1 A̱tsuma̱ a aa'wan e ire o tsugono tsa Nebukanaza, Nebukanaza yuwan ta̱ alavu; reve u ɓa̱la̱ yi, a̱vu u kuɗa̱ a lantsa. 2 Ɗaɗa mogono ma zuwa e ɗeyi a̱za̱ a̱ yindi no ozo o tsuboci na̱ a̱za̱ a̱ a̱guma̱ na aza a avasa a̱ a̱ma̱li a̱ ta̱wa̱ a ca yi ucuɗuwu wa alavu a̱ yi. Ana a̱ ta̱wa̱ e isawain a̱ ma̱ka̱ka̱n mo mogono, 3 a̱vu u damma le, <<N yuwan ta̱ alavu a na aa damatosun mu waru n ciga ta̱ n reve ucuɗuwu wa̱ a̱yi.>>

4 Reve aza a avasa a̱ a̱ma̱li'i a̱ usu mogono na̱ Tsu'arama a damma, <<Mogono lyawa wuma wa̱ wu u jima! Damma agbashi a̱ wu alavu'u tsu ta cuɗuwa wu a̱yi.>>

5 Reve mogono ma̱ usu aza a avasa a̱ a̱ma̱li'i <<Apa nda ili i na mi isawatoin o okolo a̱ va̱, nni i kuɗa̱ e revetyo mu alavu a̱ va̱ nu ucuɗuwu wa̱ yi, n ta zuwa o koɗo ɗu okoɗi okoɗi, a̱vu a̱ ka̱mbuwa̱ 'wa ɗu okongo. 6 Amma ni i damma mu alavu'u nu ucuɗuwu wa̱ yi, i ta̱ ushi uneꞌe na atsupu ya̱'a̱ va̱ na̱ tsugbain tsa gbain. Adama o ndolo damma numu alavu'u nu ucuɗuwu wa̱ yi.>>

7 Reve a̱ usuwisa̱, <<Lyawa mogono ma damma agbashi a̱ yi alavu'u, a̱tsu gba tsu ta damma yi ucuɗuwu wa̱ yi.>>

8 Reve mogono ma̱ usu u damma, <<N reve ta̱ ili i ro yi lo shi i ciga ta̱ i lungusa̱ mantsa, adama a na ye ene ta̱ adanshi a̱ va̱ a̱ ta̱ nu ucira: 9 Nni i damma mu alavu'u shi, ugana u ta̱ u ɗa u ri nɗu lo. I ɓolo ta̱ aci adama i damma mu epen na adanshi e pere, hali she mantsa ma na addama a na tsu ri pe a vadala. Adama o ndolo damma numu alavu'u, reve n reve a na yaa gura cuɗuwa mu a̱yi.>>

10 Reve aza a avasa a̱ a̱ma̱li'i a̱ usu mogono'o a damma, <<Ko vuma pa o uvaɗi na waa gura usu ili i na mogono ma cigai shi! Babu mogono ma gbain ko mo ucira ma na me ecei ɗe boci ko za va̱ a̱guma̱ ko za va avasa a̱ a̱ma̱li cu'un vi ili i nda. 11 Ili i na mogono me ecei u tu nu usa̱n lon. Ko vuma aa gura cuɗuwa mogono a̱yi shi she musula̱ goon, agba a̱ ri nden oɓolo na̱ vaɗilima̱ shi.>>

12 Adanshi a nda a zuwa ta̱ mogono ma yuwan upan lon, ɗaɗa u zuwai o kototo a̱za̱ o urevu a Babila suru. 13 Ɗaɗa o uta̱yi udammu u na oo una le suru nle, reve a zami Daniya na̱ n'utsa̱ ma̱ yi adama o una le.

14 Reve Daniya yuwan adanshi na̱ Ariyo zagbain va̱ a̱za̱ e ipiri i mogono za na uta̱i adama wu una a̱za̱ o urevu wa Babila a̱tsuma̱ o ugbozu nu urevu. 15 Reve we ece yi, <<Nye i zuwai mogono ma zuwai udammu wu usuɗuwu tsunda?>> A̱vu Ariyo cuɗuwa Daniya addama'a. 16 Ɗaɗa Daniya 'ya̱wa̱i uba̱ta̱ u mogono, a̱vu u pati a̱ da̱shi yi mantsa adama u cuɗuwa mogono alavu'u.

