1 Mogono Nebukanaza ruma ta̱ uruma u zinariya uga'an wa̱ yi ana kupakucci, washin wa̱ yi ana kucci. Reve u shuwa̱ yi a agalaci a Dura upasu wa Babila. 2 Reve Mogono Nebukanaza ma zuwa o ɓoloto azagbain a pasu vi iɗa na aza a tsugbain na̱ nan gwamna na̱ a̱za̱ o ucasu wa̱ a̱sa̱la̱ na̱ a̱za̱ e izuwa na̱ a̱za̱ o uge'etosu na aza a mapaɗa mo ugana na azagbain a pasu vi iɗa suru, a̱ ta̱wa̱ uba̱ta̱ wa̱ a̱buki o ucasu wa̱ a̱ma̱li a na u shuwa̱i.

3 Ɗaɗa azagbain e iɗa na aza a tsugbain na̱ nan gwamna na̱ a̱za̱ o ucasu wa̱ a̱sa̱la̱ na̱ a̱za̱ e izuwa na̱ a̱za̱ o uge'etosu na aza a mapaɗa mo ugana na azagbain a pasu vi iɗa'a suru o ɓolotoi adama a̱ a̱buki o ucasu wu uruma u na Mogono Nebukanaza shuwa̱i. Reve e isawan elime a̱ yi.

4 Reve ajiya a lapa ulingi nu uɗyo wu ucira, <<Apa nda ili a na a zuwa nɗu i yuwan, ama na̱ nɗa ne elentsu suru: 5 A mantsa ma na yu uwwai mesun ma aavana na̱ za vu gbala na̱ kumburu ni iwakacau na̱ cu'un wivulu suru na̱ cu'un vi iwa'ashi biti, reve i riya̱ e iɗa i yuwaan uruma u zinariya u na Mogono Nebukanaza shuwa̱i a̱ga̱nda̱. 6 Za na suru kuɗa̱i a̱ riya̱ e iɗa u yuwan a̱ga̱nda̱ a ta varishi niyi a̱tsuma̱ a̱ a̱a̱ka̱ri a akina a̱ ma̱kula̱ mo usuɗuwu.>> 7 Adama o ndolo na ama a uwwushi mesun ma aavana na̱ za vu gbala na̱ kumburu ni iwakacau na̱ cu'un wivulu suru na̱ cu'un vi iwa'ashi biti, reve ama'a suru na̱ nɗa ne elentsu suru a̱ riya̱ e iɗa a yuwaan uruma u zinariya u na Mogono Nebukanaza ma̱ shuwa̱i'i a̱ga̱nda̱.

8 A mantsa mo ndolo reve aza a avasa a̱ a̱ma̱li o ro a ta̱wa̱ a yuwan adanshi a vama a aci a mmaci ma Ibrahim. 9 A̱vu a damma Mogono Nebukanaza, <<Mogono wuma wa̱ wu u jima! 10 Vu yuwan ta̱ udammu, a na vuma na suru uwwai mesun ma aavana na̱ za vu gbala na̱ kumburu ni iwakacau na̱ cu'un wivulu suru na̱ cu'un vi iwa'ashi biti, a̱ riya̱ e iɗa a yuwaan uruma u zinariya'a a̱ga̱nda̱. 11 Agba za na suru riya̱i a̱vu u yuwan a̱ga̱nda̱ shi a ta vari yi a̱tsuma̱ a̱ a̱a̱ka̱ri a akina a̱ ma̱kula̱ mo usuɗawu. 12 Agba mmaci ma Ibrahim n na vu zuwai tsugbain tsu upasu wa Babila-Shadra na̱ Meshe na̱ Abenego, a zuwaa wu atsuvu shi, Mogono. Aa yuwusaan musula̱ ma̱ wu tsugbashi ko a yuwaan uruma u zinariya u na vu shuwa̱i a̱ga̱nda̱ shi.>> 13 Reve a̱tsuma̱ o upan lon, Nebukanaza zuwa a̱ ta̱wa̱ na̱ Shadra na̱ Meshe na̱ Abenego. Ɗaɗa a̱ ta̱wa̱i ne ele a̱ ma̱ka̱ka̱n mo mogono. 14 Reve Nebukanaza damma le, <<Amayun a ɗa Shadra na̱ Meshe na̱ Abenego, a na yaa yuwusaan musula̱ n va̱ tsugbashi ko i yuwaan uruma u zinariya u na n shuwa̱i a̱ga̱nda̱ shi? 15 Gogo nda ni i tu ufoɓu, na̱ yu uwwa mesun ma aavana na̱ za vu gbala na̱ kumburu ni iwakacau na̱ cu'un wivulu suru na̱ cu'un vi iwa'ashi biti, i riya̱ e iɗa i yuwaan uruma u zinariya u na n shuwa̱i a̱ga̱nda̱ u lobono ta̱. Agba ni i 'yuwan a yuwaan yi a̱ga̱nda̱, a ta varishi nɗu a̱tsuma̱ a̱ a̱a̱ka̱ri a akina a̱ ma̱kula̱ o usuɗawu. Reve tse ene ma̱sula̱ ma na maa gura wawa ɗu e ekere a̱ va̱.>> 16 Reve Shadra na̱ Meshe na̱ Abenego a̱ usu mogono, <<Nebukanaza, tsu ri n na tsa̱a̱ piriya̱a̱ aciya̱tsu ya̱'a̱ wu a̱tsuma̱ a addama a nda shi. 17 Nna a vari tsu a̱tsuma̱ a̱ a̱a̱ka̱ri a akina a̱ ma̱kula̱ mo usuɗawu, A̱sula̱ a na tsaa yuwusaan tsugbashi u ta gura wawa tsu pe, reve u papa tsu e ekere a̱ wu mogono. 18 Agba ko nu u wawa tsu shi, tsu ta ciga wu vu reve mogono, a na tsaa yuwaan musula̱ ma̱ wu tsugbashi shi ko tsu yuwaan uruma u zinariya u na vu shuwa̱i a̱ga̱nda̱ shi.>>

