1 A aa'wan o ufaru o tsugono tsa Belshaza mogono ma Babila, Daniya yuwan ta̱ alavu oɓolo na alavu alavu ana u voyin a̱ a̱a̱ga̱da̱ a̱ yi. A̱vu u ɗana ili i na we enei a̱tsuma̱ a alavu'u.

2 A̱vu Daniya damma, <<Me ene ta̱ a̱tsuma̱ a alavu alavu a̱ va̱ na ayin, pepu vu pasu na̱shi va zuva a̱ lukutusa̱ a̱ba̱jini a mala. 3 A̱vu waru inama i na̱shi yu uta̱ pe a̱tsuma̱ a mala'a, waru a tawulai ta̱ koko'o.

4 <<Za vu ufaru roco ta̱ kamu waru u da̱na̱ ta̱ ne evelu tsa̱ a̱a̱kuru. A̱mu a̱ a̱ka̱nla̱ reve a̱ mula̱ yi evelu'u, waru a̱ 'ya̱sa̱n yi ta̱ diga e iɗa a̱vu a zuwa yi wi isawan na ana tsa vuma, a̱vu a ca yi asuvu a vuma.

5 <<A̱vu me ene nama ire a̱ ma̱ka̱ka̱n ma̱ va̱, za na rotsoi nama na a̱ tsu ɗe biya. A̱vu a̱ 'ya̱sa̱n yi upasu u ta̱, u da̱na̱ ta̱ na akambu a ta'atsu a̱tsuma̱ o una̱ wa̱ yi e memere ma anga a̱ yi. A̱vu a damma yi, <'Yon vu lyuwa vu shiton a̱a̱tsuma̱ a̱ wu ni inama!>

6 <<Ana a̱yi ndolo kotoi a̱vu me ene a̱ ma̱ka̱ka̱n ma̱ va̱ oroci o uta̱su, ne evelu a̱ na̱shi a manunu o ucina̱ wa̱ yi. Nama'a u da̱na̱ ta̱ na aci a̱ na̱shi, a̱vu a ca yi ucira u tsugbain.

7 <<Ana a̱yi nda kotoi a̱vu n yuwan alavu alavu na ayin, a̱vu a̱ ma̱ka̱ka̱n ma̱ va̱ me ene nama na̱shi za vu ucira ni ili wovon lon. U da̱na̱ ta̱ no ogbolo a anga a̱ rumu. U tsu tama ta̱ reve wu ɓoso, a̱vu ili i na i buwai wu dasa na ana a̱ yi. U tawa ta̱ ko'o na akapi e inama a na a buwai aza a na a̱ ta̱wa̱i elime a̱ yi suru, waru u da̱na̱ ta̱ na avana kupa.

8 <<A̱mu a yuwusan majiyan ma avana o ndolo, a̱vu me ene aavana o ro za ke'en, za na uta̱i a̱tsuma̱ e le, reve a̱ mula̱ aza a ta'atsu o ufaru. Aavana a nda a̱ da̱na̱ ta̱ ne esu tse esu a vaɗilima̱ nu una̱ a yuwusan adanshi nu uvaɗu.

9 <<A̱mu a̱tsuma̱ a̱ a̱ka̱nla̱, a̱vu a zuwa otogu o tsugono, a̱vu Za na Ri Lo Kuci da̱nu, itana ya̱ yi i da̱na̱ ta̱ u'uri puwu tsa̱ tsikilu. A̱nji a̱ yi waru uri tsa̱ a̱punda̱ a̱ uri. Ootogu o tsugono tsa̱ yi waru a madala tse elentsu a akina, a̱ga̱nda̱mu a̱yi waru a̱ da̱na̱ ta̱ a madala na akina.

10 <<Uɗolu wa akina u da̱na̱ ta̱ e meyene, o uta̱sa̱ a̱ ma̱ka̱ka̱n ma̱ yi. Ukpakukupa ukpakukupa a̱bunda̱ a̱ ta̱wusa̱ uba̱ta̱ wa̱ yi a yuwusaan yi a̱ga̱nda̱, ukpakukupa kupa toto ukpakukupa kupa e isawan a̱ ma̱ka̱ka̱n ma̱ yi, a̱vu a̱za̱ o uge'etosu a̱ da̱nu adama o uge'etosu, reve a̱ kpa̱tu'wa̱ atagada.

11 <<A̱vu n lyuwa elime na̱ a̱ka̱nla̱ adama e idanshi yu uvaɗu i na aavana'a waa yuwusan. A̱vu n lyuwa elime na̱ a̱ka̱nla̱ she mantsa ma na a paɗai nama'a a̱vu a̱ lungusa̱ lipu va̱ yi waru a vari yi a̱tsuma̱ a akina tsa̱ra̱ u kula̱. 12 (Ele akapi e inama'a a usa ta̱ ucira u le, amma a lyawa le ta̱ wuma hali mantsa wa'a.)

