MAAKO 15

Jesu Weetwa kuli Pilato Muleli weci Loma

1 Bapaizi basilutwe abamaalu abamayi bo Mulawo abamwi boonse Benkuta Mpati yaba Juda bakamana kupangana. Mpoonyina Jesu bakamwaanga maceeni okumutola okumupa ku muleli Pilato. 2 Pilato wakamubuzya kuteeti, "Ndendiwe mwami wama Juda na?"

Jesu wakataba kuteeti, "Ndiwe waamba namu."

3 Mpoonyina Bapaizi Basilutwe bakatamikizya Jesu zintu zinji zibi. 4 Kuzwaawo ape Pilato wakabuzya Jesu kuteeti, "Alizyoonse zibakutamikizya, totabi kwateni na?"

5 Kono Jesu wakaumuna feela, mpoonyina Pilato wakakomokwa.

Jesu waatulwa kuteeti Ajaigwe

6 Iino nako ye Pasika Pilato wajesi citambo cokulukulula mwaange omwi ngubakumbila bantu. 7 Kwali mwaalumi walikwiitwa kuteeti Bbalabbasi walimuntolongo aleeyo nako abasikulipangula kaambo kamulandu wokujaya nako yamanyongwe. 8 Mpoonyina mbunga yabantu yakabungana okukumbila Pilato kuteeti abalukululwide sintolongo mbuli citambo cakwe. 9 Mpoonyina wakababuzya kuteeti, "Muyanda kuteegwa ndimwaangunwide ooyu Mwami wama Juda na?" 10 Wakabuzya namu kaambo walizi kuteeti bapaizi basilutwe bakaaba Jesu mumaanzaakwe kaambo komunyono.

11 Kono bapaizi basilutwe bakayunga bantu kuteeti basale kuteegwa kulukululwe Bbalabbasi. 12 Mpoonyina Pilato wakababuzya ape kuteeti, "Ino ooyo ngomuteeti mwami wama Juda ndimucite buti?"

13 Bakoongolola kuteeti, "Akankaminwe aciingano!"*15:13 Imwi nzila yaba Loma yokusubula cigebenga yali yokucikankamina. Bali kwiinganya zisamu zyobile zipati okuziswaanganya antoomwi. Mpoonyina basilumamba balikukankamina naanga kwaangilila maanza ecigebenga kucisamu comwi amaulu kulicimwi cisamu. Balikwiimikizya ciingano kulanga mujulu okucileka cigebenga kuteeti cifwe lufu lucisa mbicaani-mbicaani alincico.

14 Kono Pilato wakabuzya kuteeti, "Ino wacita mulandu nzi?"

Mpoonyina nibakoongololesya kuteeti, "Aakankaminwe!"

15 Mukuyanda kubotezya bantu, Pilato wakabalukulwida Bbalabbasi okukwabboozya*15:15 Kweendelanya ecizo caba Loma, mwaange wali kusyapwa endufwa yakapangidwe otutambotambo twecikutu twakabikidwe kucijatizyo cecisamu. Kanjikanji tutambo twakajesi otubulobulo naanga tufuwafuwa twakabikidwe kwateni kuteegwa kacicisa loko. Jesu, okumupa kuli basilumamba kuteeti bamukankamine.

Basilumamba mbubakafubazika Jesu

16 Mpoonyina basilumamba bakanjizya Jesu mulabba lyengʼanda yomweendelezi okwiita basilumamba bamwi boonse balikubede kwateni. 17 Kuzwaawo bakazwaatika Jesu jansi lyomusyobo wecisombo, bakapanga musyini wamaumvwa okumuzwaatika nguwo kumutwe. 18 Mpoonyina bakatalika kumutondezya likute lyokumufubazya, kabateeti, "Wabonwa o mwami wama Juda!" 19 Mpoonyina balikwiiindulula kumuuma kumutwe akabalelo okumuswida, okumufugamina kutondezya likute lyokumufubazya. 20 Nibakamana kumufubazika bakamutubula jansi okumuzwatika zizwaato zyakwe, mpoonyina bakamutola kuyoomukankamina.

Jesu wakankaminwa

21 ✝ 15:21 Banaloma 16:13. Umwi mwaalumi walikwiitwa kuteeti Saimoni woku Sailini, nguwali isi wa Alekizanda o Lufasi walikuzwa kumiinzi kayoobuya mutaindi, mpoonyina basilumamba bakamuswaana munzila okumusungilizya kunyamuna ciingano. 22 Mpoonyina bakatola Jesu kucibaka ciitwa kuteeti Gologota, kokuteeti, "Cibaka ca kapapa komutwe."*15:22 Kapapa komutwe Ibbala lye kapapa kokumutwe lyaamba cintu comwi efuwa lyo kumutwe. 23 Bakasola kumupa waini ivweene omusamu wiitwa kuteeti mili kono taakwe nakainywa. 24 ✝15:24 Intembauzyo 22:18. Mpoonyina bakamukankamina aciingano okwaabana zizwato zyakwe mulicabo. Bakauma cisolo kuteeti bazibe mbobataabane zizwato muntu o muntu. 25 Bakakankamina Jesu mujunzoonza awoola lye fuka. 26 Cikwankwani calembedwe cibakamujaila kuteeti, "Mwami wama Juda." 27 Ape kwali ezigebenga zyobile zyakakankaminwa o Jesu, comwi kululyo lwakwe cimbi kucigoyo cakwe. 28 (Munzila eeyi Malembo akazuzikizigwa aamba kuteeti, "Wakabalilizigwa ezigebenga.") ✝15:28 Izaya 53:12.*15:28Ambi malembo otumpango tumwi alakavwanya kapango ka 15:28 Munzila njonyeeyi Malembo akazuzikizigwa aamba kuteeti, "Wakabalilizigwa ezigebenga."

