1 <<A̱tsuma̱ a aa'wan o ufaru wa Dariyu za va Midiya, a̱vu m piri adama n kamba waru n geshe yi.

2 <<Gogo tsunda, n ta damma wu amayun. A̱ ta̱ da̱shi yuwan ngono n ta'atsu a̱tsuma̱ a Pashiya, za va̱ na̱shi le ta la'a suru nle utsuru a̱bunda̱ lon. Nu u usa ucira nu utsuru wa̱ yi, u ta zuwa vuma suru yuwan uvon na̱ tsugono tsa Heleni. 3 A̱vu wo o'wo mogono ma gbain ma̱a̱ 'yon, za na aa yuwan tsugono nu ucira lon, a̱vu waru u yuwan cine u cigai. 4 Amma na̱ tsugono tsa̱ yi tsa yuwan ucira, tsugono'o u te ne'eshen, waru e te ne'eshen yi ba̱ta̱ na̱shi, a̱ tyo pasu na̱shi va zuva. Tsugono'o wee tyo o ugundo wa̱ yi shi, waru aa yuwan tsugono nu ucira cine a̱yi u yuwain shi, adama a na a ta usa tsugono tsa̱ yi a̱vu a ca ozo o ro.

5 <<Mogono mo Uyagi ma̱ ta̱ da̱na̱ nu ucira, amma vuma ta̱ a̱tsuma̱ a nan yali va̱ yi, u ta̱ tsura̱ ucira u la'a yi, waru tsugono tsa̱ yi tsa̱ ta̱ da̱na̱ ucira lon. 6 Na a yuwan a'wan a̱bunda̱ a̱ ta̱ da̱na̱ a̱ nsa̱la̱la̱i. Usheli u mogono mo Uyagi ma̱ ta̱ 'ya̱wa̱ uba̱ta̱ u mogono mo Ugana a yuwan nsa̱la̱la̱i, agba wa̱a̱ da̱na̱ nu ucira wa̱ yi shi, a̱yi waru na̱ tsugono tsa̱ yi, tsa jima shi. A rana ndolo u ta̱ uwa e ekere a za ro, ne esheli o ushewusun a̱ yi oɓolo na aabara a̱ yi na aza a na a̱ guza̱a̱ niyi ikyun.

7 <<Vuma ta̱ a̱tsuma̱ o ugundo wa̱ yi u ta̱ 'yon a̱vu u ushi uba̱ta̱ wa̱ yi. U ta yuwan uvon na̱ a̱soja o mogono mo Ugana a̱vu u uwa o ukari wa̱ yi, u ta yuwan uvon ne ele a̱vu gba u lyuwa aci. 8 Babu na̱ a̱yi ndolo, u ta usa musula̱ n le oɓolo na̱ she'en na a yuwain, u 'ya̱wa̱ ne ele Masar. Waru u ta̱ pura̱ itana i na a yuwain na̱ azurufa na̱ zinariya a na a̱ ri ni ikebe. A ta yuwan a'wan na̱ a̱bunda̱ a̱a̱ 'ya̱wa̱a̱ mogono mo Ugana nu uvon shi. 9 Na̱ a̱ca̱pa̱ a̱vu mogono mo Ugana ma uwa e iɗa i mogono mo Uyagi nu uvon, agba u ta̱ ka̱mba̱ e iɗa ya̱ yi. 10 Muwun ma̱ yi n to foɓo uvon a̱vu u ɓoloto a̱soja a̱ a̱bunda̱, aza a na a̱a̱ 'yon a̱vu a uwulai a̱tsuma̱ e iɗa'a cine vu revei a̱ba̱jini a̱ mini, a̱vu a̱ 'ya̱wa̱ nu uvon hali a rawa o ukari wa̱ yi.