19 Reve Nebukanaza tsutsa nu upan wa Shadra na̱ Meshe na̱ Abenego reve urewesu wa̱ yi u vadala. A̱vu u zuwa a̱ fa̱la̱ akina'a u suɗuwa toto ucindere ulawu na̱ cine u tsu da̱na̱. 20 Reve u zuwa a̱tsuma̱ a̱ a̱soja a na a la'ai ucira a̱ nla̱ Shadra na̱ Meshe na̱ Abenego, reve a vari le a̱tsuma̱ a̱ a̱a̱ka̱ri a akina a̱ ma̱kula̱ mo usuɗawu. 21 Reve a̱ nla̱ le wotowu na̱ a̱tugu e le na acaka e le no okokolo e le na akapi e itana i lipu i le, a̱vu a vari le a̱tsuma̱ a̱ a̱a̱ka̱ri a akina a̱ ma̱kula̱ꞌa̱. 22 Udammu o mogono u suɗuwa ta̱ lon akina'a waru a suɗuwa ta̱ lon hali elentsu a akina'a o una a̱soja a na a variyi Shadra na̱ Meshe na̱ Abenego'o. 23 Reve ama a ta'atsu a nda Shadra na̱ Meshe na̱ Abenego a̱ riya̱ pe a akina'a wunlu kamkam.

24 Reve Mogono Nebukanaza ma̱ 'yoshin mishin adama e ili ya asalama i na we enei, a̱vu we ece aza a na aa casu yi a̱sa̱la̱, <<Ama a ta'atsu a ɗa tsu nla̱i reve tsu vari le a akina shi?>> Reve a̱ usu, <<Ne ɗa mogono.>>

25 A̱vu u saala, <<Ka̱lyuwa̱i! N te inda ama a̱ na̱shi uba̱ɗu a mmalu e memere ma akina'a, agba ko ili i yuwan le shi, waru za va̱ na̱shi'i u rotso ta̱ mawun ma̱ musula̱.>> 26 Reve Nebukanaza rawa zuzu nu una̱ntsu wa̱ a̱a̱ka̱ri a akina a̱ ma̱kula̱ꞌa̱ a̱vu u saala, <<Shadra na̱ Meshe na̱ Abenego, agbashi o Mogono ma̱ A̱sula̱, uta̱i! Ta̱wa̱i pa nda!>> Ɗaɗa Shadra na̱ Meshe na̱ Abenego o uta̱i a akina'a. 27 Reve azagbain e iɗa na azagbain na̱ nan gwamna na aza a na aa casu mogono a̱sa̱la̱ o ɓoloto uka̱nda̱ruwu ne ele. Reve e ene akina'a u ju'wa̱in lipu le shi waru ko a̱nji e le a kpara shi; a̱tugu e le waru a̱ kula̱ shi, agba ko a̱'ya̱n a̱ mikyon a̱ ri a̱ lipu le shi.

28 Reve Nebukanaza damma, <<Aba'un za va̱ A̱sula̱ a Shadra na̱ Meshe na̱ Abenego ɗa, za na lyunguyi malingata ma̱ yi a̱vu u wawa agbashi a̱ yi! A zuwa ta̱ ucira u le ya̱'a̱ yi a̱vu a 'yuwan a̱ kuru adanshi o mogono, a̱vu a ca wuma u le o una̱ u na aa yuwaan ma̱sula̱ mo ro tsugbashi ko a yuwaan yi a̱ga̱nda̱ she A̱sula̱ e le goon. 29 Adama o ndolo n zuwa ta̱ wila̱ a na ama ko iɗa ko elentsu a na suru a yuwain adanshi a vama o ro a̱ tyo e ekere a̱ A̱sula̱ a Shadra na̱ Meshe na̱ Abenego o to koɗo le mukoɗi mukoɗi reve a̱ ka̱mbuwa̱ 'wa le okongo, adama a na a̱sula̱ o ro o lo a na aa gura wawa ne tsunda shi.>>

30 Reve mogono ma̱ da̱shi Shadra na̱ Meshe na̱ Abenego tsugbain a̱tsuma̱ o upasu wi iɗa wa Babila.