29 ✝ 15:29 Intembauzyo 22:7; 109:25; Maako 14:58; Joni 2:19. Bantu bali kwiindooka bali kuzungaanya mitwe okufubaazika Jesu kuteeti, "Ehee! Walikwaamba kuteeti Ngʼanda ya Leza ulaimwacoola okwiiyakulula mumazuba otatwe! 30 Lifutule, kozwa aciingano!"

31 Mbweenya namu Bapaizi Basilutwe abamayi bo Mulawo bakafubaazika Jesu kabaamboola mulicabo kuteeti, "Wakafutula bamwi kono wakacilwa kulifutula! 32 Aseluke aciingano ooyu Mesiya Mwami wa Izilayeli tubone, netutimusyome."

Aabo bobile bakakankaminwa limwi o Jesu bakamufubaazika.

Kufwa kwa Jesu

33 Musikati nilyali akati zuba kwakaba mudima nyika yoonse kwamawoola otatwe. 34 ✝15:34 Intembauzyo 22:1. Muwoola lyatatu kujolezya, Jesu wakoongolola kuteeti, "Eloyi, eloyi, lema sabbakatani?" Kokuteeti, "O Leza wangu, O Leza wangu, wandisiila nzi?"

35 Bamwi bantu baliwo taakwe nibakamvwisisisya, bakaamba kuteeti, "Amumvwe! Ulimukwiita Elija*15:35 Muci Hibbulu, ibbala lya "Leza" lilikozyenye ezina lya "Elija". Bantu tebakamvwisisizye zyaakali kwaamba Jesu mukampango ka 34. Musinsimi!" 36 ✝15:36 Intembauzyo 69:21. Umwi wabo wakazuza okuyoonika ciponci mu waini ipapa, okucibika kumpela yebbalo. Kuzwaawo wakacinyamuna okucibika kumulomo wa Jesu mpoonyina wakateeti, "Atulindile tubone na Elija uleza kuzomugwisya aciingano!"

37 Mpoonyina Jesu wakoongolola okuyeeka kamamanino.

38 ✝ 15:38 Kulonga 26:31-33. Mpoonyinaawo sila lyomu Ngʼanda ya Leza lyakayauka akati muzipaanzi zyobile kuzwa ajulu kusikilaansi. 39 Mupati wabasilumamba walikweendelezya kujaigwa kwa Jesu wakaimvwi kunembo kweciingano, naakabona mbwaakafwa Jesu wakaamba kuteeti, "Nconzyo ooyu mwaalumi wali Mwanaa Leza!"

40 ✝ 15:40 Luka 8:2-3. Kwali abanakazi bamwi balikulangila aleele, akati kabo kwali Maliya Magadalena o Maliya banyina Jemusi muniini o Josefa o Salome. 41 Jesu naali mu Galileya aaba banakazi balikumucilila okumugwasya. Kwakali abamwi banakazi banji kwateni bakeza anguwe ku Jelusalemu.

Kuzikwa kwa Jesu

42,43 Yali nako yokumazuba Josefa woku Alamatiya naakasika. Josefa wali umwi walikukutekwa waabo Benkuta Mpati ya Majuda walikulindila kuza ko Bwami bwa Leza. Bwali buzuba Bokulibambila,*15:42-43 Buzuba Bokulibambila ndezina lyeci Juda lyo buzuba bwalikucilila Nsabata. Bwali kwiitwa kuteeti mbuzuba Bokulibambila kaambo bantu balikweelede kulibambila Nsabata. Nsabata bwali buzuba bwatali kuzumizigwa kubeleka. Buzuba Bokulibambila bwali kutalika muli Bwane kumazuba mane kuyoosika muli Bwasanu kumazuba. obu bwali Buzuba bwalikucilila Nsabata, Josefa wakaliyumya okwiinka kuli Pilato kuyookumbila mutunta wa Jesu. 44 Pilato wakakomokwa kumvwa kuteeti Jesu walifwide kale. Mpoonyina wakaita mupati wabasikalumamba okumubuzya kuteeti, "Nconzyo Jesu wafwakale na?" 45 Mupati wabasikalumamba wakazumina kuteeti nconzyo wafwa. Mpoonyina Pilato wakazumizya Josefa kuubweza mutunta. 46 Kuzwaawo Josefa wakaula sila liteteete, waka selusya mutunta okuuvungaila mwateni okuubika mumpangala yakasigwa mubbwe pati loko. Mpoonyina wakakunkulisizya fateni bbwe pati kuvumba mulyango we cuumbwe. 47 Maliya Magadalena o Maliya banyina Josefa balikulangilila okubona mutunta wa Jesu puwakabikwa.