1 Ana Dariyu o'woi mogono, we ene ta̱ u lobono ta̱ u ne'eshen tsugono'o uba̱ta̱ ukpaku nu ushin (120), reve u zuwa zagbain vi iɗa upasu suru. 2 Reve u zuwa azagbain a ta'atsu zuva le, Daniya da̱na̱ ta̱ pe a̱tsuma̱ e le. E ekere e le ɗa akapi a azagbain aa damma cine aa yuwusan ulinga u le tsa̱ra̱ mogono ma lamba ili i ro o tsugono tsa̱ yi wan. 3 Uba̱ta̱ u nda reve a̱yi Daniya wo o'wo ko'o na akapi a azagbain na azagbain a pasu vi iɗa, adama a na u da̱na̱i na̱ ruhu vu urevu la̱nga̱. Reve mogono ma yuwan ifoɓi cine waa ca yi tsugbain a̱tsuma̱ o tsugono'o suru. 4 Reve ele akapi a azagbain na azagbain a pasu vi iɗa a̱ ka̱ra̱ a zamishi ure u na e reme Daniya nu unusu o ure u na waa yuwusan ulinga wa̱ yi, agba a gura tsura̱ shi. A̱ tsura̱ yi ni ili yi idaba shi, adama a na a̱yi vuma ɗa na o soɗuwoyi ma̱tsa̱n waru u tsu yuwan ta̱ ili ya̱ yi mejege, u tsu yuwan ulinga wa̱ yi nu uro shi. 5 O ukosu a̱vu ama a nda a damma, <<Tsa̱a̱ tsura̱i ure u na tsee remei vuma nda Daniya nu unusu shi, she no oɓolo na̱ wila̱ u na u burai A̱sula̱ a̱ yi.>>

6 Ɗaɗa o ɓoloi aci a̱vu a̱ 'ya̱wa̱ uba̱ta̱ u mogono a̱vu a damma yi, <<Wuma wa̱ wu u jima, Mogono Dariyu! 7 Suru azagbain o tsugono tsa̱ wu, na aza a tsugbain, na azagbain a pasu vi iɗa, na̱ a̱za̱ o ucasu wa̱ a̱sa̱la̱ oɓolo nan gwamna a̱ sa̱la̱ ta̱ mogono ma zuwa wila̱, a̱vu vu reve o toni ta̱ wila̱ u ndolo. Wila̱ u na vaa zuwa a̱yi ɗa a̱tsuma̱ a rana mata'atsu na va̱a̱ ta̱wa̱ a̱ tyo ya̱'a̱ wu ɗa goon ama a yuwan avasa. Vuma na yuwain avasa suru a̱ tyo uba̱ta̱ u vuma ro ko ma̱sula̱, agba uba̱ta̱ wa̱ wu shi, mogono, a ta vari vuma nda a̱ a̱a̱ka̱ri e ikamu. 8 Gogo, mogono, she vu zuwa wila̱ꞌa̱, a̱vu vu zuwa ukere adama vuma gura vadala yi wan. Tsundolo tsa ɗa wo o'wo wila̱ wa Midiya na̱ Pashiya, za na babu vuma na aa gura vadala yi.>> 9 Ɗaɗa mogono Dariyu zuwai ukere a̱ wila̱ u na u ri uɗanu'u.

10 Ana Daniya revei a zuwa ta̱ ukere a̱ wila̱ꞌa̱, reve u ka̱mba̱ o u'wa wa̱ yi uba̱ta̱ u na u ri nu usowoto wu upepu o u'wa wa zuva za na ri ukpa̱tu'u a̱ tyo Urishelima. Reve u kingyo na̱ a̱lu a̱ yi toto uta'atsu o urana reve u yuwan avasa u godyoo A̱sula̱, cine u yuwusain ɗe nu ufaru. 11 A̱vu ele ama a nda a̱ ta̱wa̱ oɓolo a̱vu a cina Daniya a yuwusan avasa a̱ ta̱wusa̱ ni ipati ya̱ yi e ekere a̱ A̱sula̱. 12 A̱vu a̱ ta̱wa̱ zuzu a̱vu a damma mogono, adama a̱ wila̱ u na a zuwai, <<Mogono! Ashe vu zuwa ukere adama a̱ wila̱ shi, a na za na yuwain ipati a̱ tyo a̱ ma̱sula̱ ko vuma a̱tsuma̱ a rana mata'atsu a ta vari yi a̱tsuma̱ a̱ a̱a̱ka̱ri e ikamu shi?>> A̱vu mogono ma̱ usu a̱vu u damma, <<Adanshi'i o ta̱ lo mishin nu ucira, cine wila̱ wa Midiya na̱ Pashiya ri, waru babu vuma na aa gura vadala yi.>>

13 Reve a̱ usu a yuwan adanshi a̱ ma̱ka̱ka̱n mo mogono, <<Daniya, za na ri a̱tsuma̱ a aza na a̱ pura̱i diga Yahuda, u zuwa atsuvu a̱ tyo ya̱'a̱ wu shi, mogono, ko wila̱ u na vu zuwai ukere, amma u ta yuwusan avasa a̱ yi uta'atsu o urana.>> 14 Ana mogono ma uwwai idanshi i nda, a̱vu wo o'wo udamu a̱bunda̱ lon a̱vu u zami ure u na waa wawa Daniya. U liva̱ ta̱ a yuwusan majiyan cine wa̱a̱ tsura̱ ure u na waa wawa yi.

