1 A̱tsuma̱ a aa'wan a ta'atsu o tsugono tsa Jehoyakim mogono ma Yahuda, Nebukanaza mogono ma Babila ma̱ ta̱wa̱ ta̱ Urishelima a̱vu u ka̱nda̱ruwa̱ yi nu uvon. 2 Reve A̱sulazuva a ca Jehoyakim mogono ma Yahuda e ekere a̱ yi oɓolo ni itana ya̱ A̱a̱'isamapaɗa a̱ A̱sula̱. Reve u pura̱ le a̱ tyo a̱ a̱a̱'isa̱ a̱ ma̱sula̱ ma̱ yi e iɗa ya Shina*, reve u zuwa le o uzuwata wa̱ a̱a̱'isa̱ a̱ ma̱sula̱ ma̱ yi.

3 Reve mogono'o ma zuwa Ashpenaza, zagbain va azagbain a̱ yi u ta̱wa̱a̱ na aza a Isra'ila o ro diga o umatsun u tsugono na̱ wa azagbain, 4 olobo a na a̱ ri usa̱du shi, ulobonu wa̱ a̱ka̱nla̱ aza a na a̱ ri nu urevu nu uguru wu ulinga suru aza a na o ritoi lon. Olobo'o aza a na a̱ ri na̱ ma̱puna̱ ma na ee reve ili go'o, waru a ntsayi a yuwan a̱ga̱nda̱ o ukobu u mogono. O roco le elentsu ni iɗana ya aza a Babila. 5 Mogono ma zuwaa le ta̱ akunda e ilyalya i le na̱ masayan mo urana suru a̱tsuma̱ e ilyalya ya̱ yi. O to rito le a'wan a ta'atsu, reve no o koto e reme ulinga u mogono.

6 A̱tsuma̱ e le aza a Yahuda a̱ shi ta̱ pe: Daniya na̱ Hananiya na̱ Mishel na̱ Azariya. 7 Reve zagbain va azagbai'in u ca le ala a sa'avu: Daniya a̱yi ɗa a cayi Belteshaza, Hananiya waru a̱yi ɗa a cayi Shadra, Meshe a̱yi ɗa a cayi Mesha reve waru a ca Azariya Abedenego.

8 A̱vu gba Daniya tara o okolo a̱ yi wa̱a̱ lungusa̱ aciya̱yi ni ilyalya na̱ masayan mo tsugono shi. Ɗaɗa u patiyi zagbain va azagbain u lyawa yi adama u lungusa̱ aciya̱yi wan. 9 Reve gba A̱sula̱ a zuwa Daniya tsura̱ isa'ani ni icigi e ekere a zagbai'in. 10 Agba a̱vu zagbai'in u damma Daniya, <<N ta uwwusa wovon wu zagbain va̱ mogono, za na zuwai ilyalya ni ili yo oso ya̱ wu. Na̱ we ene vu lobono tsa akapi o olobo acari a̱ wu shi, vu ta zuwa aaci a̱ va̱ e meleshe e ekere o mogono.>>

11 Reve Daniya damma za vi ipiri na zagbain na zuwayi Daniya na̱ Hananiya na̱ Mishel na̱ Azariya, 12 <<Yuwan ankuri vu lyungwa̱ agbashi a̱ wu hali rana kupa: Vu casu tsu a̱vu'un o usa'an wa̱ a̱a̱rumbu na̱ mini mo oso. 13 Reve vu kurato tsu no olobo a na aa lyuwusa ilyalya i mogono, reve vu yuwan na agbashi a̱ wu ni ili i na ve enei.>> 14 A̱vu u usu ili i na a dammai, reve u lyungwa̱ le rana kupa.

15 O ukosu wu rana kupa'a, reve urewesu u le u la'a ulobonu. Reve waru a la'a olobo a na a lyuwai ilyalya i tsugono mgbain. 16 Ɗaɗa za vi ipiri'i u tawai ilyalya na̱ masayan me le ma na a̱ shi a̱ ri n sowuso, a̱vu u reme a casu le a̱vu'un o usa'an wa̱ a̱a̱rumbu.

17 Reve gba A̱sula̱ a ca olobo a̱ na̱shi a nda urevu nu uguru wa atagada suru. Daniya tsura̱ ta̱ urevu wa alavu alavu na̱ wa alavu suru.

18 O ukosu u mantsa ma na mogono ma zuwai na a̱a̱ ta̱wa̱ ne ele, reve zagbai'in u ta̱wa̱ ne ele a̱ ma̱ka̱ka̱n ma Nebukanaza. 19 Reve mogono ma yuwan adanshi ne ele. A̱vu we ene ko za ri tsa Daniya na̱ Hananiya na̱ Mishel na̱ Azariya shi. Adama o ndolo a̱vu e reme a yuwusaan mogono a̱ga̱nda̱. 20 Reve a̱tsuma̱ e ili i na i burai urevu nu uguru wi ili i na mogono me ece nle suru, reve we ene a la'a ta̱ a̱za̱ a̱ yindi no ozo o tsuboci a na a̱ ri uba̱ta̱ u tsugono tsa̱ yi suru toto kupa.

21 Reve Daniya da̱nu pe hali she a aa'wan o ufaru o mogono Sairu.