1 Urana u ro Mogono Belshaza mo foɓo ta̱ a̱ba̱jini a̱ a̱buki adama a azagbain a̱ yi ele ama ukpakukupa (1,000). Mogono mo sowo ta̱ masayan ma̱ ina̱bi oɓolo ne ele. 2 Ana Belshaza peɗei masayan ma̱ ina̱bi mo ndolo, reve u zuwa a̱ ta̱wa̱a̱ na̱ mukoto n zinariya na aza a azurufa adama a aciya̱yi na azagbain a̱ yi, na̱ a̱ma̱ci a̱ yi oɓolo na̱ a̱ma̱ci a̱ nge'en, adama o sowoo. Mukoto n ndolo gba a̱ ta̱ pe a̱tsuma̱ e ili i na Nebukanaza dada va̱ yi pura̱i a̱ A̱a̱'isamapaɗa Urishelima. 3 A̱vu a̱ ta̱wa̱ na̱ mukoto n zinariya n na a̱ pura̱i a̱tsuma̱ a̱ A̱a̱'isamapaɗa a̱ A̱sula̱ a̱tsuma̱ a̱ Urishelima, a̱vu a̱yi mogono na azagbain a̱ yi, na̱ a̱ma̱ci a̱ yi oɓolo na̱ a̱ma̱ci a̱ nge'en a̱ yi o sowo ne ele. 4 Ana o sowoi masayan ma̱ ina̱bi'i, a̱vu e reme a cuwusa musula̱ n le n na a yuwain na̱ zinariya na̱ azurufa oɓolo na̱ rumushili, ni irumu na̱ ɗanga oɓolo na atali.

5 Babu urevu ɗaɗa e enei akatsu a vuma o uta̱i a yuwusan iɗana uba̱ta̱ u na a surai o uɓaɓu wu ukobu u mogono, a̱ nka̱la̱la̱i na̱ wisawatan u fitila. Mogono me ene ta̱ ukere'e e iɗana. 6 A̱vu urewesu u mogono u lukuta̱. A̱vu majiyan ma̱ yi ma ca yi wovon. Reve waru a̱la̱ta̱ a̱ lipu va̱ yi a̱ kuwa̱. A̱vu a̱lu a̱ yi waru e reme ugamulai.

7 A̱vu mogono ma yuwan ɗewu na̱ a̱ba̱jini o uɗyo a̱ ta̱wa̱a̱ na̱ a̱za̱ a̱ yindi, na̱ a̱za̱ o urevu na aza a avasa a̱ a̱ma̱li. Ɗaɗa u yuwain adanshi na̱ a̱za̱ o urevu'u u damma, <<Za na suru gura ɗeyinuna̱ iɗana i nda, reve u gura damma mu urevu wa̱ yi suru, to, o oto yi utugu wu shili u ma̱ɗiya̱, a̱vu o oto yi iliyinlu i zinariya, a̱ ta̱ waru a ca yi wo o'wo zagbain ta'atsu a̱tsuma̱ a tsugbain tsugono'o.>>

8 A̱vu a̱za̱ o urevu o mogono'o suru a uwa, agba a gura ɗenuna̱ iɗana'a shi ko a gura damma yi urevu wi ili'i shi. 9 A̱vu Mogono Belshaza ma da'wan lon, reve urewesu wa̱ yi u lukuta̱. Reve fo azagbain a̱ yi a̱ ra̱pula̱.

10 A̱vu ana Egbere mma mogono ma uwwai uɗyo u mogono oɓolo na azagbain a̱ yi, a̱vu u ta̱wa̱ uba̱ta̱ wa̱ a̱buki'i, reve u damma, <<Wuma wa̱ wu u jima mogono! She vu da'wan wan. Waru she vu lukuta̱ urewesu wan! 11 Vuma ro ta̱ pe a̱tsuma̱ o tsugono tsa̱ wu u ta̱ na̱ ruhu musula̱ ma̱ akiza a̱tsuma̱ a̱ yi. A rana va dada va̱ wu, a cina yi ta̱ nu urevu nu uguru nu ugbozu cine vu revei musula̱. Mogono Nebukanaza dada va̱ wu, dada va̱ wu mogono, u zuwa yi ta̱ wo o'wo zagbain va̱ a̱za̱ a̱ yindi, no ozo o tsuboci na̱ a̱za̱ o urevu na aza a avasa a̱ a̱ma̱li. 12 A̱yi vuma nda Daniya, za na mogono ma cayi aala Belteshaza, a̱ ta̱wa̱ ta̱ e reve a na u ri na̱ ruhu vu urevu nu urevu nu uguru. Waru u ta̱ nu uguru u na waa cuɗuwa alavu, waru u cuɗuwa oroci e yitele, a̱vu waru u gura pa̱lu'wa̱ ili i na i ri usa̱n. Ɗeyi Daniya, u ta gura damma urevu wi iɗana i nda.>>

