1 <<A mantsa mo ndolo a̱yi Mika'ilu, zagbain gbain na a̱a̱ pirishi ama a̱ wu, u ta̱ 'yon. A ta yuwan mantsa ma̱ a̱tsuma̱lima̱ za na koto a yuwain shi ana a yuwain uvaɗi u nda hali a̱ tyo ɗe. Agba a mantsa mo ndolo ama a̱ wu, za na suru a cina a ɗanai aala a̱ yi a̱tsuma̱ a aatagada'a* a ta papa yi. 2 Ama na̱ a̱bunda̱ a na a̱ kuwa̱i a̱ ri a a̱tsuma̱ a̱ ma̱buta̱ me iɗa a̱ ta̱ 'yon, ozo o ro a̱ tyo a wuma u babu ukotu, ozo o ro waru a uwwa a̱tsuma̱ o wono ni ili i na a tarai ili shi babu ukotu. 3 Aza a na a̱ ri nu ugbozu a̱ te ikana cine vu revei ekan a zuva, waru a̱ ka̱mba̱toi ama na̱ a̱bunda̱ a̱ tyo a̱ a̱ɓula̱, o to o'wo ne ekan tsi italyo'o babu ukotu suru suru. 4 Amma a̱vu gba Daniya, vu kutsulu a̱vu vu zuwa ukere e idanshi ya aatagada'a hali a̱ tyo ɗe elime. Ama na̱ a̱bunda̱ a̱ ta̱ 'ya̱wa̱ na̱ a̱ ta̱wi adama a̱ da̱shi tsura̱ urevu.>>

5 A̱vu a̱mu Daniya, n ka̱lyuwa̱ a̱vu me ene ama e re mishin elime a̱ va̱, za ta̱ a̱ nge'en mu uɗolu u nda za ta̱ gba shi a̱ nge'en ndeɗe. 6 A̱vu za ta̱ a̱tsuma̱ e le u damma za na ri wotowu no okoro, za na da̱na̱i gon mini, <<Hali a̱ tyo mantsa ma̱ ne ma ɗa ili ya asalama a nda aa shiwan?>>

7 A̱vu za na ri wotowu no okoro, za na da̱na̱i gon mini mo uɗolu, u 'ya̱sa̱n ukere u sa'ani wa̱ yi oɓolo nu ukere ugula̱ wa̱ yi zuva, a̱vu mu uwwa yi u kucina na̱ za na ri lo babu ukotu, adansa, <<A ta tara mantsa ma̱ ta̱ na̱ mantsa nu uɓatsulai u mantsa. Nu ucira wa ama a akiza u rukutsa̱, ili i nda suru i ta shiwan.>>

8 Mu uwwa ta̱ ili i na u dammai, agba n gura tsura̱ urevu shi. Ɗaɗa n tse ece, <<Zagbain va̱, nye i ɗa ili i nda ya̱a̱ ta̱wa̱a̱?>>

9 A̱vu u usu, <<Yuwan mmalu ma̱ wu, Daniya, adama a na a̱ kpa̱to ta̱ adanshi a nda nu uzuwu wu ukere hali she mantsa me elime. 10 A̱ ta̱ ka̱mba̱to ozo o ro cece, o o'wo babu abasa waru a ta lapula le, amma a̱za̱ e iwuya a ta lyuwa elime ni iwuya i le. A̱tsuma̱ a̱ a̱za̱ e iwuya babu za na a̱ tsura̱ urevu, ele gba a̱za̱ o ugbozu u ta̱ tsura̱ urevu.

11 <<Diga a mantsa ma na a putsa na̱ kucci vu ukula̱tosu vu urana suru, a̱vu waru a̱ shuwa̱ ili yi idaba i na i tsu ta̱wa̱a̱ na̱ mona, a ta yuwan rana ukpakukupa nu ukpaku ure na̱ kupakucci (1,290). 12 Za va aba'un ɗa vuma na kaɓai asuvu hali u rawai ukosu wu urana ukpakukupa nu ukpakuta'atsu na̱ mata'atsu no ozo o ton (1,335).

13 <<Amma a̱vu gba, yuwan mmalu ma̱ wu hali a̱ tyo elime. Vu te ivuwan, a̱vu a rana vu ukosu, vu 'yon vu ushi akunda a agadu a na a zuwaa nuwu.>>