1 Diga yo Mogono Nebukanaza, a̱ tyo ya ama na̱ nɗa ne elentsu biti, a na a̱ ri a̱tsuma̱ o uvaɗi suru: Lyawa i tsura̱ ulyuwu we elime diga!

2 Me ene ta̱ u lobono ta̱ n damma ɗu iroci ya asalama i na Mogono ma̱ A̱sula̱ ma yuwaan numu. 3 Cine tsa ɗa mgbain mi iroci ma̱ yi, cine tsa ɗa ucira wi ili ya asalama ya̱ yi! Tsugono tsa̱ yi tsa̱ ri nu ukotu shi; tsugbain tsa̱ yi tsa̱ ta̱ lo diga mantsa a̱ tyo mantsa. 4 A̱mu Nebukanaza, a̱mu a̱tsuma̱ o u'wa u va̱ a uwwusa uyo'o waru a lyuwusa elime o ukobu u tsugono tsa̱ va̱, 5 a̱vu n yuwan alavu a na a ca numu wovon. A̱mu nven a̱ a̱ga̱da̱ a̱ va̱, alavu na̱ majiyan ma na n yuwain a zuwa mu ta̱ tsuda'un. 6 Ɗaɗa n zuwai o ɓolotowo mu a̱za̱ o urevu a Babila suru adama a cuɗuwa mu alavu'u. 7 Ana ozo o tsuboci na̱ a̱za̱ a̱ yindi na a̱za̱ a̱ o urevu na aza a avasa a̱ a̱ma̱li a̱ ta̱wa̱i, a̱vu n damma le alavu'u, agba a gura cuɗuwa mu yi shi. 8 O ukosu, reve Daniya ta̱wa̱ a̱ ma̱ka̱ka̱n ma̱ va̱, reve n damma yi alavu a̱ va̱. (A̱yi ɗa za na a cayi aala Belteshaza na aala a̱ ma̱sula̱ ma̱ va̱, waru ruhu musula̱ va akiza ta̱ a̱tsuma̱ yi.) 9 A̱vu n damma yi, <<Belteshaza, mogono ma̱ a̱za̱ a̱ yindi, n reve ta̱ a na ruhu musula̱ ma akiza ta̱ a̱tsuma̱ a̱ wu, waru babu ili yu usokowu i na i la'ai ucira wa̱ wu. Apa nda alavu a̱ va̱ damma mu ucuɗuwu wa̱ yi. 10 Alavu a na me enei a̱mu nven a̱ a̱ga̱da̱ a̱ va̱ a ɗa nda: N ka̱lyuwa̱ ta̱ reve me ene uɗanga mishin elime a̱ va̱ e memere mo uvaɗi. U shi ta̱ uga'an lon. 11 Reve uɗanga'a u reme a yuwusan mgbain nu ucira a̱vu aaci a̱ yi a̱ ju'wa̱in zuva; a ta gura ene yi ko te ɗa a̱tsuma̱ o uvaɗi. 12 A̱vu'un a̱ yi ulobonu, muwun ma̱ yi waru a̱bunda̱ lon, a ta gura lyuwato ama suru. Za̱la̱ o ululu wa̱ yi u ɗa inama yu una yee ivuwusan. Nnunu n tsu'yan waru aa yuwusan nkinda e eten a̱ yi, diga ya̱'a̱ yi ɗa ili i wuma biti yaa lyuwusa. 13 A̱tsuma̱ a alavu alavu'u a̱mu nven a̱ a̱ga̱da̱ a̱ va̱, n ka̱lyuwa̱ ta̱ a̱vu me ene malingata a̱ ma̱ka̱ka̱n ma̱ va̱, za va akiza, a̱ cipusa̱ diga zuva. 14 A̱vu u damma nu uɗyo zuva, <Koɗo uɗanga'a a̱vu o koɗo eten a̱ yi, a saza a̱vu'un a̱ yi suru a̱vu a zaza muwun ma̱ yi. Lyawa inama i bete'we za̱la̱ va̱ yi nnunu waru mu 'yawan e eten a̱ yi. 15 Agba a lyawa ikyun na aralu a̱ yi e iɗa wunlu na̱ rumu na̱ rumushili a̱tsuma̱ a anlya o uta̱nu a atsusa. Lyawa u re'we na a'iza diga zuva, reve u da̱nu oɓolo ni inama yu una a̱tsuma̱ a anlya. 16 Lyawa a vadala okolo a̱ yi a vaɗilima̱ a̱vu wo o'wo no okolo a nama, hali she na̱ mantsa me cindere ma̱ ka̱ra̱ a aci a̱ yi.> >>