15 Reve ele ama'a a̱ 'ya̱wa̱ uba̱ta̱ u mogono oɓolo reve a damma mogono, <<Vu cuwan, mogono, wila̱ wa Midiya na̱ Pashiya u ta̱ lo na babu vuma na aa gura vadala ili i na a̱tsuma̱ a̱ wila̱ꞌa̱.>>

16 A̱vu mogono ma zuwa a̱ ta̱wa̱ na̱ Daniya, a̱vu a vari yi a̱tsuma̱ a̱ a̱a̱ka̱ri e ikamu. Reve mogono ma damma Daniya, <<Lyawa A̱sula̱ a na vaa yuwusaan a̱ga̱nda̱ kuci u wawa wu!>>

17 A̱vu a̱ ta̱wa̱ na aatali a̱vu o to una̱ wa̱ a̱a̱ka̱ri'i na̱ a̱yi, ɗaɗa mogono ma̱ ɓa̱ru niyi na̱ makawani mo urotsu wu ukere wa̱ yi oɓolo na̱ makawani mo urotsu we ekere wa azagbain a̱ yi, adama nanza ta̱wa̱ u vadala aɗa a Daniya wan. 18 A̱vu mogono ma̱ ka̱mba̱ o ukobu u tsugono tsa̱ yi, reve wa asa a yuwusan akuli. A̱vu waru u 'yuwan ili i na yoo voton yi ugbozu i na a̱ ta̱wa̱a̱ niyi, waru u gura lantsa shi.

19 Usana a tawa, reve mogono ma̱ 'yon na̱ molo a̱ tyo a̱ a̱a̱ka̱ri e ikamu'u. 20 Ana u ta̱wa̱i zuzu na̱ a̱a̱ka̱ri uba̱ta̱ u na Daniya ri, a̱vu u saala nu uɗyo wa̱ a̱tsumola̱ngu, reve u damma Daniya, <<Daniya, aagbashi a̱ A̱sula̱ a wuma, ko A̱sula̱ a̱ wu za na vaa yuwusaan a̱ga̱nda̱ kuci u gura ta̱ wawa wu e ekere e ikamu'u?>>

21 Reve Daniya usu mogono, <<Mogono, wuma wa̱ wu u jima! 22 A̱sula̱ a̱ va̱ a̱ lyungu ta̱ malingata ma̱ yi reve u kpa̱to na̱ vi ikamu'u, waru a gura uwwato mu usa̱n shi, adama a na a̱ tsura̱ mu nu unusu e ekere a̱ yi shi. Waru koto e reme mu nu unusu e ekere a̱ wu shi mogono.>>

23 A̱vu mogono ma yuwan ma̱za̱nga̱ ma̱ a̱bunda̱ lon, reve u zuwa o uta̱a̱ Daniya a̱tsuma̱ a̱ a̱a̱ka̱ri e ikamu. Adama o ndolo ɗaɗa o uta̱yi Daniya a̱ a̱a̱ka̱ri'i, agba a cina yi na̱ wuntsu shi, adama a na u zuwayi A̱sula̱ ucira.

24 A̱vu mogono ma zuwa a̱ ta̱wa̱ na aza a na a yuwain epen a aci a Daniya a̱vu a vari le a̱tsuma̱ a̱ a̱a̱ka̱ri e ikamu oɓolo na̱ muwun n le na̱ a̱ma̱ci e le. Waru kafu a rawa o ugundo wa̱ a̱a̱ka̱ri'i, a̱vu ikamu yi keɗece le, a̱vu a kukuɗa etele e le suru suru.

25 Ɗaɗa Mogono Dariyu ma ɗanayi ama suru na̱ nɗa ne elentsu a na a̱ ri nden o uvaɗi: <<Lyawa i tsura̱ ulyuwu we elime diga!

26 <<N zuwa ta̱ wila̱ a̱tsuma̱ o tsugono tsa̱ va̱ ama a ciga a 'yuwan a uwwa wovon a̱vu a yuwan tsutoni na̱ A̱sula̱ a Daniya. Adama a na a̱yi A̱sula̱ a wuma a ɗa waru u ta̱ lo babu ukotu, tsugono tsa̱ yi tsa̱ ri n kototo shi, ucira u tsugono tsa̱ yi tsa̱ ri nu utyo shi.

27 <<U tsu uta̱a̱ ta̱ reve u wawa, u tsu yuwan ta̱ iroci ni ili ya asalama zuva na̱ pa o uvaɗi, a̱yi ɗa za na wawai Daniya o ucira wi ikamu.>>

28 Daniya tsura̱ ta̱ ulyuwu we elime a mantsa mo tsugono ma Dariyu no o tsugono tsa Sayiru za va Pashiya.