11 <<A̱vu mogono mo Uyagi ma̱ 'ya̱wa̱ ma yuwan uvon na̱ mogono mo Ugana nu upan wa̱ a̱bunda̱ za na oo foɓo a̱soja a̱ a̱bunda̱, amma o ukosu a ta lyuwa yi nu uvon. 12 Na̱ a̱ pura̱ a̱soja'a, a̱yi mogono mo Uyagi ma ta shiwan nu uvaɗu waru u to una ukpakukupa a̱bunda̱, amma na̱ ne suru ulyuwu wa aci wa̱ yi waa jima shi. 13 Mogono mo Ugana'a u ta̱ 'ya̱sisa̱n a̱ba̱jini o oɓolo a̱ a̱soja u la'a za vu ufaru. Na a yuwan a'wan o ro, u te reme ure na̱ a̱ba̱jini o oɓolo a̱ a̱soja ni itana yu uvon ya̱ a̱bunda̱ lon.

14 <<A mantsa mo ndolo ama a̱bunda̱ a ta yuwan uvon na̱ mogono mo Uyagi. A̱za̱ o u'ya̱susa̱n wu ugbozu o ro a̱tsuma̱ a ama a̱ wu a̱ ta̱ 'yon na aɗa a na oo shiton alavu alavu'u, agba a̱ ta̱ riya̱. 15 Amma a̱yi gba mogono mo Ugana ma̱ ta̱ ta̱wa̱ a̱vu o ɓoloto ma̱bula̱ a̱vu a kumba e reme lyuci vu ucira'a. A̱soja o Uyagi a gura isawan shi, ko a̱soja a na a gurai uvon aza a na a zagwai, a ta lamba ucira u na ee isawan. 16 A̱yi gba mogono mo Ugana za na ta̱wa̱a̱ niyi nu uvon u ta yuwan cine u cigai, waru babu za na aa gura isawan elime a̱ yi. U ta lyuwa aci a̱vu wo o'wo ni Iɗa i Sa'ani'i. U ta̱ da̱na̱ nu ucira wu ukototosu. 17 U ta ciga u ta̱wa̱ nu ucira u tsugono tsa̱ yi suru a̱vu u yuwan a̱sa̱la̱ na̱ mogono mo Ugana. U ta ca yi usheli u zuwa adama u usa tsugono'o, amma waa lyuwa aci e ifoɓi ya̱ yi shi waru waa kamba yi shi. 18 Na̱ a̱yi ndolo koto, u ta vadala urewesu wa̱ yi a̱vu u 'ya̱wa̱a̱ upasu wu tyo mala ndeɗe nu uvon, a̱tsuma̱ e le u ta lyuwa le na̱ a̱bunda̱. Amma yali ya̱ a̱soja ro ta̱ ta̱wa̱ u kototo uvaɗu u mogono'o, a̱vu waru u zuwa uvaɗu wa̱ yi u ka̱mba̱ a aciya̱yi. 19 Reve u vadala a̱vu u ka̱mba̱ uba̱ta̱ u na u ri nu ukari e iɗa ya̱ yi, agba u ta̱ ta̱ɗa̱tsa̱ a̱vu u riya̱, a̱a̱ da̱shi ene yi waru shi.

20 <<Vuma na a̱a̱ ushi o ukere wa̱ yi u ta̱ lyungu za vu ushishi wu utafa adama tsugbain tso tsugono tsaa lyuwa elime. Agba a jima shi a̱vu o una yi, agba adama o upan wu za ro ɗa shi ko a̱tsuma̱ o uvon shi.