17 << <Nlingata n ɗa n dammai ili i nda, a̱sa̱la̱ a na aza a akiza a tarai, adama aza a wuma e reve a na A̱sulazuva Mogono ma̱ A̱sula̱ ma ɗa za tsugbain tsa ama waru u tsu ca ta̱ za na suru u cigai u ca. Reve u zuwaa le za na ri ili i ro shi suru suru.> 18 A̱yi nda a̱yi ɗa alavu a na a̱mu Mogono Nebukanaza n yuwain. Gogo nda Belteshaza, damma mu ucuɗuwu wa̱ yi, adama a na ko vuma ta̱ a̱tsuma̱ a̱ a̱za̱ o urevu o tsugono tsa̱ va̱ aa gura cuɗuwa mu yi shi. Agba a̱vu vu ta gura adama a na ruhu ma̱sula̱ ma akiza ta̱ a̱tsuma̱ a̱ wu.>>

19 Reve Daniya (za na waru a̱ tsu ɗe Belteshaza) wo o'wo kuci kuci ne'en adama a na majiyan ma̱ yi ma ca niyi wovon. Ɗaɗa mogono ma dammai, <<Belteshaza, she vu lyawa alavu'u ko ucuɗuwu wa̱ yi u ca wu wovon wan.>> A̱vu Belteshaza usu, <<Zagbain va̱, na aa damma alavu'u nu ucuɗuwu wa̱ yi u to o'wo a aci a aza a na a 'yuwan nuwu! 20 Uɗanga u na ve enei za na yuwain mgbain nu ucira, na ncilecile ma̱ yi n ju'wa̱n zuva, za na uvaɗi suru we inda, 21 na̱ a̱vu'un a sa'ani na̱ muwun ma̱ a̱bunda̱, za na ili suru yaa lyuwusa, a casu inama yu una ululu, nu uba̱ta̱ wu nkinda wu nnunu n tsu'yan e eten a̱ yi- 22 Mogono, a̱vu ɗaɗa uɗanga'a! Vo o'wo ta̱ zagbain nu ucira; tsugbain tsa̱ wu tsa kungwa ta̱ hali u rawa zuva, reve waru tsugbain tsa̱ wu tsa rawa ba̱ta̱ ba̱ta̱ va alanga o uvaɗi. 23 Mogono me ene ta̱ malingata, za va akiza, a̱ cipa̱ diga zuva a dansa, <Koɗo uɗanga'a reve o kototo yi, agba a lyawa ikyu'un wunlu na̱ rumu na̱ rumushili, a̱tsuma̱ a anlya a atsusa, na aralu a̱ yi pe e iɗa. Lyawa u re'we na a'iza a zuva; lyawa u da̱nu tsi inama yu una, hali she na̱ mantsa me cindere ma̱ ka̱ra̱ a aci a̱ yi.> >> 24 <<Apa nda ucuɗuwu'u, Mogono, waru apa ili i na Mogono ma̱ A̱sula̱ ma zuwai a aci a zagbain va̱ mogono: 25 A̱ ta̱ gba̱ra̱ wu diga a̱tsuma̱ a ama, reve vu da̱nu ni inama yu una; vu ta tama wunlya tsi inan a̱vu vu re'we na a'iza a zuva. Mantsa me cindere ma̱ ta̱ ka̱ra̱ a aci a̱ wu, hali she mantsa ma na vu revei Mogono ma̱ A̱sula̱ a̱yi ɗa Mogono ma Gbain e ekere o tsugono tsa ama, waru u tsu ca ta̱ za na suru u cigai u ca. 26 Agba a na a zuwai a lyawa ikyun na aralu o uɗanga'a, u to rocosu a̱ ta̱ ka̱mbuwa̱a̱ wu tsugono tsa̱ wu a mantsa ma na vu revei a na Zuva ɗa aa yuwusan tsugbain. 27 Adama o ndolo, Mogono, vu yuwan ma̱za̱nga̱ vu usu a̱sa̱la̱ a̱ va̱: Vu lyawa unusu wa̱ wu vu yuwan ili i mejege, waru vu lyawa iwuya ya̱ wu e ekere o urocosu wi isa'ani a̱ tyo ya aza a na oo ɓongishi. U ta gura o'wo ne ɗa ulyuwu wa aci wa̱ wu waa lyuwa elime.>>