17 Reve Daniya ka̱mba̱ o u'wa a̱vu u damma n'utsa̱ ma̱ yi Hananiya na̱ Mishel na̱ Azariya ili i na i yuwain. 18 A̱vu u damma le a pati isa'ani diga uba̱ta̱ wa̱ A̱sula̱ a zuva adama e ili yu usokowu i nda, adama a̱yi na̱ n'utsa̱ ma̱ yi o kototo le oɓolo na akapi a̱ a̱za̱ o urevu a Babila wan. 19 Reve a cuɗuwa Daniya ili yu usokowu'u na ayin a̱tsuma̱ a alavu alavu. Reve Daniya ciɓala A̱sula̱ a zuva, 20 u damma, <<Aba'un a̱ tyo a ala a̱ A̱sula̱ babu ukotu, za na urevu nu ucira za va̱ yi ɗa. 21 U tsu vadala ta̱ mantsa na̱ mmalu ma aa'wan; u tsu cipa̱to ta̱ ngono a̱vu waru u kumbato ngono. A̱yi ɗa u tsu ca za vu urevu urevu za vu uguru waru uguru. 22 A̱yi ɗa u tsu pa̱lu'wa̱ ili yu usokowu i na i ri a̱ru'un; u reve ta̱ ili i na i ri a̱tsuma̱ e irumbu, ekan gba a̱ ta̱ uka̱nda̱ruwu na̱ a̱yi. 23 N godyoo wu ta̱ waru n cuwa wu ta̱ A̱sula̱ a mbara n va̱: Vu ca mu ta̱ urevu nu ucira, vu roco mu ta̱ ili i na tsu pati nuwu, vu roco tsu ta̱ ili i na yaa damatosun mogono.>>

24 Ɗaɗa Daniya 'ya̱wa̱i uba̱ta̱ wa Ariyo, za na mogono ma zuwai u kototo a̱za̱ o urevu a Babila, a̱vu u damma yi, <<She vu kototo a̱za̱ o urevu a Babila wan. Tara mu a̱ tyo uba̱ta̱ u mogono, n ta cuɗuwa yi alavu a̱ yi.>>

25 Reve Ariyo jika̱ u tara Daniya a̱ 'ya̱wa̱ uba̱ta̱ u mogono, reve u damma yi, <<N tsura̱ ta̱ vuma a̱tsuma̱ a aza a na a̱ pura̱i diga Yahuda za na aa cuɗuwa mogono urevu wa alavu a̱ yi.>>

26 Reve mogono ma damma Daniya, (za na waru a̱ tsu ɗe Belteshaza), <<Vu ta gura damma mu ili i na me enei a̱tsuma̱ a alavu a̱ va̱ nu ucuɗuwu wa̱ yi?>>

27 A̱vu Daniya usu, <<Ko za vu urevu ko za yindi ko boci ko za va avasa a̱ a̱ma̱li lo na aa gura cuɗuwa mogono ili yu usokowu i na we ecei shi, 28 amma A̱sula̱ a̱ ta̱ ɗe zuva za na tsu pa̱lu'wa̱ ili yu usokowu, u roco ta̱ Nebukanaza mogono ili i na yaa fara elime. Alavu na alavu alavu a na ve enei a̱vu nven a̱ a̱ga̱da̱ ele ɗa nda.

29 <<Mogono a̱vu nven a̱ a̱ga̱da̱ a̱ wu, a̱vu okolo a̱ wu e reme majiyan me ili i na ya̱a̱ ta̱wa̱, a̱vu za na tsu pa̱lu'wa̱ ili yu usokowu u roco wu ili i na yaa fara. 30 Agba a̱mu, a̱ pa̱lu'wa̱a̱ mu ta̱ ili yu usokowu i nda, agba o una̱ u na n ri nu urevu u na u la'ai akapi a ama a na a̱ ri wuma ɗa shi, amma adama a̱vu mogono vu reve ucuɗuwu wa̱ yi waru adama vu reve majiyan ma na ma̱ ri o okolo a̱ wu.

31 <<Mogono vu ka̱lyuwa̱ ta̱ reve ve ene uruma u gbain u vuma wu ucira u wovon e ikanasa mishin elime a̱ wu. 32 Aaci o uruma u nda a yuwan yi ta̱ na̱ zinariya can, na̱ ma̱ka̱ka̱n ma̱ yi ne ekere a̱ yi a yuwan le ta̱ na̱ azurufa na̱ a̱tsuma̱ na agutsu a̱ yi a̱ rumushili, 33 na ana a̱ rumu adasutsu a̱ yi akapi rumu akapi olo'o. 34 A̱vu a̱ a̱ka̱nla̱, a̱vu aatali a ɓatsa, agba ukere u vuma u ɗa u ɓatsa niyi shi. A̱vu u jara uruma'a a adasutsu a̱ rumu no olo'o'o a̱vu wu mura le. 35 Reve rumu'u no olo'o na̱ rumushili na̱ azurufa na̱ zinariya'a o ɓoso mirimiri suru, a̱vu o o'wo tso owopo uba̱ta̱ wu faba vi ishina mantsa mo usuɗuwu. Reve upepu u pura̱ le suru suru ko ili u lyawa shi. Aatali a na gba a jarai uruma'a a̱vu wo o'wo masasan ma gbain, a̱vu u shiton uvaɗi suru.>>