13 Ɗaɗa a̱ ta̱wa̱i na̱ Daniya a̱ ma̱ka̱ka̱n mo mogono. Reve mogono me ece Daniya, <<A̱vu ɗaɗa Daniya'a, a̱tsuma̱ a aza a na dada va̱ pura̱i diga Yahuda'a? 14 Mu uwwa ta̱ a na ruhu musula̱ n to oɓolo na̱ a̱vu waru vu ta̱ nu uguru, waru vu ta̱ nu ugbozu u na u ka̱ra̱la̱i. 15 A̱ ta̱wa̱a̱ mu ta̱ na aza a na a̱ ri nu ugbozu na̱ a̱za̱ a̱ yindi tsa̱ra̱ e ɗe iɗana i nda, nu una̱ agba ele a gura reve shi, a gura ca mu ucuɗuwu wi ili i na i ri uɗanu shi. 16 Mu uwwa ta̱ na vu tsu gura ta̱ cuɗuwa waru vu tsu gura ta̱ kakasa addama o usa̱n. Na̱ vu gura ɗe iɗana i nda nu una̱, waru vu gura cuɗuwa mu urevu wa̱ yi, to, o to oto wu utugu u tsugono u shili u ma̱ɗiya̱ reve o oto wu iliyinlu i zinariya. A ta ca wu tsugbain tsa ta'atsu a̱tsuma̱ o tsugono tsa nda.>>

17 Reve Daniya usu mogono, <<Wuma wa̱ wu u jima! Vu ta gura ɓa̱na̱ ne'e va̱ wu, ko vu ca nanza. Na̱ ne suru n ta ɗewe wu nu una̱ iɗana i nda, a̱vu n cuɗuwa wu urevu wa̱ yi. 18 Mogono, Mogono ma̱ A̱sula̱ ma ɗa ma cayi dada va̱ wu Nebukanaza tsugono na̱ tsugbain reve waru u 'ya̱sa̱n yi zuva. 19 Waru adama a tsugbain tsa na u ca niyi, a̱vu ama suru, na̱ nɗa ne elentsu a uwwa wovon waru e je'en lipu a̱ ma̱ka̱ka̱n ma̱ yi. Aza a na u cigai wu una a̱vu wu una, aza a na u cigai u lyawa wuma a̱vu u lyawa le wuma, aza a na u cigai u 'ya̱sa̱n le zuva a̱vu u 'ya̱sa̱n le zuva aza a na waru u cigai u ka̱ɗa̱to e iɗa a̱vu u ka̱ɗa̱to le e iɗa. 20 Ana okolo a̱ yi a gbawai a̱vu wo o'wo tapu nu uvaɗu, a̱vu a̱ cipa̱to yi o ootogu o tsugono'o, a̱vu waru a kasa yi na̱ tsugbain tsa̱ yi. 21 A̱vu a̱ gba̱ra̱ yi a̱tsuma̱ a ama reve a ca yi okolo a nama vu una, a̱vu u da̱nu oɓolo na̱ nloli mu una a̱vu u tamusa anlya tsi inan, a̱vu waru lipu va̱ yi re'we na a'iza a zuva, she na u ta̱wa̱ u revei na Mogono ma̱ A̱sula̱ ma ɗa maa yuwusan tsugbain e ekere o tsugono tsa ama, waru u tsu ca ta̱ za na suru u cigai u ca.>>

22 <<Amma a̱vu gba mawun ma̱ yi, Belshaza, koto vu ka̱ɗa̱to aciya̱wu shi, ko na vu revei ili i nda biti. 23 Ana vaa yuwan tsundolo, a̱vu vu rocowo Zagbain va zuva ugbawu, a̱vu vu zuwa a̱ ta̱wa̱a̱ wu na̱ mukoto n na n ri pe a̱tsuma̱ o u'wa wa̱ yi. A̱vu na azagbain a̱ wu, oɓolo na̱ a̱ma̱ci a̱ wu na̱ a̱ma̱ci a̱ nge'en a̱ wu a̱vu i sowo ne ele. A̱vu i cuwa musula̱ n zinariya na aza a azurufa, na̱ a̱za̱ a̱ rumushili ni irumu oɓolo na̱ ɗanga na atali, aza a na a tsu gura ene shi agba a uwwa shi ko e reve ili i ro. Agba vu ca A̱sula̱ za na wuma wa̱ wu na̱ re va̱ wu ri e ekere a̱ yi tsugbain shi. 24 A̱yi ɗa ili i na i zuwai A̱sulazuva a̱ lyunguyi ukere u ndolo u yuwan iɗana.>>

25 <<Apa nda iɗana i na a yuwain: MENE, MENE, TEKEL, NA̱ PASHI.

26 <<Apa urevu wi idanshi'i, MENE: A̱sula̱ e kece ta̱ rana tsugono tsa̱ wu a̱vu u ta̱wa̱to le o ukosu.

27 <<TEKEL: O rito ta̱ ume wa̱ wu e ili yu uritosu a̱vu a cina wu vu ka̱la̱ma̱.

28 <<PERES: E eneshe ta̱ tsugono tsa̱ wu a̱vu a ca aza a Midiya na aza a Pashiya.>>

29 Babu usa̱n a̱vu mogono Belshaza zuwa o oto Daniya utugu wu ushili u ma̱ɗiya̱ a̱vu waru o oto yi iliyinlu i zinariya. A̱vu a lapa ulingi a na a ca yi ta̱ tsugbain tsa ta'atsu a̱tsuma̱ o tsugono tsi iɗa'a.

30 A̱tsuma̱ a ayin o ndolo a ɗa o unai Belshaza, mogono ma Babila. 31 A̱vu Dariyu vuma va Midiya ushi tsugono'o a̱yi na a'wan kupota̱li ne ejere.