain oɓolo na ama a akiza. 25 A̱tsuma̱ o ugbozu u vama wa̱ yi u ta zuwa wulumusa̱ u yuwan a̱bunda̱. A̱tsuma̱ o okolo a̱ yi, u ta tara aciya̱yi zagbain. Babu urevu ɗaɗa woo kototo ama na̱ a̱bunda̱. Waru u ta zami Zagbain va azagbain nla̱ngi, amma gba a ta kukuɗa yi agba nu ucira u vuma u ɗa shi.

26 <<Alavu alavu a ayin nu usana a na a dammai amayun a ɗa, amma gba vu lyawa yi usokowu, adama a na u ta yuwusan adanshi a rana va̱ a̱bunda̱ ve elime.>>

27 A̱mu Daniya, n ta̱ka̱luwa̱ ta̱ reve m banakan rana meketeci. A̱vu n 'yon n reme ulinga u mogono. A̱mu gba alavu alavu o ndolo a zuwa mu ta̱ mo o'wo wuda'un, waru n tsura̱ urevu wa̱ yi shi.