1 A̱tsuma̱ a aa'wan o ufaru a Dariyu ulobo wa Ahasuweru, (za va Midiya), za na a zuwai mogono ma Babila, 2 a aa'wan o ufaru o tsugono tsa̱ yi, a̱mu Daniya, n tsura̱ ta̱ urevu a̱tsuma̱ a adanshi a̱ A̱sula̱, a adanshi a̱ A̱sulazuva a na a cayi Irimiya vumava̱sula̱, a na Urishelima ta̱ da̱na̱ lo ulungusu hali a'wan kupocindere. 3 A̱vu n vadala urewesu u va̱ a̱ tyo e ekere a̱ Mogono ma̱ A̱sulazuva, a patishi yi na avasa oɓolo na̱ matara ma akuli wotowu na akashi no okomo adama a̱ a̱tsumola̱ngu.

4 A̱vu m pati A̱sulazuva A̱sula̱ a̱ va̱ a̱vu n damma unusu u tsu, adansa, <<A̱sulazuva, Mogono ma Gbain, za na tsu ca wovon, za na waru tsu gura shiton nzuwulai, za na tsu vadala icigi ya̱ yi shi a̱ tyo e ekere aza a na a̱ ri e icigi ya̱ yi waru a̱ kurusu wila̱ wa̱ yi. 5 Tsu yuwan ta̱ unusu waru tsu ka̱la̱ma̱ ta̱, a̱vu tsu yuwan linga wuya a̱vu waru tsu 'ya̱sa̱a̱n wu aci. Waru tsu lyawa ta̱ itoni ili i na vu zuwai na̱ wila̱ wa̱ wu. 6 Tsu zuwaa ama̱sula̱ a̱ wu atsuvu shi, aza a na a yuwusain adanshi o una̱ wa̱ wu uba̱ta̱ wu ngono n tsu, na azagbain oɓolo na̱ nkaya n tsu, na ama e iɗa'a suru.>>

7 <<Mogono ma Gbain, a̱vu za va̱ a̱ɓula̱ ɗa, a̱tsu gba tso o'wo ta̱ ili i wono. Wono u nda u toni tsu ta̱ suru ana'an, ama a Yahuda na ama a Urishelima na aza a Isra'ila suru, aza a na a̱ ri alanga na aza a na a̱ ri zuzu, a nɗa n na vu bete'we nle suru adama o ulambu wa̱ a̱ɓula̱ u na a yuwaan nuwu. 8 A̱sulazuva, a̱tsu na̱ ngono n tsu, na azagbain a̱ tsu oɓolo na̱ nkaya n tsu tso o'wo ta̱ ili i wono adama a na tsu yuwain unusu a̱ ma̱ka̱ka̱n ma̱ wu. 9 Amma Mogono ma gbain ma̱ tsu, u ta̱ ni isa'ani na̱ mayan ma gafura, ko na tsu 'ya̱sa̱a̱n niyi aci. 10 Tsu toni adanshi a̱ A̱sulazuva A̱sula̱ a̱ tsu shi, waru tsu toni wila̱ u na vu ca ntsu e ekere a agbashi a̱ wu ama̱sula̱ shi. 11 Ama a Isra'ila suru a yuwan ta̱ unusu, a lyawa ta̱ ure wa̱ wu, a̱vu a̱ kuɗa̱ a zuwaa wu atsuvu. Adama o ndolo nu uge'etosu u na a kucinai aza a na a̱ ri uɗanu a̱tsuma̱ a̱ wila̱ wa Musa aagbashi a̱ A̱sula̱, a̱ tsuwa̱n tsu ele ta̱, adama a na tsu yuwaan nuwu unusu. 12 Vu shiton ta̱ adanshi a̱ wu, za na vu yuwain a aci a̱ tsu na aci a azagbain a na a yuwusan tsugbain a aci a̱ tsu na vu ta̱wa̱a̱ ntsu na̱ a̱ba̱jini a̱ a̱tsuma̱lima̱. Amayun za̱la̱ va zuva suru koto a yuwan cu'un vi ili i na a yuwain a̱tsuma̱ a Urishelima shi. 13 Cine u ri uɗanu a̱ Wila̱ wa Musa, tsundolo tsa ɗa a̱tsuma̱lima̱ a̱ ta̱wa̱ ntsu, agba na̱ ne suru tsu zami isa'ani ya̱ A̱sulazuva A̱sula̱ a̱ tsu shi, tsu lyawa mayuwan me iwuya shi, waru tsu kuru amayun a̱ wu shi. 14 A̱sulazuva gba a̱ kuɗa̱ a ca tsu a̱tsuma̱lima̱ shi, adama a na A̱sulazuva A̱sula̱ a̱ tsu za va̱ a̱ɓula̱ ɗa a̱tsuma̱ e ili i na waa yuwusan, na̱ ne suru tsu toni yi shi. 15 Gogo, Mogono ma Gbain A̱sula̱ a̱ tsu, a̱vu na vu uta̱yi ama a̱ wu e iɗa ya Masar nu ukere wu ucira waru a̱vu na vu yuwayin aciya̱wu ala a na a̱ ri a̱ tyo ana'an, tsu yuwan ta unusu, a̱vu tsu yuwan ili i na i ri ulobonu shi. 16 Mogono ma Gbain, adama e ili ya̱ a̱ɓula̱ i na vu tsu yuwan suru, vu bula̱ upan wu usuɗuwu wa̱ wu na vu yuwain na̱ lyuci va̱ wu Urishelima, aagaɗi a̱ wu a akiza. Adama o unusu u tsu ni iwuya yi nkaya n tsu, Urishelima na ama a̱ wu o o'wo ta̱ ili yu ulamu e ekere aza a na a̱ ri uka̱nda̱ruwu na̱ a̱tsu.>> 17 <<Gogo A̱sula̱ a̱ tsu, uwwa avasa ni ipati yi izami yi isa'ani ya aagbashi a wu. Mogono ma Gbain adama a̱ wu, ve ene iliyali yo ofoli ya̱ a̱a̱'isa̱ a̱ wu. 18 A̱sula̱ a̱ va̱ vu polo atsuvu vu uwwa, vu kpa̱tu'wa̱ esu a̱ wu ve ene cine lyuci gbain na̱ a̱tsu na ee ɗesu na ala a̱ wu tso o'woi ili ye pere. Tsu ta̱wa̱ ni ipati i tsu shi adama a na tsu te eneshe ngashi tsu ta̱ na̱ a̱ɓula̱, agba adama e isa'ani ya̱ a̱bunda̱ ya̱ wu i ɗa. 19 Mogono ma Gbain vu uwwa tsu, vu yuwaan tsu gafura. Vu poloo tsu atsuvu. A̱sula̱ a̱ va̱, she vu lungusa̱ mantsa wan, adama a na na ala a̱ wu a ɗa ee ɗesu lyuci nda na ama a̱ wu.>>