36 <<A̱yi nda'a a̱yi ɗaɗa alavu'u, gogo tsu ta cuɗuwa mogono a̱yi. 37 A̱vu mogono, a̱vu ɗa mogono mo ngono, za na A̱sula̱ a zuva a cayi tsugono nu ukadu na̱ tsugbain nu ucira; 38 e ekere a̱ wu a ɗa u zuwai vaɗilima̱ ni inama yu una na̱ nnunu. Uba̱ta̱ u na a̱ ri suru, u ca wu ta̱ tsugbain a aci e le suru. A̱vu ɗa aaci a zinariya o ndolo'o. 39 A̱ca̱pa̱ a̱ wu, tsugono tso ro tsa̱ ta̱ 'yon, waa rawa za va̱ wu shi. Waru, tsugono tso ro tsa ta'atsu vu rumushili ta yuwan tsugono tsu uvaɗi suru. 40 Reve waru tsugono tsa̱ na̱shi tsa̱ ta̱wa̱, ugbamu tsu rumu-adama a na rumu tsu ɓatsa ta̱ a̱vu wu mura ili biti-waru cine rumu tsu minjira ili muɓaci muɓaci, ne ɗa waa minjira akapi a na a buwai. 41 Waru cine ve enei apata a ana na akatsu a ana akapi o olo'o akapi waru a̱ rumu, a̱yi nda u to o'wo tsugono tsa na tsa ɓatsalai, agba u ta buwa na̱ macira ma̱ rumu a̱tsuma̱ a̱ yi, cine ve enei rumu uɓoluloi no olo'o. 42 Cine akapi a akatsu'u a̱ ri e irumu na akapi o olo'o, ne ɗa tsugono tsa nda tsoo o'wo upasu u na nu ucira akapi waru babu ucira. 43 Waru cine ve enei rumu uɓolu no olo'o, ne ɗa ama a̱a̱ ja̱mba̱ra̱la̱i na̱ nzuwulai aa buwa aci a̱ ta̱ shi cine vu revei rumu voo ɓoluloi no olo'o shi.>>

44 <<A mantsa mo ngono n ndolo, A̱sula̱ a zuva a̱ ta̱ 'ya̱sa̱n tsugono tsa na tsa̱a̱ riya̱ shi, ko a lyawaa ama o ro shi. U ta minjira akapi o tsugono tso ndolo reve u rawato le utyo suru suru, agba a̱yi tsugono tsa nda a aciya̱yi wa̱a̱ riya̱ shi. 45 Cine ve enei a ɓatsai aatali diga a masasan agba nu ukere u vuma shi-aatali a na o ɓosoi rumu'u na̱ rumushili no olo'o na̱ azurufa na̱ zinariya'a muɓaci muɓaci, A̱sula̱ a gbain o roco ta̱ mogono ili i na yaa fara elime. Alavu'u ne ɗa u ri, ucuɗuwu wa̱ yi waru amayun a ɗa.>>

46 Reve Nebukanaza mogono ma̱ riya̱ ma̱kpa̱ɓa̱ a̱ ma̱ka̱ka̱n ma Daniya a̱vu u ca yi tsugbain, a̱vu u zuwa a yuwaan Daniya kucci na̱ a̱tsuka̱ a̱ ma̱guru. 47 Reve u damma Daniya, <<Amayun a ɗa A̱sula̱ a̱ wu a̱yi ɗa A̱sula̱ a̱ musula̱ na̱ Zagbain vu ngono, na̱ za na tsu pa̱lu'wa̱ ili yu usokowu, adama a na vu gura pa̱lu'wa̱i ili yu usokowu i nda.>>

48 Reve mogono ma ca Daniya tsugbain lon a̱vu u ca yi ne'e gbagbain va̱ a̱bunda̱ lon. A̱vu waru u ca yi tsugbain tsu upasu wa Babila suru, a̱vu u zuwa yi wo o'wo aci a̱ a̱za̱ o urevu wa aza a Babila suru. 49 Reve Daniya pati mogono a̱vu u zuwa Shadra na̱ Meshe na̱ Abenego aza a na a̱ ri n ka̱lyuwusa̱ upasu wa Babila, Daniya gba na aciya̱yi wi isawan pe o ukobu u mogono.