21 <<Za na a̱a̱ ushi o ukere wa̱ yi ama aa tara yi ili i ro shi, vuma na ri na agadu o tsugono shi. U ta usa tsugono'o a mantsa ma na ama e enei a̱ ta̱ a̱ nden n lafiya, u ta usa yi ni ikpa'a. 22 U to kototo a̱soja cine vu revei a̱ba̱jini a̱ mini, reve u foɗo zagbain na a̱ kurusu akucunu a̱ A̱sula̱. 23 Mantsa ma na a yuwain nsa̱la̱la̱i na̱ mogono'o, u ta̱ ta̱wa̱ u yuwan ugbozu u vama, a̱vu u yuwan ucira na ama wa'a. 24 Babu urevu a̱vu u ta̱wa̱a̱ pasu vi iɗa na la'ai utsuru uvon, u yuwan ili i na nkaya ma̱ yi n koto n yuwain shi, ko nkaya mu nkaya ma̱ yi. U te ne'eshee aza a na o wo'oso yi ucina̱ itana ya aza a na u pura̱i a mantsa mo uvon. A̱vu waru u yuwan ifoɓi u 'ya̱wa̱a̱ ba̱ta̱ na ri na̱ kari uvon, amma adama a mantsa ma wa'a ma ɗa.

25 <<U ta̱ tsura̱ ucira wo okolo u na wa̱a̱ 'ya̱wa̱a̱ mogono mo Uyagi nu uvon no oɓolo a̱ a̱soja a̱ a̱bunda̱. Mogono mo Uyagi ma ta yuwan uvon no oɓolo a̱ a̱soja o ucira lon, amma waa gura isawan shi adama e ifoɓi yi ikpa'a na aa yuwaan yi. 26 Aza a na a lyuwusa ilyalya oɓolo na̱ a̱yi a ta ciga o kototo yi, reve e iza̱ a̱soja a̱ yi, na̱ a̱bunda̱ gba e le a̱ ta̱ kuwa̱. 27 Ele ngono n re nda a̱ ta̱ da̱na̱ ni ifoɓi i na oo unula̱i, a̱ ta̱ da̱nu uba̱ta̱ u ta̱ a yuwusaan aciyele epen. Amma a̱yi ndolo suru ili i ɗa shi, adama a na ukosu u ta̱ ta̱wa̱ a mantsa ma na a zuwai. 28 Mogono mo Ugana ma̱ ta̱ ka̱mba̱ e iɗa ya̱ yi nu utsuru wa̱ a̱bunda̱ lon, amma okolo a̱ yi a̱ da̱na̱ ufoɓu u na waa yuwan nla̱ngi na aza a na oo tono akucunu a akiza. U ta yuwan ifoɓi ya̱ yi cine u cigai a̱vu u ka̱mba̱ e iɗa ya̱ yi.

29 <<A mantsa ma na A̱sula̱ a zuwai, a̱vu u ka̱mba̱a̱ Uyagi nu uvon, agba a mantsa mo ndolo ili ya̱a̱ da̱na̱ tsu za vu ufaru shi. 30 Adama a na ama a̱ ta̱ ta̱wa̱ na antsun o uvon diga Kitim* a̱ 'ya̱sa̱n nla̱ngi na̱ a̱yi, a̱yi gba u ta uwwa wovon a̱vu u bula, a̱vu u ka̱mba̱ nu upan wa̱ a̱bunda̱, a̱vu u puvu upan wa̱ yi a̱ tyo e ekere aza a oo tono akucunu a akiza. U ta̱ ka̱mbuwa̱ ugbozu wa̱ yi uba̱ta̱ wa aza a na a lyawai akucunu a akiza.

31 <<A̱soja a̱ yi a̱ ta̱ 'yon a̱vu a̱ lungusa̱ A̱a̱'isamapaɗa o ucira, a̱vu u zuwa a lyawa kucci vu usana suru. A ta zuwa mayan me ili yi idaba i na ya̱a̱ ta̱wa̱a̱ na̱ mona. 32 Aza a na a kuɗai akucunu o ndolo gba, mogono ma̱ ta̱ pura̱ ugbozu u le adama o uyo'o wu una̱ wa̱ yi. Amma aza a na e revei A̱sula̱ e le e te isawan ugbamu a̱vu a̱ piri.