20 A̱mu a̱tsuma̱ a adanshi na avasa, a vadalasa a̱ nusu va̱ na̱ nusu va ama a̱ va̱ aza a Isra'ila waru a̱ ta̱wusa̱ ni ipati i va̱ uba̱ta̱ wa̱ A̱sulazuva A̱sula̱ a̱ va̱ adama a aagaɗi a akiza a̱ yi, 21 a̱mu pe ubuwu a adanshi a̱tsuma̱ a avasa, a̱vu Jibura'ilu za na n shi me enei ɗe a̱tsuma̱ alavu alavu o ufaru, u cipushi uba̱ta̱ u va̱ a mantsa ma na a tsu ca kucci vu ulivu. 22 U revetyo mu ta̱ u damma, <<Daniya, n ta̱wa̱ ta̱ n ca wu ucuɗuwu nu urevu. 23 A mantsa ma na vu temei avasa, a yuwan ta̱ adanshi. N ta̱wa̱ ta̱ n ka̱mbuwa̱ wu, adama a na a tara wu ta̱ ili ya̱ a̱ɓula̱ lon. Adama o ndolo ka̱lyuwa̱ ikaka'a a̱vu vu tsura̱ urevu wa alavu alavu'u.

24 <<A zuwa ta̱ ajuma kupocindere adama a ama a̱ wu na̱ lyuci va akiza va̱ wu a zuwa a̱tyo o unusu u na a yuwusan, a zuwa ukosu u mayan mo unusu, adama a tara ume wu unusu, reve a̱ ta̱wa̱ na̱ a̱ɓula̱ a na a̱ ri n koto shi, adama a zuwaa alavu alavu'u nu udammu wu usokowu ukere, adama waru a̱ tsun uba̱ta̱ u na la'ai akiza mani'in.

25 <<Vu reve waru vu tsura̱ urevu a na diga a mantsa ma na a zuwai a suwisa Urishelima hali a̱ tyo mantsa ma na zagbain a̱a̱ ta̱wa̱ za na a̱ tsuyin mani'in, a ta yuwan ajuma e cindere. A ta tara ajuma kupota̱li ne ejere a suwusa yi, a̱vu a yuwan re, na̱ a̱a̱ba̱jini a̱ a̱a̱ka̱ri e ipiri a̱ ka̱nda̱ruwa̱, agba u to o'wo a mantsa ma̱ a̱tsuma̱lima̱. 26 No o koto ajuma kupota̱li ne ejere, o to koɗo za na a̱ tsuyin mani'in waru waa buwa ni ili shi. A̱soja a zagbain o ndolo na̱ a̱ ta̱wa̱ o to kototo lyuci nu uba̱ta̱ wa akiza. Ukosu u lyuci'i u to o'wo tsa̱ a̱ba̱jini a̱ mini. A ta lyuwa elime nu uvon hali a̱ tyo o ukosu, waru a zuwa ta̱ a ta yuwan ukototosu. 27 A̱yi zagbain ndolo ta yuwan nzuwulai mu ucira na ama a̱ a̱bunda̱ a mantsa ma ajuma a̱ ta̱. Amma a akapi a mantsa'a, u ta putsa na̱ mayan ma̱ kucci na̱ kucci vu ucasu. A ta yuwan ili yi idaba zuva va̱ A̱a̱'isamapaɗa i na ya̱a̱ ta̱wa̱a̱ na̱ mona. U ta̱ da̱na̱ lo hali mantsa ma na a̱a̱ ta̱wa̱a̱ nu ukosu wu za na a̱ ta̱wusa̱ nu ukototosu.*>>