28 Ili i nda suru i cina ta̱ Nebukanaza Mogono. 29 Ana a yuwain woto kupa ne ejere, mogono a mmalu zuva vu ukobu u tsugono tsa Babila, 30 a̱vu u damma, <<A̱yi nda a̱yi ɗa Babila gbain na n suwai wo o'wo uba̱ta̱ wu nden u tsugono shi, nu ucira u va̱ adama a tsugbain a tsugbain tsa̱ va̱ shi?>> 31 A̱yi ubuwu a adanshi, reve uɗyo wu uta̱ diga zuva, <<Mogono Nebukanaza, apa ili i na o paɗaa nuwu: A kasa wu ta̱ nu ucira u tsugbain tsa̱ wu. 32 O to lo wu diga a̱tsuma̱ a ama reve vu da̱nu oɓolo ni inama yu una; vu ta tama wunlya tsi inan. Mantsa me cindere ma̱ ta̱ ka̱ra̱ a aci a̱ wu, hali she mantsa ma na vu revei Mogono ma̱ A̱sula̱ a̱yi mogono e ekere o tsugono tsa ama, waru u tsu ca ta̱ za na suru u cigai u ca.>> 33 Reve ili i na a dammai e ekere a Nebukanaza i shiwushin. A̱ gba̱ra̱ yi ta̱ diga a̱tsuma̱ a ama, reve u tama wunlya tsi inan. A̱vu e re'wetyo lipu va̱ yi na a'iza a zuva reve a̱nji a̱ yi a yuwan uga'an tsa ashi'in a̱ a̱kuru a̱kpa̱ta̱ a̱ yi waru tsa̱ a̱kpa̱ta̱ a manunu. 34 O ukosu u mantsa mo ndolo, a̱mu, Nebukanaza, n 'ya̱sa̱n ta̱ esu a̱ va̱ zuva, reve a̱ ka̱mbuwa̱a̱ mu nu ugbozu u va̱. Reve n ciɓala Mogono ma̱ A̱sula̱ n ca yi tsugbain za na ri wuma hali hali hali. Tsugono tsa̱ yi tsa̱ ri nu ukotu shi; Tsugbain tsa̱ yi diga a mantsa hali a̱ tyo mantsa ma ɗa u ri. 35 Ama o uvaɗi suru ili i ro i ɗa shi. U tsu yuwan ta̱ cine u cigai na̱ cira va zuva na ama o uvaɗi. Ko za aa gura geshe yi ukere shi ko we ece yi, <<Nye vu yuwain shi?>> 36 A mantsa ma na a̱ ka̱mbuwa̱a̱ numu ugbozu u va̱'a̱, tsugbain tsa̱ va̱ na̱ mawwa mo uyo'o ma̱ va̱ fo a̱ ka̱mbuwa̱a̱ mu ta̱ adama a tsugbain tsu uba̱ta̱ u tsugono tsa̱ va̱. A̱za̱ o ucasu wa̱ a̱sa̱la̱ na azagbain a̱ va̱ a zami mu ta̱, reve a̱ ka̱mbuwa̱a̱ mu o ootogu o tsugono tsa̱ va̱, hali gba a̱ da̱shi mu tsugbain tsa na tsa la'ai tsu ufaru. 37 Gogo nda, a̱mu Nebukanaza, n cuwa ta̱ reve n ca Mogono ma zuva tsugbain, adama a na ili i na suru waa yuwusan a̱ ta̱ mejege waru ure wa̱ yi suru amayun a ɗa. Waru aza a na a̱ ri a mmalu nu uvaɗu u ta gura ka̱ɗa̱to le.