33 <<Aza a na a̱ ri nu ugbozu gba a̱ ta̱ kpa̱tu'wa̱ ama na̱ a̱bunda̱ esu, ko na wo o'woi a mantsa wa'a a̱ to una le na̱ matsun me pe'eni ko a̱ kula̱to le ko a̱ pura̱ le a̱ ka̱ra̱ ko a usa itana i le. 34 Na̱ a̱ riya̱, a̱ ta̱ tsura̱ ikambishi wa'a, reve aza a na a̱ ri na̱ a̱ɓula̱ shi o ɓolo ne ele. 35 A̱za̱ o ugbozu o ro a̱ ta̱ kuɗa̱, adama a lapula le, a̱ ka̱mba̱to le cece, a̱a̱ da̱na̱ babu abasa, hali ukosu u mantsa, adama a na u ta̱ ta̱wa̱ a mantsa ma na A̱sula̱ a zuwai.

36 <<Mogono'o ma ta yuwan cine u cigai. U ta̱ 'ya̱sa̱n aciya̱yi, we ene ngashi u la'a ta̱ ma̱sula̱ suru. U ta yuwan adanshi a avama e ekere a̱ A̱sula̱ a̱ musula̱. U ta lyuwa elime hali mantsa ma na upan wa̱ A̱sula̱ u shiwain, adama a na ili i na A̱sula̱ foɓoi suru u ta shiwan. 37 Waa tara musula̱ mu nkaya ma̱ yi ili shi, ko musula̱ nna a̱ma̱ci a cigai. Waa tara musula̱ n ro ili shi, adama a na u ta̱ 'ya̱sa̱n aciya̱yi, we ene ngashi u la'a le ta̱ suru. 38 O una̱ u ndolo u ta ca musula̱ n na n ri na̱ kari vu ucira tsugbain. U ta ca ma̱sula̱ ma na nkaya ma̱ yi n revei shi tsugbain, o ure u na waa ca yi zinariya oɓolo na̱ azurufa na atali a sa'ani, na̱ ne'en vi ikebe. 39 U ta usa ba̱ta̱ na ri na̱ kari na la'ai ucira suru suru ni ikambi i ma̱sula̱ me iɗa i ro. Aza a na a̱ usu niyi, u ta ca le tsugbain lon, a̱vu waru u ca le tsugbain tsa ama a̱ a̱bunda̱, a̱vu waru u ne'eshen le iɗa yo o'wo atsupu e le.

40 <<A̱ tyo o ukosu, mogono mo Uyagi ma̱ ta̱ 'ya̱wa̱a̱ yi nu uvon, a̱vu mogono mo Ugana mo uta̱a̱ yi nu uvon cine vu revei a̱ba̱jini a̱ lipa̱, ni ikeke yi ido na akumbi e ido, na antsun a̱ a̱bunda̱. U ta̱ kuru iɗa iɗa, a̱vu u uwulai pe cine vu revei mini ma̱ tsu ta̱wa̱. 41 U ta uwa e Iɗa i Sa'ani wu una ama na̱ a̱bunda̱. Amma iɗa ya̱ Edom na̱ za va Mowa, na azagbain e iɗa ya Amon a ta la'a e ekere a̱ yi. 42 U ta̱ 'ya̱wa̱a̱ nɗa n ro nu uvon, agba iɗa ya Masar ya la'a shi. 43 U to o'wo zagbain vu utsuru u zinariya na̱ azurufa, ni ili ya̱ a̱ɓula̱ i na i ri pe a̱tsuma̱ a Masar, ama a Libiya waru oɓolo na aza a̱ Kush a̱ ta̱ kuru yi. 44 Amma ili i na waa uwwa diga asana nu ugana u ta ca yi wovon, a̱vu wu uta̱ nu upan lon u kototo waru wu una ozo o ro na̱ a̱bunda̱. 45 U ta̱ shuwa̱ ogodo o tsugono tsa̱ yi e memere ma mala na̱ masasan ma sa'ani ma akiza. Na̱ ne suru u ta̱ kuwa̱, waru babu za na a kamba yi.