13 <<A̱tsuma̱ a alavu alavu a̱ va̱ na ayin n ka̱lyuwa̱ ta̱, a̱vu me ene nanza elime a̱ va̱ tsa mawun ma vuma, a̱ ta̱wa̱ a̱tsuma̱ e eleshe a̱vu u ta̱wa̱ uba̱ta̱ wu Za na Ri Lo Kuci a̱vu a tara yi a̱ tyo a̱ ma̱ka̱ka̱n ma̱ yi. 14 A̱vu a ca yi ucira na̱ tsugbain oɓolo na̱ tsugono, adama ama suru na̱ nɗa ne elentsu a yuwaan yi a̱ga̱nda̱. Tsugono tsa̱ yi tsa̱ ri nu utyo shi, tsugono tsa na tsa̱a̱ ka̱ra̱ tsa ɗa shi, waru babu za na aa gura kototo tsugono tsa̱ yi.

15 <<A̱mu Daniya, u ɓa̱la̱ mu ta̱ o okolo a̱ va̱, alavu alavu a na me enei wu da'waton mu ta̱ a̱bunda̱ lon. 16 A̱vu n ka̱ra̱ a̱ tyo uba̱ta̱ wu za ta̱ wa aza a na a̱ da̱na̱i mishin lo ɗaɗa me ece niyi amayun e ili i nda suru. Reve u damma mu waru u cuɗuwa mu ili'i. 17 <Inama i gbagbain i na̱shi i nda ele ɗa ngono n na̱shi aza a na a̱a̱ 'yon a̱tsuma̱ o uvaɗi. 18 Agba ama a akiza o Mogono ma̱ A̱sula̱, a̱ ta̱ ushi tsugono a̱vu waru tsugono'o wo o'wo za le babu ukotu.>

19 <<A̱vu n shi n ciga n tsura̱ amayun o urevu wu nama na̱shi, za na tawai ko'o na akapi waru ili i wovon i ɗa lon, na anga a̱ rumu na̱ a̱kpa̱ta̱ a̱ rumushili, nama na shi minjirai reve waru u tama aza a na a̱ riya̱i a̱vu waru wu dasa ili i na i buwai na ana a̱ yi. 20 Waru n shi ta̱ n ciga n reve adama a avana kupa a na a̱ ri a aaci a̱ yi waru na adama a aavana a na o uta̱i, za na mula̱i avana a̱ ta'atsu elime a̱ yi. N shi ta̱ n ciga n tsura̱ urevu wa aavana a na a̱ ri ne esu nu una̱ u na u ri a adanshi a̱ba̱jini a adanshi o uvaɗu, za na a̱ yindi i va̱ u la'a ta̱ akapi mgbain. 21 A̱mu a̱tsuma̱ a̱ a̱ka̱nla̱, a̱yi aavana a nda a yuwusan ta̱ uvon na ama a akiza a̱vu u lyuwa aci e le, 22 she na Za na Ri Lo Kuci ta̱wa̱i, a̱vu u yuwan adanshi o uge'etosu u mejege adama a ama akiza o Mogono ma̱ A̱sula̱. A̱vu mantsa ma yuwan a na ama a akiza'a a̱ ta̱wa̱ a̱ ushiyi tsugono'o.

23 <<Apa ucuɗuwu u na u ca numu: <A̱yi nama na̱shi a̱yi ɗa tsugono tsa̱ na̱shi za na a̱a̱ ta̱wa̱ a̱tsuma̱ o uvaɗi. U ta tawa ko'o na akapi o tsugono suru waru u ta lyuwa uvaɗi ma̱ɓula̱, u ta dasasa yi na ana waru u to ɓoso yi. 24 Ele avana kupa ele ɗa ngono kupa n na mo uta̱ pa a̱tsuma̱ o tsugono tsa nda. A̱ca̱pa̱ e le mogono mo ro ma̱ ta̱ ta̱wa̱, ko'o na aza a na a̱ ta̱wa̱i ɗe, u ta lyuwa aci o ngono n ta'atsu. 25 U ta yuwan adanshi a avama e ekere o Mogono ma̱ A̱sula̱, reve u ɓongi ama a akiza o Mogono ma̱ A̱sula̱, u ta ciga a vadala mantsa nu uritosu u wila̱. A ta ca ama a akiza e ekere a̱ yi a mantsa wa'a, mantsa na akapi a mantsa.

26 << <Amma ukobu wu uge'etosu u ta̱ da̱nu, a̱vu a usa ucira wa̱ yi a̱vu o kototo yi suru suru. 27 Waru a ta ca ama a akiza o Mogono ma̱ A̱sula̱, tsugono nu ucira na̱ tsugbain u tsugono u na u ri za̱la̱ va zuva suru. Tsugono tsa̱ yi tso to o'wo babu ukotu, waru ngono mu uvaɗi suru n ta yuwaan yi a̱ga̱nda̱ na̱ tsutoni.>

28 <<A̱yi nda a̱yi ɗaɗa ukosu wa adanshi'i. A̱mu Daniya, n da̱na̱ ta̱ wuda'un lon a majiyan ma̱ va̱, a̱vu urewesu u va̱ u lukuta̱, a̱vu n zuwa ili i nda o okolo a̱ va̱.>>